សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
យោងតាមការស្រាវជ្រាវថ្មីមួយបានបង្ហាញថា ប្រជាជនអាម៉េរិកប្រហែល ១៥ លាននាក់ ត្រូវបានបោកប្រាស់លុយកាក់តាមប្រព័ន្ធអនឡាញ ឬ online scam កាលពីឆ្នាំ ២០២៥ កន្លងទៅ ដោយក្នុងនោះមានចំណែកគួរឱ្យកត់សម្គាល់នៃករណីឆបោក គឺជាការប្រើប្រាស់មាតិកា ដែលបង្កើតឡើងដោយបច្ចេកវិទ្យាបញ្ញាសិប្បនិម្មិត AI និងបច្ចេកវិទ្យាក្លែងបន្លំរូបភាព/សំឡេងដែលយើងស្គាល់ថាជា Deepfakes។
កាសែត RT បានដកស្រង់របាយការណ៍ដោយផ្អែកតាមការអង្កេតនិងស្ទាបស្ទង់របស់ស្ថាប័ន Gallup។ របាយការណ៍ បានបង្ហាញថា មនុស្សពេញវ័យនៅសហរដ្ឋអាម៉េរិកប្រមាណ ១៥ លាននាក់ បានរងគ្រោះដោយសារល្បិចបោកប្រាស់តាមទម្រង់ផ្សេងៗគ្នាក្នុងឆ្នាំ ២០២៥ កន្លងមក។ ទំហំនៃការខាតបង់សរុបនៅទូទាំងប្រទេសបានឈានដល់ប្រមាណ ៦៨ ពាន់លានដុល្លារកាលពីឆ្នាំមុន ឬស្មើនឹងប្រហែល ១៨៦ លានដុល្លារជារៀងរាល់ថ្ងៃ។
លទ្ធផលទាំងនេះត្រូវបានដកស្រង់ចេញពីរបាយការណ៍មួយដែលមានឈ្មោះថា សហរដ្ឋអាម៉េរិកនៃល្បិចឆបោកឬ United States of Scams: The Financial and Emotional Fallout និងត្រូវបានយកមកចេញផ្សាយកាលពីដើមសប្តាហ៍មុន ដោយស្ថាប័ន Gallup និងសម្ព័ន្ធបញ្ឈប់ការឆបោក Stop Scams Alliance តាមរយៈការអង្កេតលើមនុស្សពេញវ័យនៅអាម៉េរិក ប្រមាណជាជាង ៥០០០ នាក់។
ក្នុងចំណោមនោះ គេសង្កេតឃើញថា អ្នកចូលរួម ៦ ភាគរយ បាននិយាយថា ខ្លួនពួកគេផ្ទាល់ធ្លាប់ត្រូវបានគេបោកប្រាស់ អ្នកចូលរួម ៤ ភាគរយផ្សេងទៀត បានបញ្ជាក់ថា សមាជិកនៅក្នុងគ្រួសាររបស់ពួកគេក៏ធ្លាប់ទទួលរងគ្រោះ។ ជាសរុប មានប្រជាជន ២៤ ភាគរយ ធ្លាប់រងការបោកប្រាស់ ក្នុងអំឡុងពេលក្លាយជាមនុស្សពេញវ័យ ដោយក្នុងនោះ ១០ ភាគរយ បានក្លាយជាជនរងគ្រោះច្រើនជាងមួយលើក។
ប្រភពដដែល បានបញ្ជាក់ទៀតថា មានករណីច្រើនជាងម្នាក់ក្នុងចំណោមដប់នាក់ ឬប្រហែលជា ១២ ភាគរយ បាននិយាយថា ការបោកប្រាស់លើពួកគេមានការពាក់ព័ន្ធនឹងបច្ចេកវិទ្យា AI ឬ Deepfake។
ទោះជាយ៉ាងណាក៏ដោយ អ្នករៀបចំការស្ទាបស្ទង់ បានកត់សម្គាល់ថា តួលេខនេះអាចច្រើនជាងការពិតជាក់ស្តែង ដោយសារតែមាតិកាដែលបង្កើតឡើងដោយ AI គឺមានការលំបាកខ្លាំងណាស់សម្រាប់ជនរងគ្រោះក្នុងការមើលឃើញជាមុន ឬចាប់សម្គាល់ដឹងថា ជាការបោកប្រាស់។
គួរឱ្យដឹងដែរថា ការបោកប្រាស់ដែលជំនួយដោយបច្ចេកវិទ្យា AI បានស្តែងឡើងក្នុងទម្រង់ជាច្រើនក្នុងរយៈពេលប៉ុន្មានឆ្នាំចុងក្រោយនេះ រួមមានការបោកប្រាស់ដោយការក្លែងបន្លំសំលេង (Voice-cloning) ដូចជាការត្រាប់តាមសំឡេងសាច់ញាតិ ឬថ្នាក់ដឹកនាំក្នុងគ្រាប្រទេសកំពុងជួបអាសន្ន, ការបោកប្រាស់ផ្នែកមនោសញ្ចេតនាឬ Romance scams ដោយប្រើប្រាស់ប្រវត្តិរូប និងរូបថតដែលបង្កើតឡើងដោយ AI, និងការប្រើប្រាស់វីដេអូ Deepfake ក្នុងពេលភ្លាមៗ ឬ Real-time នៅក្នុងការបោកប្រាស់កម្រិតខ្ពស់៕
Account
Security
Favourite Content