សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានថ្លែងឱ្យដឹងថា ពងទាកូនរបស់ខេត្តតាកែវ នឹងត្រូវដាក់បញ្ចូលទៅក្នុងសំណុំនៃការដេញថ្លៃផលិតផលកសិកម្មក្នុងស្រុកក្នុងពេលឆាប់ៗ ដើម្បីទទួលបានការចុះបញ្ជីម៉ាកសម្គាល់ភូមិសាស្រ្ត (GI) ។
ឯកឧត្តម កៅ ផល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានលើកឡើងដូច្នេះក្នុងឱកាសកិច្ចប្រជុំស្តីពីការប្រើប្រាស់ជីសរីរាង្គដែលផលិតចេញពីរោងចក្រជីវឧស្ម័ននៅមន្ទីរកសិកម្មខេត្តតាកែវ កាលពីថ្មីៗនេះ ។
ឯកឧត្តម អនុរដ្ឋលេខាធិការ បានមានប្រសាសន៍ថា បន្ទាប់ពីទទួលបានជោគជ័យក្នុងការចុះបញ្ជីម៉ាកសញ្ញាសម្គាល់ភូមិសាស្ត្រ (GI) សម្រាប់ផលិតផលបង្កងខេត្តតាកែវ ដែលនាំឱ្យតម្លៃទីផ្សារកើនឡើងនោះ ក្រសួងកសិកម្ម សហការជាមួយអាជ្ញាធរខេត្តតាកែវ សិក្សាពីលទ្ធភាពនៃការចុះបញ្ជីពាណិជ្ជសញ្ញា GI សម្រាប់ពងទាកូនពីឃុំស្រែរនោង ស្រុកត្រាំកក់។ ការចុះបញ្ជីម៉ាកសញ្ញាសម្គាល់ភូមិសាស្ត្រ (GI) សម្រាប់ពងទាកូនឃុំស្រែរនោង នឹងត្រូវដាក់ជូនពាក្យស្នើសុំទៅក្រសួងពាណិជ្ជកម្មនាពេលឆាប់ៗខាងមុខ។
សូមជម្រាបថា ការចុះបញ្ជីម៉ាកសម្គាល់ភូមិសាស្រ្ត (Geographical Indication Status-GI) គឺជាទម្រង់នៃកម្មសិទ្ធិបញ្ញាដែលការពារ និងទទួលស្គាល់ផលិតផលដែលភ្ជាប់ទៅនឹងតំបន់ភូមិសាស្ត្រជាក់លាក់ ធានាគុណភាព ឬកេរ្តិ៍ឈ្មោះរបស់ផលិតផល ការពារអ្នកផលិតពីការប្រើប្រាស់ខុស ឬការធ្វើតាមផលិតផលរបស់អ្នកដទៃ។
គួររំលឹកថា កាលពីពេលថ្មីៗនេះ ឯកឧត្តម វ៉៉ី សំណាង អភិបាលខេត្តតាកែវ ក្នុងឱកាសចុះសំណេះសំណាលជាមួយបងប្អូនប្រជាពលរដ្ឋនៅក្នុងសហគមន៍ភ្ញាស់ពងទាកូន ស្រែរនោង ស្ថិតនៅឃុំស្រែរនោង ស្រុកត្រាំកក់ បានលើកទឹកចិត្តដល់សហគមន៍បន្តបង្កើនការផលិតពងទា ដើម្បីឆ្លើយតបនឹងតម្រូវការទីផ្សារក្នុងស្រុក ទន្ទឹមនឹងការរក្សានូវវិធីសាស្រ្តប្រពៃណីនៃការភ្ញាស់ពងទាតាមបែបធម្មជាតិ។
ឯកឧត្តម វ៉ី សំណាង បានគូសបញ្ជាក់ថា៖ ក្រៅពីបង្កងតាកែវ ពងទាកូនតាកែវត្រូវបានគេស្គាល់យ៉ាងទូលំទូលាយ និងមានការកោតសរសើរនៅទូទាំងប្រទេសចំពោះរសជាតិឆ្ងាញ់ និងគុណភាពធម្មជាតិ ។ ដូច្នេះ សហគមន៍ត្រូវបន្តភ្ញាស់ពងទាឱ្យបានច្រើន ដើម្បីផ្គត់ផ្គង់ទីផ្សារ។ នេះនឹងមិនត្រឹមតែបំពេញតម្រូវការអ្នកប្រើប្រាស់ប៉ុណ្ណោះទេ ប៉ុន្តែថែមទាំងជួយលើកកម្ពស់ជីវភាពរស់នៅរបស់អ្នកស្រុកផងដែរ។
សូមបញ្ជាក់ថា សហគមន៍ភ្ញាស់ពងទាស្រែរនោង បច្ចុប្បន្នដំណើរការទីតាំងភ្ញាស់ចំនួន ២២កន្លែង ដែលក្នុងនោះមាន ៣កន្លែង ប្រើអង្កាមសម្រាប់ភ្ញាស់បែបធម្មជាតិ កន្លែងភ្ញាស់ពាក់កណ្តាលស្វ័យប្រវត្តិចំនួន ៧កន្លែង និងកន្លែងប្រើវិធីសាស្ត្រភ្ញាស់ដោយខ្សែភ្លើងចំនួន ១២កន្លែង។ កសិដ្ឋានទាំងនេះផលិតពងទាពី ២០០,០០០ ទៅ ២៥០,០០០ គ្រាប់ក្នុងមួយថ្ងៃ។ នៅទូទាំងខេត្តតាកែវ កន្លែងចិញ្ចឹមទាទាំងតាមបែបគ្រួសារ និងតាមបែបកសិដ្ឋាន និងមានកន្លែងភ្ញាស់កូនទាសរុបចំនួន ៧៤ កន្លែង។
Account
Security
Favourite Content