សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋមន្ត្រីក្រសួងហិរញ្ញវត្ថុអាម៉េរិក លោក Scott Bessent និងឧបនាយករដ្ឋមន្ត្រីចិន លោក He Lifeng បានផ្តើមជំនួបពិភាក្សាគ្នាកាលពីថ្ងៃអាទិត្យកន្លងទៅ និងបន្តរហូតដល់ថ្ងៃចន្ទដើមសប្ដាហ៍នេះ ដើម្បីរៀបចំបង្កើតកិច្ចព្រមព្រៀងដែលអាចកើតមានលើវិស័យពាណិជ្ជកម្ម បញ្ញាសិប្បនិម្មិត (AI) និងបញ្ហាផ្សេងៗទៀតមុនពេលកិច្ចជំនួបកំពូលរវាងមេដឹកនាំមហាអំណាចទាំងពីរ នេះបើយោងតាមសេចក្ដីរាយការណ៍ពី CNA ។
តាមរយៈកិច្ចពិភាក្សានេះ គឺជាជំហានស្ទាបស្ទង់សម្រាប់មេដឹកនាំកំពូលទាំង២ ប្រធានាធិបតីអាម៉េរិក លោក Donald Trump និងប្រធានាធិបតីចិន លោក Xi Jinping នៅសេតវិមានថ្ងៃព្រហស្បតិ៍ខាងមុខនេះ ខណៈភាគីទាំងពីរកំពុងស្វែងរកវិធីកាត់បន្ថយភាពតានតឹងលើផ្នែកពាណិជ្ជកម្ម បច្ចេកវិទ្យា និងកង្វល់យុទ្ធសាស្ត្រផ្សេងៗទៀត ដូចជា លទ្ធភាពនៃការបន្តកិច្ចព្រមព្រៀង ផ្អាកជម្លោះពាណិជ្ជកម្ម ដែលនឹងផុតកំណត់នៅខែវិច្ឆិកាខាងមុខនេះ រួមជាមួយការកំណត់ក្របខ័ណ្ឌសុវត្ថិភាពសម្រាប់កិច្ចអភិវឌ្ឍបច្ចេកវិទ្យាបញ្ញាសិប្បនិម្មិត (AI) ។
រដ្ឋមន្ត្រីក្រសួងហិរញ្ញវត្ថុអាម៉េរិក លោក Scott Bessent បានរំពឹងថា តាមរយៈកិច្ចជំនួបដ៏អស្ចារ្យមួយនេះនឹងមានកិច្ចពិភាក្សាប្រកបដោយការយកចិត្តទុកដាក់ គ្រប់ជ្រុងជ្រោយ និងចេញជាផ្លែផ្កាសម្រាប់កិច្ចប្រជុំរវាងមេដឹកនាំទាំងពីរ។ ទន្ទឹមនឹងនេះ មន្ត្រីអាម៉េរិក ក៏ខិតខំធានាឱ្យបាននូវរំហូររ៉ែកម្រសំខាន់ៗ ដែលជាតម្រូវការចាំបាច់បំផុតសម្រាប់ក្រុមហ៊ុនអាម៉េរិក។ ទោះជាយ៉ាងណា គេរំពឹងថា កិច្ចចរចានឹងផ្តោតលើ AI, ពាណិជ្ជកម្ម, រ៉ែកម្រ និងប្រធានបទផ្សេងទៀត ដោយផ្អែកលើកិច្ចចរចាទ្វេភាគីពីជុំមុនៗ ហើយកិច្ចប្រជុំថ្នាក់បច្ចេកទេសនឹងបន្តរហូតដល់ថ្ងៃចន្ទសប្ដាហ៍នេះ។
សូមរំលឹកថា កិច្ចចរចាកាលពីពេលកន្លងមកនេះបានបង្ហាញថា ចិន សន្យាទិញផលិតផលកសិកម្មរបស់អាម៉េរិក ហើយការអនុវត្តតាមលក្ខខណ្ឌទាំងនោះក៏អាចជាប្រធានបទមួយដែលត្រូវយកមកពិភាក្សាផងដែរ។ ដោយឡែក ពាក់ព័ន្ធនឹងវិស័យ AI អាម៉េរិក អះអាងពីភាពបើកជំហររបស់ខ្លួនចំពោះកិច្ចពិភាក្សាស្តីពីការជៀសវាងហានិភ័យរួមគ្នា។ បញ្ហាមួយទៀត គឺការដាក់សម្ពាធសេដ្ឋកិច្ចរបស់អាមេរិកលើអ៊ីរ៉ង់ ដោយសារចិនគឺជាដៃគូសេដ្ឋកិច្ចកំពូល និងអ្នកទិញប្រេងដ៏ធំបំផុតរបស់អ៊ីរ៉ង់។ យ៉ាងណាមិញ ក្រុមអ្នកវិភាគមើលឃើញថា កិច្ចប្រជុំរវាងប្រធានាធិបតីអាម៉េរិក និងមេដឹកនាំចិន នៅមិនទាន់អាចឈានដល់ការដោះស្រាយបញ្ហាធំៗ ឬស៊ីជម្រៅទាំងអស់នោះឡើយ។
អតីតអនុរដ្ឋលេខាធិការក្រសួងការបរទេសអាម៉េរិក លោក Kurt Campbell បានលើកឡើងថា លទ្ធផលជាក់ស្តែងបំផុតដែលគេអាចរំពឹងទុកបាន គឺការបន្តកិច្ចព្រមព្រៀងផ្អាកជម្លោះពាណិជ្ជកម្មដែលអាចបន្តរហូតដល់ចុងឆ្នាំនេះ។ លើសពីនេះ គេរំពឹងថា លោក Trump និងលោក Xi អាចនឹងជួបគ្នាម្ដងទៀតនៅខែវិច្ឆិកា ក្នុងវេទិកាសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) នៅទីក្រុងសិនជិន ប្រទេសចិន ហើយ លោក Trump អាចនឹងអញ្ជើញលោក Xi ឱ្យចូលរួមកិច្ចប្រជុំកំពូល G20 នៅទីក្រុង Miami នាខែធ្នូនេះផងដែរ៕
Account
Security
Favourite Content