សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កម្ពុជា បានបង្កើតតំបន់សេដ្ឋកិច្ចពិសេសជាបន្តបន្ទាប់ ដើម្បីទាក់ទាញការវិនិយោគទាំងក្នុង និងក្រៅប្រទេស ជាពិសេសលើវិស័យឧស្សាហកម្ម ហើយជាការកត់សម្គាល់ចាប់តាំងពីរាជរដ្ឋាភិបាលបានបង្កើតតំបន់សេដ្ឋកិច្ចពិសេសទាំងនៅភ្នំពេញ និងនៅតាមបណ្ដាខេត្តឃើញថាមានការបណ្ដាក់ទុនជាហូរហែរនៅក្នុងតំបន់សេដ្ឋកិច្ចពិសេសទាំងនោះ ជាក់ស្ដែងគិតត្រឹមពេលនេះ មានគម្រោងវិនិយោគសរុបជាង៧០០គម្រោង បានបោះទុនវិនិយោគជាទឹកប្រាក់ប្រមាណ ២៨ពាន់លានដុល្លារអាមេរិក។
យោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា បច្ចុប្បន្ន កម្ពុជាមានតំបន់សេដ្ឋកិច្ចពិសេសចំនួន២៦តំបន់ កំពុងដំណើរការ ដោយបានស្រូបទាញគម្រោងវិនិយោគជាង៧០០គម្រោង បណ្ដាក់ទុនវិនិយោគក្នុងតំបន់សេដ្ឋកិច្ចទាំងនោះ និងមានទំហំទឹកប្រាក់វិនិយោគប្រមាណ ២៨ពាន់លានដុល្លារអាមេរិក បង្កើតការងារជូនប្រជាពលរដ្ឋបានជាង១៨ម៉ឺននាក់ ។
បើតាមរបាយការណ៍ដដែលបានបង្ហាញថា គម្រោងវិនិយោគធំៗមួយចំនួនត្រូវបានស្នើសុំបណ្ដាក់ទុនវិនិយោគនៅក្នុងតំបន់សេដ្ឋកិច្ច ដូចជាគម្រោងរោងចក្រដំឡើងរថយន្តម៉ាកតូយ៉ូតា នៅតំបន់សេដ្ឋកិច្ចពិសេសរ៉ូយ៉ាល់ភ្នំពេញ រោងចក្រផលិតសំបកកង់យានយន្ត នៅក្នុងសេដ្ឋកិច្ចពិសេសឈីលូជានពុចាយ ក្នុងខេត្តស្វាយរៀង និងរោងចក្រផលិតសំបកកង់យានយន្តនៅក្នុងតំបន់សេដ្ឋកិច្ចក្រុងព្រះសីហនុជាដើម ។
កាលពីថ្ងៃទី១៨ ខែសីហា ឆ្នាំ២០២៤កន្លងទៅនេះ រោងចក្រដំឡើងរថយន្តអគ្គិសនីរបស់ក្រុមហ៊ុន ហ្សូ ម៉ូធ័រ នៅក្នុងតំបន់សេដ្ឋកិច្ចពិសេស ខេត្តពោធិ៍សាត់ បានរំពឹងថាក្នុងឆ្នាំដំបូងនឹងអាចផលិតបានរថយន្តប្រមាណ៣០០០គ្រឿងសម្រាប់ផ្គត់ផ្គង់លើទីផ្សារប្រទេសកម្ពុជា ។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានមានប្រសាសន៍ក្នុងកិច្ចសម្ភាសន៍ជាមួយអ្នកសារព័ត៌មាននៅថ្ងៃទី១៨ ខែសីហា ឆ្នាំ២០២៤ ថា តំបន់សេដ្ឋកិច្ចពិសេសខេត្តពោធិ៍សាត់មិនមានអ្វីប្លែកពីតំបន់សេដ្ឋកិច្ចពិសេសផ្សេងៗទៀតក្នុងប្រទេសកម្ពុជាទេ ប៉ុន្តែអ្វីដែលប្លែកពីគេនោះគឺកំពុងទាក់ការវិនិយោគប្រភេទឧស្សាហកម្មដោយប្រើចំណេះវិជ្ជា និងជំនាញ ដូចជាការដំឡើងរថយន្តម៉ាកហ្វដ របស់សហរដ្ឋអាមេរិក រោងចក្រដំឡើងរថយន្តអគ្គិសនីហ្សូម៉ូធ័រ រោងចក្រផលិតខ្សែកាបអគ្គិសនី និងផលិតសម្ភារៈអគ្គិសនីជាដើម ។
ឯកឧត្តមបានមានប្រសាសន៍បន្ថែមថា នៅខែក្រោយនេះ ក្រុមហ៊ុនមីនីបៀក៏នឹងចាប់ផ្ដើមសាងសង់រោងចក្ររបស់ខ្លួននៅក្នុងតំបន់សេដ្ឋកិច្ចពិសេសពោធិ៍សាត់ ខណៈក្រុមហ៊ុននេះក៏មានរោងចក្រមួយហើយនៅក្នុងតំបន់សេដ្ឋកិច្ចពិសេសភ្នំពេញ ។
តាមគោលនយោបាយរបស់រាជរដ្ឋាភិបាលបានរៀបចំឱ្យបង្កើតតំបន់សេដ្ឋកិច្ចពិសេសបន្ថែមទៀត ជាពិសេស ផ្ដោតលើវិនិយោគិនមកពីប្រទេសតែមួយ ដូចជាតំបន់សេដ្ឋកិច្ចពិសេសសម្រាប់វិនិយោគិនចិន ឬតំបន់សេដ្ឋកិច្ចពិសេសសម្រាប់វិនិយោគិនជប៉ុនជាដើម ។
ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគនៃក្រុមប្រឹក្សារអភិវឌ្ឍន៍កម្ពុជាបានបង្ហាញពីសក្ដានុពលវិនិយោគនៅក្នុងប្រទេសកម្ពុជាដល់បណ្ដាវិនិយោគិនបរទេសកាលពីពេលថ្មីៗនេះ ក្នុងនោះឯកឧត្តមបានលើកឡើងថា រាជរដ្ឋាភិបាលកម្ពុជាបាន និងកំពុងយកចិត្តទុកដាក់ខ្ពស់ក្នុងការអភិវឌ្ឍវិស័យកសិកម្ម ឧស្សាហកម្ម និងបានវិនិយោគយ៉ាងច្រើនក្នុងគម្រោងហេដ្ឋារចនាសម្ព័ន្ធសំខាន់ៗដូចជា ផ្លូវល្បឿនលឿន ដែលជាយុទ្ធសាស្ត្រ ប្រទេសបូក របស់អាជីវកម្ម និងគម្រោងអភិវឌ្ឍន៍អាកាសយានដ្ឋានថ្មីៗ និងគម្រោងប្រវត្តិសាស្ត្រព្រែកជីកហ្វូណនតេជោជាដើម ដែលទាំងនេះសុទ្ធសឹងតែជាសក្ដានុពលក្នុងការទាក់ទាញវិនិយោគិនចូលមកកម្ពុជាបន្ថែម និងបណ្ដាក់ទុននៅតាមតំបន់នានាជាពិសេសតំបន់សេដ្ឋកិច្ចពិសេសជាច្រើនក្នុងប្រទេសកម្ពុជា ៕
Account
Security
Favourite Content