ភ្នំពេញ ៖ លោកជំទាវ ឌិត នីតា ប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា (CMA) នាថ្ងៃទី១៨ ខែកុម្ភៈ ឆ្នាំ២០២៦ បានដឹកនាំសហការី ព្រមទាំងតំណាងពីអង្គការ Water.org ចូលជួបសម្តែងការគួរសម និងពិភាក្សាការងារជាមួយនឹង ឯកឧត្ដមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) អំពីកិច្ចសហប្រតិបត្តិការរវាងសមាគម ធនាគារ ARDB និងអង្គការ Water.org ក៏ដូចជាគំនិតផ្តួចផ្តើមនានាជុំវិញកិច្ចការលើកកម្ពស់វិស័យទឹកស្អាត និងហិរញ្ញប្បទានបៃតងនៅកម្ពុជា សំដៅចូលរួមលើកកម្ពស់បរិយាបន្នហិរញ្ញវត្ថុ និងសម្រេចបាននូវក្របខណ្ឌគោលដៅអភិវឌ្ឍប្រកបដោយចីរភាពកម្ពុជា ឆ្នាំ២០១៦-២០៣០ របស់រាជរដ្ឋាភិបាលកម្ពុជា។

ក្នុងឱកាសនោះ លោកជំទាវប្រធានក្រុមប្រឹក្សាភិបាលសមាគម បានលើកឡើងពីសារៈសំខាន់នៃកិច្ចការលើកកម្ពស់វិស័យទឹកស្អាត និងអនាម័យ ក៏ដូចជាការជំរុញហិរញ្ញប្បទានបៃតងនៅកម្ពុជា។

លោកជំទាវបានមានប្រសាសន៍បញ្ជាក់ថា ៖

«ការពង្រឹងវិស័យទឹកស្អាត និងអនាម័យ ព្រមទាំងហិរញ្ញប្បទានបៃតង មិនត្រឹមតែចូលរួមលើកកម្ពស់សុខមាលភាពប្រជាពលរដ្ឋនៅសហគមន៍មូលដ្ឋាន និងតំបន់ដាច់ស្រយាល ក៏ដូចជាកសាងភាពធន់ទៅនឹងការប្រែប្រួលអាកាសធាតុសម្រាប់សហគ្រាស និងសហគមន៍ប៉ុណ្ណោះទេ ប៉ុន្តែការងារនេះក៏នឹងចូលរួមចំណែកយ៉ាងសំខាន់ក្នុងការពង្រឹងបរិយាបន្នហិរញ្ញវត្ថុនៅកម្ពុជាផងដែរ»។

បន្ថែមពីលើនេះ លោកជំទាវក៏បានស្នើសុំកិច្ចសហការ និងការគាំទ្រពីធនាគារ ARDB ដើម្បីកសាងសមត្ថភាពដល់មន្រ្តីគ្រឹះស្ថានហិរញ្ញវត្ថុ ជាពិសេស សមាជិករបស់សមាគម ពាក់ព័ន្ធនឹងវិស័យទឹកស្អាត និងអនាម័យ ក៏ដូចជាហិរញ្ញប្បទានបៃតង។

ឯកឧត្ដមបណ្ឌិត កៅ ថាច បានលើកឡើងថា ធនធានទឹកពិតជាមានសារៈសំខាន់ណាស់ក្នុងការទ្រទ្រង់ដល់វិស័យកសិកម្ម និងជីវភាពរស់នៅរបស់ប្រជាជន ដែលជាកត្តាចម្បងក្នុងការគាំទ្រដល់ការរក្សាបាននូវសន្តិសុខស្បៀង, ការបង្កើនប្រាក់ចំណូលបន្ថែម, និងការបន្ស៊ាំទៅនឹងការប្រែប្រួលអាកាសធាតុ។

ឯកឧត្តមបណ្ឌិតប្រតិភូ បានកត់សម្គាល់ឃើញថា គម្រោងរបស់អង្គការ Water.org និងសមាគមមីក្រូហិរញ្ញវត្ថុកម្ពុជា (CMA)ពិតជាមានសារៈសំខាន់ និងមានភាពជាប់ពាក់ព័ន្ធទៅនឹងហិរញ្ញប្បទានបៃតង ជាពិសេស គាំទ្រដល់សមត្ថភាពបន្ស៊ាំនឹងការប្រែប្រួលអាកាសធាតុ ដែលស្របតាមយុទ្ធសាស្ត្ររយៈពេលវែងរបស់ធនាគារ ARDB តាមរយៈការអនុវត្តកម្មវិធីហិរញ្ញប្បទានអាកាសធាតុនៅកម្ពុជា (Cambodia Climate Finance Facility-CCFF) ដែលជាកម្មវិធីថ្នាក់ជាតិមានហិរញ្ញប្បទានសរុបប្រមាណ ១០០លានដុល្លារអាម៉េរិក និងទទួលបានការអនុម័តពីមូលនិធិអាកាសធាតុបៃតងនៅប្រទេស Rwanda សម្រាប់ផ្តល់ហិរញ្ញប្បទានគាំទ្រដល់គម្រោងបៃតង និងគ្រឹះស្ថានហិរញ្ញវត្ថុក្នុងស្រុក លើគម្រោងអាជីវកម្មដែលកាត់បន្ថយការបំភាយឧស្ម័នផ្ទះកញ្ចក់ និងបង្កើនសមត្ថភាពបន្ស៊ាំទៅនឹងការប្រែប្រួលអាកាសធាតុ។

គួរបញ្ជាក់ដែរថា បច្ចុប្បន្ននេះ ក្រោមកិច្ចសហការយ៉ាងជិតស្និទ្ធជាមួយនឹងដៃគូ សមាគម បាន និងកំពុងអនុវត្តគម្រោងធំៗចំនួន២ ពាក់ព័ន្ធនឹងវិស័យទឹកស្អាត និងអនាម័យ និងការលើកកម្ពស់ហិរញ្ញប្បទានបៃតង រួមមាន គម្រោងឥណទានទឹកស្អាត និងអនាម័យ (WCAD) មានគោលដៅលើកកម្ពស់លទ្ធភាពទទួលបានហិរញ្ញប្បទានសម្រាប់ការផ្គត់ផ្គង់ទឹកស្អាត និងអនាម័យ និងគម្រោងភាពធន់នឹងអាកាសធាតុសម្រាប់ទាំងអស់គ្នា (CREFA) ដែលមានគោលដៅកាត់បន្ថយភាពងាយរងគ្រោះនៃបម្រែបម្រួលអាកាសធាតុនៅកម្ពុជាដោយផ្តោតលើការកសាងសមត្ថភាពសម្រាប់ការកាត់បន្ថយការប្រែប្រួលអាកាសធាតុ ការបន្សាំ និងការអភិវឌ្ឍប្រកបដោយចីរភាព។

ជាមួយគ្នានេះ សមាគមមីក្រូហិរញ្ញវត្ថុកម្ពុជាណ(CMA) ធនាគារអភិវឌ្ឍន៍ជនបទ និងកសិកម្ម (ARDB) និងអង្គការ Water.Org បានប្តេជ្ញាចិត្តរួមគ្នាដើម្បីជំរុញហិរញ្ញវត្ថុបៃតង វិស័យទឹកស្អាត និងអនាម័យនៅកម្ពុជា ស្របតាមក្របខណ្ឌ និងទិសដៅអភិវឌ្ឍន៍របស់រាជរដ្ឋាភិបាលកម្ពុជា។

ដោយឡែក កាលពីឆ្នាំ២០២៥កន្លងទៅនេះ គម្រោងឥណទានទឹកស្អាត និងអនាម័យ (WCAD) ដែលផ្តួចផ្តើមឡើងដោយសមាគមមីក្រូហិរញ្ញវត្ថុកម្ពុជា ដែលទទួលបានការគាំទ្រថវិកាពីអង្គការ Water.Org បានពង្រីកវិសាលភាពដើម្បីគាំទ្រផ្នែកហិរញ្ញប្បទានដល់ប្រជាពលរដ្ឋកម្ពុជា ជាពិសេសនៅតំបន់ជនបទ និងសហគមន៍មូលដ្ឋាននៅកម្ពុជា។ តាមរយៈការផ្តល់ឥណទានប្រកបដោយទំនួលខុសត្រូវ និងកិច្ចការពារ គម្រោង WCAD បានចូលរួមចំណែកលើកកម្ពស់គុណភាពជីវិត និងសុខមាលភាពរបស់ប្រជាពលរដ្ឋនៅសហគមន៍មូលដ្ឋាន ជាពិសេសចូលរួមកាត់បន្ថយការចំណាយក្នុងគ្រួសារ និងហានិភ័យនានាដែលបណ្តាលមកពីកង្វះខាតទឹកស្អាត និងអនាម័យ។ ក្រៅពីនេះ ដោយមានការចូលរួមជំរុញនូវដំណោះស្រាយផ្នែកហិរញ្ញវត្ថុប្រកបដោយចីរភាព គម្រោង WCAD នឹងបន្តគាំទ្រដល់វឌ្ឍនភាពរបស់កម្ពុជាដើម្បីសម្រេចបាននូវគោលដៅ និងអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ​ ក៏ដូចជាការអភិវឌ្ឍប្រកបដោយបរិយាបន្ន៕