សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ឆាប់ៗខាងមុខនេះ ប្រតិបត្តិករទូរគមនាគមន៍នៅកម្ពុជា នឹងអាចប្រមូលដើមទុនពីសាធារណជន ដើម្បីពង្រឹងសេដ្ឋកិច្ចកម្ពុជាឱ្យកាន់តែរឹងមាំ។ នេះយោងបើតាមសេចក្ដីប្រកាសព័ត៌មានរួម របស់និយ័តករមូលបត្រកម្ពុជា (SERC) និងនិយ័តករទូរគមនាគមន៍កម្ពុជា ក្រោយសិក្ខាសាលា ផ្សព្វផ្សាយពីការការដាក់ឱ្យអនុវត្តប្រកាសរួមពីលក្ខខណ្ឌ សម្រាប់ប្រតិបត្តិករទូរគមនាគមន៍ធ្វើការបោះផ្សាយលក់មូលបត្រជាសាធារណៈ។
នៅក្នុងសេចក្ដីប្រកាសព័ត៌មានកាលពីថ្ងៃទី ៨ ខែមេសា ឆ្នាំ២០២៦ បានឱ្យដឹងថា ការធ្វើការផ្សព្វផ្សាយនូវការដាក់ឱ្យអនុវត្តជាផ្លូវការនូវបទប្បញ្ញត្តិថ្មីមួយនេះ នឹងអនុញ្ញាតឱ្យប្រតិបត្តិករទូរគមនាគមន៍ អាចប្រមូលដើមទុនរយៈពេលវែង តាមការបោះផ្សាយលក់មូលបត្រជាសាធារណៈ ដែលអាចជាជំហានដ៏សំខាន់ក្នុងការឆ្ពោះទៅរកសេដ្ឋកិច្ចប្រកបដោយចីរភាព បរិយាបន្ន និងភាពធន់។
ការប្រកាសរួមស្ដីពីលក្ខខណ្ឌសម្រាប់ប្រតិបត្តិករទូរគមនាគមន៍ ធ្វើការបោះផ្សាយលក់មូលបត្រជាសាធារណៈ ត្រូវបានរៀបចំរួមគ្នារវាង និយ័តករមូលបត្រកម្ពុជា និងនិយ័តករទូរគមនាគមន៍កម្ពុជា ដែលប្រកាសនេះ នឹងកំណត់នូវក្របខណ្ឌ បទប្បញ្ញត្តិច្បាស់លាស់សម្រាប់ប្រតិបត្តិករទូរគមនាគមន៍ធ្វើការបោះផ្សាយលក់មូលបត្រជាសាធារណៈ។
ឯកឧត្តម ថោង ចិន្តា ប្រធាននិយ័តករទូរទគមនាគមន៍កម្ពុជា បានមានប្រសាសន៍ថា ក្នុងបរិបទនៃឧស្សាហកម្ម ៤.០ និងយុទ្ធសាស្ត្របញ្ចកោណដំណាក់កាលទី ១ របស់រាជរដ្ឋាភិបាល វិស័យទូរគមនាគមន៍ គឺជាសរសរស្ដម្ភដ៏សំខាន់ ក្នុងការរុញច្រានកម្ពុជាឱ្យក្លាយជាប្រទេសដែលមានសេដ្ឋកិច្ច និងសង្គមឌីជីថល។ យ៉ាងណាមិញ ការឈានទៅសម្រេចនូវគោលដៅនេះ តម្រូវឱ្យមានការវិនិយោគឥតឈប់ឈរលើហេដ្ឋារចនាសម្ព័ន្ធ និងបច្ចេកវិទ្យាចុងក្រោយបំផុត ជាពិសេសការដាក់ឱ្យប្រើប្រាស់នូវសេវា 5G នាដើមឆ្នាំ ២០២៦ នេះ។
ឯកឧត្តម បានបន្តថា ការកៀរគរទុនតាមរយៈទីផ្សារមូលបត្រ គឺជាជម្រើសយុទ្ធសាស្ត្រដ៏ឆ្លាតវៃ និងប្រកបដោយនិរន្តរភាព សម្រាប់ប្រតិបត្តិករទូរទូរគមនាគមន៍ ដើម្បីទទួលបានប្រភពទុនរយៈពេលវែងសម្រាប់ការវិនិយោគ លើកកម្ពស់តម្លាភាព និងអភិបាលកិច្ចសាជីវកម្ម និងបង្កើនទំនុកចិត្តពីសំណាក់វិនិយោគិនជាតិអន្តរជាតិ។
ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយក និយ័តករមូលបត្រកម្ពុជា បានមានប្រសាសន៍ថា ទីផ្សារមូលធន ជាប្រភពទុនមានរយៈពេលវែង និងអាចកៀរគរសាច់ប្រាក់ក្នុងទំហំធំ។ បច្ចុប្បបន្ន ក្រុមហ៊ុននៅក្នុងវិស័យថាមពល កំពុងមានតម្រូវការសាច់ប្រាក់វិនិយោគធំៗជាច្រើន ហើយកន្លងមកនិយ័តករមូលបត្រកម្ពុជាក៏បានកៀរគរទុន ជំរុញការវិនិយោគជាច្រើនផងដែរ។
ជាក់ស្ដែងក្នុងឆ្នាំ ២០១៥ ក្រុមហ៊ុននៅក្នុងវិស័យថាមពលស្អាត (ថាមពលអគ្គិសនីដើរដោយពន្លឺព្រះអាទិត្យ ) បានកៀរគរសាច់ប្រាក់ទំហំរហូតដល់ ៤៩,១៦ លានដុល្លារអាម៉េរិក ដោយមានឥណប្រតិទានរយៈពេល ១៥ ឆ្នាំ និងមានតម្រូវការបន្តបន្ទាប់ជាច្រើនរយលានដុល្លារអាម៉េរិកនៅឆ្នាំ ២០២៦ នេះផងដែរ ដើម្បីពង្រីកវិសាលភាពប្រតិបត្តិការ ។ ដូច្នេះ ទីផ្សារមូលបត្រកម្ពុជា ជាសមុទ្រដើមទុនមិនចេះរីងស្ងួត និងក្លាយទៅជាច្រកហិរញ្ញប្បទាន ដែលមិនអាចខ្វះរំលងសម្រាប់ប្រតិបត្តិករទូរគមនាគមន៍។
ឯកឧត្តមបន្ថែមថា កន្លងមក និយ័តករមូលបត្រកម្ពុជា និងនិយ័តករទូរគមនាគមន៍កម្ពុជា បានសហការគ្នាទប់ស្កាត់នូវការផ្សព្វផ្សាយពីផលិតផល និងសេវាកម្មពាក់ព័ន្ធនឹងមូលបត្រដែលគ្មានអាជ្ញាបណ្ណ ឬការអនុញ្ញាតពីនិយ័តករមូលបត្រកម្ពុជា តាមមធ្យោបាយ ទូរគមនាគមន៍ផ្សេងៗដូចជា គេហទំព័រ បណ្ដាញទំនាក់ទំនងសង្គម និងមធ្យោបាយទំនាក់ទំនងផ្សេងទៀត ក្នុងគោលបំណងទាក់ទាញសាធារណជនឱ្យដាក់ប្រាក់វិនិយោគ ឬធ្វើប្រតិបត្តិការជួញដូរ ខុសច្បាប់ដែលនាំឱ្យខាតបង់ថវិកា និងទ្រព្យសម្បត្តិ៕
Account
Security
Favourite Content