សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សំណង់អគារបុរាណចាស់ៗដែលគិតថាប្រើប្រាស់មិនកើត តែបាន និងកំពុងទាក់ទាញភ្ញៀវទេសចរជាតិ និងអន្តរជាតិ ក៏ដូចជាលើកកម្ពស់សម្រស់ក្រុងកំពតបានមួយកម្រិតទៀតក្រោយពីសំណង់អគារចាស់ៗទាំងនេះត្រូវបានកែលម្អទៅជាថ្មី ។
សំណង់អគារបុរាណចាស់ៗដែលគេទុកចោលខ្លះមាន១០ឆ្នាំ ខ្លះជាង១០ឆ្នាំ ត្រូវបានម្ចាស់អគារ ឬក៏វិនិយោគិនយកមកកែច្នៃធ្វើជាផ្ទះស្នាក់នៅ បើកអាជីវកម្ម ដូចជាហាងកាហ្វេ ភោជនីយដ្ឋាន និងភោជនីយដ្ឋានពេលរាត្រី បាន និងកំពុងទទួលបានការចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរជាតិ ជាក់ស្ដែងដូចជាហាងកាហ្វេល្បីឈ្មោះពីសហរដ្ឋអាមេរិក Starbucks បានយកអគារចាស់ដែលគេគិតថាប្រើប្រាស់មិនកើតមកកែច្នៃ លាបពណ៌ កែកុន និងបានក្លាយទៅជាហាងកាហ្វេមួយដ៏ប្រណិត និងទាក់ទាញភ្ញៀវទេសចរមកលេងកម្សាន្ត និងពិសាកាហ្វេនៅតាមមាត់ព្រែក ។
បើតាមលោក ជិន ណារិន ភ្នាក់ងារអចលនទ្រព្យប្រចាំខេត្តកំពតមួយរូបបានឱ្យដឹងថា ជាការពិតណាស់ នៅតាមដងព្រែកកំពត ក្នុងក្រុងកំពត មានសំណង់អគារចាស់ៗសល់តាំងពីជំនាន់បារាំងមកច្រើន ហើយអគារទាំងនោះក៏ត្រូវរដ្ឋបាលខេត្តរក្សាទុក និងឱ្យវិនិយោគិនកែច្នៃទៅជាហាងកាហ្វេ ភោជនីយដ្ឋាន កន្លែងកម្សាន្តពេលរាត្រីជាដើម ធ្វើឱ្យសំណង់អគារទាំងនោះមើលទៅដូចជាអគារថ្មី មានរចនាបថដូចសំណង់សម័យបុរាណ ជាពិសេសសម័យបារាំង ។
លោកបន្តថា មែនទែនទៅ ការយកសំណង់អគារចាស់ៗមកកែច្នៃ ក៏ត្រូវចំណាយថ្លៃដូចនឹងការសាងសង់ហាងថ្មីដែរ ប៉ុន្តែដើម្បីជាការទាក់ទាញភ្ញៀវទេសចរជាតិ និងអន្តរជាតិមកលេងកម្សាន្តនៅក្នុងខេត្តកំពតបន្ថែម មានតែការយកអគារចាស់ៗមកកែច្នៃថ្មី ហើយបើកអាជីវកម្មទាំងនោះ ទើបមានភ្ញៀវមកលេងច្រើន។
លោកបន្តថា តាមរយៈសំណង់អគារចាស់ៗដែលគេយកមកកែច្នៃថ្មីនេះដែរ ក៏បានជួយលើកសម្រស់ក្រុងកំពតបានមួយកម្រិត និងធ្វើឱ្យតំបន់ដែលសំបូរអគារចាស់ៗនោះ ក្លាយជាតំបន់ពាណិជ្ជកម្ម និងទាក់ទាញភ្ញៀវមកកម្សាន្តច្រើន ជាពិសេសចាប់តាំងពីរដ្ឋបាលខេត្តកំពតបានដាក់ឱ្យដំណើរការនូវរូបសំណាកសេះសមុទ្របាញ់ទឹក និងសមិទ្ធផលមួយចំនួនទៀតក្នុងខេត្តកំពត ។
គួររំលឹកថា រាជរដ្ឋាភិបាលកម្ពុជាបានយកចិត្តទុកដាក់ក្នុងការអភិវឌ្ឍខេត្តកំពតជាខេត្តគោលដៅមួយក្នុងចំណោមបណ្ដាខេត្តជាប់តំបន់ឆ្នេរ ដោយបានអភិវឌ្ឍន៍ហេដ្ឋារចនាសម្ព័ន្ធ តភ្ជាប់ពីរាជធានីភ្នំពេញ និងបណ្ដាខេត្តដទៃទៀតទៅកាន់ខេត្តកាន់តែប្រសើរ ដូចជាផ្លូវជាតិលេខ៣ ផ្លូវជាតិលេខ៣៣ ផ្លូវជាតិលេខ៣១ និងផ្លូវជាតិលេខ៤១ ជាដើម ។
ថ្មីៗនេះដែរ កំពង់ផែពហុបំណងក្នុងខេត្តកំពតក៏ត្រូវបានសម្ពោធដាក់ឱ្យដំណើរការជាផ្លូវការ ហើយតាមរយៈកំពង់ផែនេះដែរនឹងធ្វើឱ្យសក្ដានុពលនៃខេត្តកំពតកាន់តែមានភាពប្រសើរឡើងបន្ថែមមួយកម្រិតទៀត ៕
Account
Security
Favourite Content