សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ម្ចាស់តំបន់សេដ្ឋកិច្ចពិសេសមេនហាតធេន ស្ថិតក្នុងក្រុងបាវិត ខេត្តស្វាយរៀង បានប្រកាសពីគម្រោងអភិវឌ្ឍន៍លំនៅឋានតម្លៃសមរម្យចំនួន១០០០ខ្នងក្នុងមួយឆ្នាំ ខណៈដែលជំហានដំបូងគ្រោងអភិវឌ្ឍន៍៤០០ខ្នង/ល្វែង ហើយនឹងឈានដល់ ១០០០ខ្នង/ល្វែង នៅឆ្នាំបន្តបន្ទាប់ ។ នេះ បើតាមអ្វីដែលម្ចាស់តំបន់សេដ្ឋកិច្ចពិសេសនេះ បានជម្រាបជូនសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាកាលពីពេលថ្មីៗនេះ ។
សម្ដេចតេជោ ហ៊ុន សែន បានបង្ហាញពីការអបអរសាទរចំពោះគម្រោងវិនិយោគរបស់ម្ចាស់តំបន់សេដ្ឋកិច្ចពិសេសមេនហាតធេនខាងលើនេះ ខណៈដែលកម្មករ កម្មការិនី ក៏ដូវចជាអ្នកមានចំណូលទាប និងមធ្យមនៅក្នុងក្រុងបាវិត អាចសន្សំលុយទុកទិញផ្ទះសម្រាប់ស្នាក់នៅ។
ជាមួយគ្នានេះ សម្ដេចតេជោក៏បានជំរុញ និងលើកទឹកចិត្តដល់វិនិយោគិនក្នុងស្រុក ក៏ដូចជាបរទេសមកបណ្ដាក់ទុនវិនិយោគលើគម្រោងលំនៅឋានតម្លៃសមរម្យនៅក្នុងប្រទេសកម្ពុជាកាន់តែច្រើន ដើម្បីជួយសម្រួលដល់ប្រជាពលរដ្ឋដែលមានចំណូលទាប និងមធ្យមក៏ដូចជាមន្ត្រីរាជការអាចមានលទ្ធភាពក្នុងការទិញស្នាក់នៅបាន។
លោក ឌឹត ចណ្ណា អគ្គនាយកក្រុមហ៊ុន អចលនទ្រព្យឡាក់គី បានលើកឡើងថា ការអភិវឌ្ឍផ្លូវល្បឿនលឿននឹងផ្ដល់សក្ដានុពលដល់តំបន់ដើមផ្លូវ និងចុងផ្លូវ ជាក់ស្ដែងផ្លូវល្បឿនលឿនភ្នំពេញ-ក្រុងព្រះសីហនុ បានផ្ដល់សក្ដានុពលវិនិយោគ និងពាណិជ្ជកម្ម នៅភ្នំពេញ និងក្រុងព្រះសីហនុ ហើយផ្លូវល្បឿនលឿនភ្នំពេញ -បាវិត ក៏នឹងផ្ដល់សក្ដានុពលវិនិយោគនៅតំបន់បាវិតដែលជាតំបន់ចុងផ្លូវ។
លោកបន្តថា នៅពេលមានផ្លូវល្បឿនលឿនកាន់តែច្រើន នោះការវិនិយោគនៅដើមផ្លូវ និងចុងផ្លូវក៏កាន់តែច្រើនដូចគ្នា ពីព្រោះពេលផ្លូវសាងសង់រួច ការធ្វើដំណើររបស់អ្នកវិនិយោគ ទេសចរ និងប្រជាពលរដ្ឋកាន់តែលឿន ចំណាយកាន់តែអស់តិច ដែលងាយស្រួលក្នុងការសិក្សាគម្រោងវិនិយោគរបស់ពួកគេ ។
បើតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញឱ្យដឹងថា ក្នុងឆ្នាំ២០២៣នេះ ខេត្តស្វាយរៀង ជាពិសេសក្រុងបាវិត បានទទួលគម្រោងវិនិយោគជាច្រើន ជាពិសេសគម្រោងវិនិយោគលើឧស្សាហកម្ម ដែលគម្រោងទាំងនេះបានផ្ដល់ឱកាសការងារដល់ពលរដ្ឋក្នុងតំបន់កាន់តែច្រើន ជាមួយប្រាក់កម្រៃបន្ថែមកាន់តែច្រើនជាងមុនផងដែរ។
ជាមួយគ្នានេះ នៅពេលផ្លូវល្បឿនលឿនភ្នំពេញ-បាវិត សាងសង់រួចរាល់គេជឿថា តំបន់ប៉ែកខាងកើតនៃប្រទេសកម្ពុជា ជាពិសេសក្នុងក្រុងបាវិត នឹងទទួលបានការវិនិយោគកាន់តែច្រើនឡើងបន្ថែម ស្របនឹងតំបន់នេះក៏កំពុងមានការកែប្រែពីតំបន់សេដ្ឋកិច្ចពិសេសធម្មតាទៅជាតំបន់ឧស្សាហកម្មបច្ចេកវិទ្យាជាន់ខ្ពស់ និងប្រើប្រាស់ថាមពលបៃតង ដែលសកម្មភាពនេះនឹងទាក់ទាញនូវវិនិយោគិនមកពីបណ្ដាប្រទេសនានា ចូលទៅដាក់ទុនវិនិយោគថែមទៀត។
រាជរដ្ឋាភិបាលក៏មានគម្រោងសង់ផ្លូវល្បឿនលឿនក៏ដូចជាផ្លូវជាតិសំខាន់ៗជាបន្តបន្ទាប់ទៀត ដើម្បីជំរុញកំណើនសេដ្ឋកិច្ចទាក់ទាញការវិនិយោគិន និងទេសចរណ៍ ជាពិសេសសម្រួលដល់ការធ្វើដំណើររបស់ប្រជាពលរដ្ឋពីតំបន់មួយទៅតំបន់មួយកាន់តែច្រើន និងប្រើប្រាស់ពេលវេលាកាន់តែខ្លី។ ក្នុងនោះផ្លូវជាតិ១០តភ្ជាប់ពីខេត្តបាត់ដំបង, ពោធិ៍សាត់ និងខេត្តកោះកុង ធ្វើឱ្យពលរដ្ឋពីខេត្តបាត់ដំបង និងកោះកុង អាចឆ្លងទៅវិញទៅមកដោយមិនចាំបាច់ធ្វើដំណើរមកកាន់រាជធានីភ្នំពេញទៀតឡើយ ដែលផ្លូវនេះដែរអាចចំណេញពេលរហូតទៅដល់ ៤ ឬ ៥ ម៉ោង ៕
Account
Security
Favourite Content