សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ រដ្ឋាភិបាលអាម៉េរិកសងប្រាក់ពន្ធគយ ៨១ ពាន់លានដុល្លារត្រឡប់ទៅវិញ បន្ទាប់ពីតុលាការកំពូលសម្រេចថា ការប្រមូលពន្ធគយបដិការ ដែលដាក់ចេញដោយលោកប្រធានាធិបតី Donald Trump (ដូណាល់ ត្រាំ) ទាំងនោះ គឺខុសច្បាប់។ នេះបើយោងតាមការរាយការណ៍ពី The Guardian នៅថ្ងៃទី១៤ ខែកក្កដា ឆ្នាំ ២០២៦។
កាលពីខែកុម្ភៈកន្លងទៅនេះ តុលាការកំពូលអាម៉េរិកសម្រេចច្រានចោលគោលនយោបាយពន្ធគយរបស់លោក ដូណាល់ ត្រាំ ដែលបង្ខំឱ្យរដ្ឋាភិបាលត្រូវបង្វិលសងប្រាក់ទៅឱ្យក្រុមហ៊ុននានាដែលបានបង់ពន្ធទាំងនោះវិញ។
យោងតាមទិន្នន័យថវិកាជាតិ បានឱ្យដឹងថា អាម៉េរិកសងប្រាក់ពន្ធត្រឡប់ទៅវិញចំនួន ៨១ ពាន់លានដុល្លាររួចមកហើយ គិតត្រឹមពេលនេះក្នុងឆ្នាំសារពើពន្ធបច្ចុប្បន្ន (គិតចាប់ពីខែតុលា ឆ្នាំ២០២៥) បើធៀបនឹងការសងទៅវិញត្រឹមតែ ៥ ពាន់លានដុល្លារប៉ុណ្ណោះ ក្នុងរយៈពេលដូចគ្នាកាលពីឆ្នាំមុន។
មន្ត្រីក្រសួងរតនាគារម្នាក់ បង្ហើបថា ការកើនឡើងនៃការសងប្រាក់វិញយ៉ាងច្រើនបែបនេះ ដោយសារតែសេចក្ដីសម្រេចរបស់តុលាការកំពូលស្ទើរតែទាំងស្រុង ខណៈដែលការបង្វិលសងប្រាក់ភាគច្រើនត្រូវបានធ្វើឡើងនៅក្នុងខែឧសភា និងខែមិថុនា។
ស្របពេលដែលពន្ធគយសកលបណ្ដោះអាសន្ន ១០ ភាគរយ របស់រដ្ឋបាលលោក ត្រាំ នឹងត្រូវហួសសុពលភាពនៅថ្ងៃទី ២៤ ខែកក្កដាខាងមុខនេះ សេតវិមានកំពុងរៀបចំផែនការបង្កើតពន្ធគយថ្មីៗបន្ថែមទៀតដូចជា ការបំពានលើច្បាប់ប្រឆាំងនឹងពលកម្មដោយបង្ខំ និង ការលើសសមត្ថភាពផលិតកម្មឧស្សាហកម្ម។
កន្លងមក លោក ដូណាល់ ត្រាំ ធ្លាប់លើកឡើងថា ពន្ធគយគឺជាដំណោះស្រាយសម្រាប់សេដ្ឋកិច្ចអាម៉េរិក រាប់ចាប់តាំងពីការនាំយកក្រុមហ៊ុន និងរោងចក្រត្រឡប់មកកាន់ប្រទេសវិញ, ទទួលបានកិច្ចព្រមព្រៀងពាណិជ្ជកម្មប្រសើរជាងមុន, និងការកាត់បន្ថយឱនភាពថវិការបស់រដ្ឋាភិបាល (ការចំណាយច្រើនជាងចំណូល)។
ទោះបីជាឱនភាពថវិកាបានថយចុះបន្តិចកាលពីឆ្នាំមុន ដោយសារតែចំណូលពីពន្ធគយនោះក៏ដោយ ប៉ុន្តែឥឡូវនេះកំពុងតែកើនឡើងជាថ្មីម្ដងទៀត។ ឱនភាពថវិកាកើនឡើងដល់ ១,៣៦ ទ្រីលានដុល្លារក្នុងរយៈពេល ៩ ខែដំបូងនៃឆ្នាំសារពើពន្ធ ពោលគឺកើនឡើង ២ ភាគរយ។
មិនត្រឹមតែប៉ុណ្ណោះ អាម៉េរិកក៏បានចំណាយប្រាក់អស់ជាង ១ ទ្រីលានដុល្លារសម្រាប់បង់ការប្រាក់នៃបំណុលរបស់ខ្លួន ពោលគឺកើនឡើង ១៤ ភាគរយ ខណៈដែលការចំណាយលើវិស័យយោធាកើនឡើង ៥ ភាគរយ ដោយសារតែសង្គ្រាមនៅតំបន់មជ្ឈិមបូព៌ា៕
Account
Security
Favourite Content