សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ ប្រទេសចិនអាចប្រឈមផលប៉ះពាល់ពីការដាក់ទណ្ឌកម្មសេដ្ឋកិច្ចថ្មីរបស់សហរដ្ឋអាម៉េរិកប្រឆាំងនឹងអ៊ីរ៉ង់ ខណៈចិនគឺជាអ្នកទិញប្រេងអ៊ីរ៉ង់ធំបំផុតក្នុងរយៈពេលប៉ុន្មានឆ្នាំចុងក្រោយនេះ។ នេះបើយោងតាមការរាយការណ៍ពី The Guardian។
កាលពីថ្ងៃចន្ទកន្លងទៅនេះ រដ្ឋមន្ត្រីក្រសួងរតនាគារអាម៉េរិក លោក Scott Bessent បានព្រមានថា ប្រទេសនានាត្រូវផ្តាច់ទំនាក់ទំនងពាណិជ្ជកម្មជាមួយអ៊ីរ៉ង់ ឬប្រឈមនឹងការបាត់បង់លទ្ធភាពចូលប្រើប្រព័ន្ធហិរញ្ញវត្ថុដែលមានមូលដ្ឋានលើប្រាក់ដុល្លារអាម៉េរិក។ វិធានការនេះអាចបង្កសម្ពាធជាពិសេសលើចិន ដែលនៅតែជាទីផ្សារសំខាន់បំផុតសម្រាប់ប្រេងអ៊ីរ៉ង់។
កន្លងមក លោក Bessent បានស្នើឱ្យចិនសហការជាមួយយុទ្ធនាការរបស់ទីក្រុងវ៉ាស៊ីនតោន ដើម្បីបង្កើនសម្ពាធសេដ្ឋកិច្ចលើទីក្រុងតេអេរ៉ង់។ ទោះជាយ៉ាងណា ការនាំចូលប្រេងអ៊ីរ៉ង់របស់ចិននៅតែបន្ត ទោះបីបរិមាណបានធ្លាក់ចុះយ៉ាងខ្លាំងក៏ដោយ។
ក្នុងខែកុម្ភៈ ចិនបាននាំចូលប្រេងពីអ៊ីរ៉ង់ប្រមាណ ១,៥៧ លានបារ៉ែលក្នុងមួយថ្ងៃ ហើយបរិមាណបានធ្លាក់មក ១,៤៧ លានបារ៉ែលក្នុងមួយថ្ងៃនៅខែមីនា។ ក្រោយមក ការនាំចូលបានធ្លាក់ចុះបន្ថែមទៀត បន្ទាប់ពីអាម៉េរិកបង្កើនការរារាំងលើកំពង់ផែ និងនាវារបស់អ៊ីរ៉ង់។
ទិន្នន័យថ្មីជាងនេះបង្ហាញថា ការដឹកជញ្ជូនប្រេងអ៊ីរ៉ង់ទៅចិនបានធ្លាក់ចុះមកប្រមាណ ៥៣៤,០០០ បារ៉ែលក្នុងមួយថ្ងៃនៅខែសីហា ពី ៨២៣,០០០ បារ៉ែលក្នុងមួយថ្ងៃនៅខែកក្កដា។ បរិមាណនេះបានធ្លាក់ចុះយ៉ាងខ្លាំងពីកម្រិតកំពូល ១,៥៨ លានបារ៉ែលក្នុងមួយថ្ងៃនៅដើមឆ្នាំ។
រោងចក្រចម្រាញ់ប្រេងឯកជនរបស់ចិន ឬហៅថា “teapot refineries” គឺជាអ្នកទិញប្រេងឆៅអ៊ីរ៉ង់សំខាន់ ដោយសារតែប្រេងអ៊ីរ៉ង់ត្រូវបានលក់ក្នុងតម្លៃបញ្ចុះថ្លៃ។ រោងចក្រទាំងនេះនៅតែបន្តទិញប្រេង ខណៈរោងចក្រចម្រាញ់ប្រេងរដ្ឋធំៗរបស់ចិនបានជៀសវាងប្រេងអ៊ីរ៉ង់តាំងពីឆ្នាំ២០១៩ ដោយសារការព្រួយបារម្ភអំពីទណ្ឌកម្មអាម៉េរិក និងការចូលដំណើរការប្រព័ន្ធហិរញ្ញវត្ថុអន្តរជាតិ។
ការជួញដូរមួយចំនួនក៏ត្រូវបានរាយការណ៍ថា ប្រើវិធីលាក់ប្រភពដើម ដោយប្រេងអ៊ីរ៉ង់ត្រូវបានបិទស្លាកថាមកពីប្រទេសម៉ាឡេស៊ី ឬឥណ្ឌូនេស៊ី ហើយការទូទាត់ធ្វើឡើងជាប្រាក់យ័នចិនតាមរយៈបណ្តាញឈ្មួញកណ្តាលដែលពិបាកតាមដាន។
កន្លងមក អាម៉េរិកក៏បានដាក់ទណ្ឌកម្មលើអង្គភាព និងក្រុមហ៊ុនចិនមួយចំនួនដែលពាក់ព័ន្ធនឹងការទិញ និងដឹកជញ្ជូនប្រេងអ៊ីរ៉ង់។ វិធានការថ្មីរបស់ទីក្រុងវ៉ាស៊ីនតោនបន្តបង្កើនហានិភ័យសម្រាប់ក្រុមហ៊ុន និងស្ថាប័នហិរញ្ញវត្ថុដែលជាប់ពាក់ព័ន្ធនឹងពាណិជ្ជកម្មប្រេងអ៊ីរ៉ង់។
ទោះយ៉ាងណា រដ្ឋាភិបាលចិនបានប្រឆាំងនឹងទណ្ឌកម្មឯកតោភាគីរបស់អាម៉េរិក ដោយចាត់ទុកថាវាមិនអាចដោះស្រាយបញ្ហាបាន ហើយបានបញ្ជាក់ថា ទីក្រុងប៉េកាំងនឹងចាត់វិធានការចាំបាច់ដើម្បីការពារផលប្រយោជន៍របស់ខ្លួន។ ចិនក៏បានអំពាវនាវឱ្យភាគីពាក់ព័ន្ធដោះស្រាយវិវាទតាមមធ្យោបាយការទូត និងនយោបាយ៕
Account
Security
Favourite Content