សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ព្រះសីហនុ ៖ ចាប់តាំងពីរាជរដ្ឋាភិបាលកម្ពុជាបានដាក់ចេញនូវវិធានការជំរុញ និងលើកទឹកចិត្តដល់អ្នកវិនិយោគនៅក្នុងខេត្តព្រះសីហនុចាប់តាំងពីឆ្នាំ២០២៤រហូតមកឃើញថា មានក្រុមហ៊ុនទាំងក្នុងស្រុក និងបរទេសជាច្រើនបានចូលមកសិក្សាស្វែងយល់ពីសក្ដានុពលវិនិយោគនៅក្នុងខេត្តមួយនេះជាបន្តបន្ទាប់ ជាក់ស្ដែងនៅក្នុងសប្ដាហ៍នេះ មានក្រុមហ៊ុនដ៏ធំមួយរបស់កូរ៉េបានបង្ហាញពីគម្រោងបង្កើតរោងចក្រកែច្នៃសំណល់ប្លាស្ទិកទៅជាប្រេងឥន្ធនៈអាចប្រើប្រាស់មានទីតាំងនៅក្នុងស្រុកព្រៃនប់ ខេត្តព្រះសីហនុ ។
នៅក្នុងជំនួបជាមួយឯកឧត្តម ឡុង ឌីម៉ង់ អភិបាលរងខេត្តព្រះសីហនុ កាលពីពេលថ្មីៗនេះ ក្រុមហ៊ុន Daehan របស់កូរ៉េ បានបង្ហាញពីបំណងរបស់ខ្លួនក្នុងការបង្កើតរោងចក្រកែច្នៃសំណល់ប្លាស្ទិកទៅជាប្រេងឥន្ធនៈអាចប្រើប្រាស់ ។
លោក Kim Jung Hwan នាយកប្រតិបត្តិក្រុមហ៊ុន Daehan Corporation ប្រទេសកូរ៉េ បានឱ្យដឹងថា ក្រុមហ៊ុនរបស់លោកមានបំណងមកកែច្នៃសំណល់ប្លាស្ទិកទៅជាឥន្ធនៈនេះ នៅទីលានចាក់សំរាម ស្រុកព្រៃនប់ ដែលទីលានចាក់សំរាមមួយនេះ អាចទទួលបានសំរាមបានរហូតដល់ចន្លោះពី៦០០តោន ទៅ ៧០០តោនក្នុងមួយថ្ងៃ ។
សូមរំលឹកថា ខេត្តព្រះសីហនុ ជាខេត្តមួយស្ថិតនៅក្នុងគម្រោងអភិវឌ្ឍន៍របស់រាជរដ្ឋាភិបាលកំណត់ជាតំបន់ប៉ូលអាទិភាពក្នុងការអភិវឌ្ឍ ដោយក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលបានចំណាយទុនរាប់រយលានដុល្លារអាមេរិកក្នុងការរៀបចំហេដ្ឋារចនាសម្ព័ន្ធ ផ្លូវ ទឹក ភ្លើង និងប្រព័ន្ធលូ ដើម្បីធ្វើយ៉ាងណាឱ្យខេត្តមួយនេះមានភាពទាក់ទាញ។ ដោយឡែកតាមរយៈវិធានការជំរុញការវិនិយោគក្នុងខេត្តព្រះសីហនុដែលបានដាក់ចេញដោយរាជរដ្ឋាភិបាល គិតត្រឹមដើមខែតុលា ឆ្នាំ២០២៤នេះ មានក្រុមហ៊ុនជាច្រើនបានដាក់ពាក្យស្នើសុំវិធានការលើកទឹកចិត្តវិនិយោគលើគម្រោងសរុបចំនួន ១៧៣ ដោយក្នុងនោះគម្រោងដែលទទួលបានលិខិតអនុញ្ញាតជាគោលការណ៍មានចំនួន ១៣៩ គម្រោង។
លោក សៅ ហុក ប្រធានសាខាក្រុមហ៊ុន KW Cambodia ប្រចាំខេត្តព្រះសីហនុ បានថ្លែងប្រាប់ ASM Economy ឱ្យដឹងថា ជាការកត់សម្គាល់ ក្នុងឆ្នាំ២០២៤នេះ ចាប់តាំងពីរាជរដ្ឋាភិបាលបានដាក់ចេញនូវវិធានការជំរុញការវិនិយោគនៅក្នុងខេត្តព្រះសីហនុរហូតមកឃើញថា មានគម្រោងវិនិយោគជាច្រើនចាប់ផ្ដើមបោះទុនវិនិយោគពិតមែន។
យ៉ាងណាក៏ដោយលោកបានបញ្ជាក់ថា ថ្វីត្បិតថាការវិនិយោគទាំងនេះមានសកម្មភាពឡើងវិញក្ដី ប៉ុន្តែវានៅតែមិនទាន់អាចប្រសើរដូចកាលមុនវិបត្តិកូវីដ១៩នៅឡើយទេ ។ ទោះជាបែបនេះក្ដី វាក៏ជាសញ្ញាវិជ្ជមានសម្រាប់ការវិនិយោគនៅក្នុងខេត្តព្រះសីហនុ ជាពិសេស គម្រោងដែលធ្លាប់ជាប់គាំងកន្លមកក៏មានសកម្មភាពឡើងជាបន្តបន្ទាប់ដែរ ៕
Account
Security
Favourite Content