ព្រះសីហនុ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជាបានថ្លែងថា រាជរដ្ឋាភិបាលគ្រោងវិនិយោគ និងអភិវឌ្ឍន៍កំពង់ផែខេត្តព្រះសីហនុ នៅជំហានទី៣ ជិត ១ពាន់លានដុល្លារ នៅត្រឹមឆ្នាំ២០២៩ ខាងមុខនេះ ស្របទៅតាមផែនការមេដែលបានគ្រោងទុក។ ការលើកឡើងរបស់សម្ដេចធិបតីនាយករដ្ឋមន្រ្ដីបែបនេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សា អគារស្នាក់នៅរបស់គ្រូបង្រៀន ទីចាត់ការ និងអគារកាត់ដេរ នៅវិទ្យាល័យ ហ៊ុន សែន វាលរេញ នាព្រឹកថ្ងៃទី២៦ ខែមីនា ឆ្នាំ២០២៥។

សម្តេចធិបតី ហ៊ុន ម៉ាណែត បានគូសបញ្ជាក់ថា ខេត្តព្រះសីហនុ គឺជាខេត្តនាំមុខគេដែលមានកំពង់ផែទឹកជ្រៅ ក្នុងចំណោមចំណោមកន្លែងផ្សេងៗក្នុងប្រទេសកម្ពុជា ដូចជា ខេត្តកំពត កែប និងកោះកុង។

សម្តេចធិបតី ហ៊ុន ម៉ាណែត បានគូសបញ្ជាក់ថា ៖

«ខ្ញុំធ្លាប់បានប្រាប់ហើយថា អត់ប្រកួតបានជាមួយកំពង់ផែព្រះសីហនុទេ ហើយប្រទេសរបស់យើង ក៏ត្រូវកំណត់គោលដៅផែអាទិភាពធំ ខេត្តផ្សេងទៀតក៏យើងត្រូវអភិវឌ្ឍន៍ដែរ ដូចជានៅកោះកុង នៅកំពត ជាដើម។ ប៉ុន្ដែសម្រាប់សក្ដានុពល និងការវិនិយោគ យើងដូចគ្រោងពីនេះទៅដល់ឆ្នាំ២០២៩ នូវជំហានទី៣ ដែលគ្រោងវិនិយោគជិត ១ពាន់លានដុល្លារបន្ថែមទៀត»។

យ៉ាងណាក៏ដោយ សម្តេចធិបតី ហ៊ុន ម៉ាណែត ក៏បានបញ្ជាក់ដែរថា បើទោះបីមានខេត្តមានសក្តានុពលសេដ្ឋកិច្ចធំយ៉ាងណាក៏ដោយ ប៉ុន្តែបើគ្មានធនធានមនុស្សទេ គឺមិនអាចជំរុញសក្តានុពលសេដ្ឋកិច្ចបាននោះឡើយ។

ជាមួយគ្នានោះដែរ សម្តេចធិបតីនាយករដ្ឋមន្រ្ដី ក៏បានអះអាងដែរថា នៅក្នុងជំហានទី១ មានការពង្រីក ពង្រឹងខេត្តព្រះសីហនុ ហើយកាលពីឆ្នាំកន្លងទៅ សម្ដេចធិបតីក៏បានអញ្ជើញសម្ពោធកំពង់ផែនៅខេត្តព្រះសីហនុ ដោយចំណោយថវិកាជាង ២០០លានដុល្លារ ជាឥណទានសហការជាមួយជប៉ុន។ ដូច្នេះ នៅសល់ ២ដំណាក់កាលទៀតជាង  ៦០០លានដុល្លារ រាជរដ្ឋាភិបាល មានការវិនិយោគធំណាស់ ទៅលើកំពង់ផែខេត្តព្រះសីហនុ ដោយមិនត្រឹមតែជាផែអន្ដរជាតិនោះទេ តែរៀបចំតំបន់ភស្ដុភារកម្ម ដើម្បីបម្រើវិស័យដឹកជញ្ជូន។

ក្នុងឱកាសនោះ សម្ដេចបវរធិបតី ហ៊ុន ម៉ាណែត នាយករដ្ឋមន្ដ្រី ក៏បានបន្ថែមថា សក្ដានុពលខេត្តព្រះសីហនុ នឹងកាន់តែរីកធំតទៅទៀតនាពេលខាងមុខ ប៉ុន្ដែអ្វីដែលត្រូវការសំខាន់បំផុតនោះ គឺធនធានមនុស្សក្នុងខេត្ត ដើម្បីបម្រើដល់ការអភិវឌ្ឍរីកចម្រើនទាំងនេះ។ សូមជម្រាបថា បើតាមរបាយការណ៍របស់កំពង់ផែព្រះសីហនុ បានបង្ហាញថា នៅក្នុងឆ្នាំ២០២៤ កន្លងទៅនេះ មានចរាចរកុងតឺន័រកើនឡើងដល់ ១.០០០.០០០ TEUs (ឯកតាសមមូលម្ភៃហ្វីត) ពោល គឺកើនឡើង ២៩% ធៀបនឹងឆ្នាំមុន។

កំណត់ត្រាដ៏ខ្ពស់នេះត្រូវបានប្រកាសនៅលើគេហទំព័រផ្លូវការរបស់កំពង់ផែស្វយ័តក្រុងព្រះសីហនុនៅថ្ងៃទី២១ ខែធ្នូ ឆ្នាំ ២០២៤។ ការកើនឡើងយ៉ាងខ្លាំងនៃចរាចរកុងតឺន័រនេះបានបង្ហាញពីតួនាទីសំខាន់របស់កំពង់ផែក្នុងការសម្របសម្រួលពាណិជ្ជកម្មអន្តរជាតិ និងជាសញ្ញាបង្ហាញពីសកម្មភាពសេដ្ឋកិច្ចដ៏រឹងមាំនៅទូទាំងប្រទេស។

ក្នុងឆ្នាំ២០២៤ កំពង់ផែស្វ័យតក្រុងព្រះសីហនុ ដែលចុះបញ្ជីនៅផ្សារមូលបត្រកម្ពុជា រកចំណូលបាន ៤៥២.៥៧៨លានរៀល(ប្រមាណ ១១០,៣៨លានដុល្លារ) កើនឡើ២៤,១២% បើធៀបនឹងរយៈពេលដូចគ្នាក្នុងឆ្នាំ២០២៣ ដែលមានត្រឹមតែ ៣៦៤.៦៤១លានរៀល (ប្រមាណ ៨៨,៩៤លានដុល្លារ៕