ភ្នំពេញ ៖ មន្ត្រីជាន់ខ្ពស់​រាជរដ្ឋាភិបាលកម្ពុជា​មួយរូប ឯកឧត្តម​ ស៊ុន ចាន់ថុល ឧប​នាយករដ្ឋមន្ត្រី និង​ជា​អ​នុ​ប្រធា​នទី​១​ ក្រុមប្រឹក្សាអភិវឌ្ឍន៍កម្ពុជា បានដឹក​នាំ​ប្រតិភូ​វិនិយោគិន​កម្ពុជា​ទៅកាន់​សហរដ្ឋអាមេរិក ដើម្បី​ទាក់​ទា​ញ​​វិនិយោគិនអាមេរិកចូលមកវិនិយោគ​នៅក្នុង​ប្រទេសកម្ពុជា។​ នៅក្នុងដំណើរ​បេសកកម្ម​របស់​មន្ត្រីជាន់ខ្ពស់​កម្ពុជា​ និង​ប្រតិភូ​ទៅកាន់អាមេរិកលើកនេះ អ្នក​វិនិ​យោ​គ​ក្នុង​ស្រុក​រំពឹងថា​នឹង​ទទួលបាន​ការ​វិនិយោគពីអាមេរិក​បន្ថែមទៀត ទាំងវិស័យឧស្សាហកម្ម ក៏ដូចជាវិស័យអចលនទ្រព្យផងដែរ​។​

អ្នកឧកញ៉ា​ បណ្ឌិត សំ សុខនឿន​ ប្រធាន​សមាគមអចលនទ្រព្យ​សកល និងជា​អគ្គ​នាយកក្រុមហ៊ុន​ KW Sam SN Realty បានមានប្រសាសន៍ថា​ បេសកកម្ម​របស់​ឯកឧត្តម​ឧបនាយករដ្ឋមន្ត្រី ស៊ុន ចាន់ថុល​ និងប្រតិភូគឺជា​បេសកកម្ម​មួយ​ដ៏មានសារ​សំខាន់​​ក្នុងការ​កៀរគរ​វិនិយោគិនអាមេរិក ចូលមក​បណ្ដាក់ទុនវិនិយោគ​នៅក្នុង​ប្រទេស​កម្ពុជា  ។

អ្នកឧកញ៉ា​បន្តថា តាមការ​សង្កេត​នូវ​សកម្មភាពរបស់ឯកឧត្តម​ឧបនាយករដ្ឋមន្ត្រី ​និង​ប្រតិភូ បាននាំមកនូវ​សមិទ្ធផល​ប្រសើរមួយរួចហើយដល់​កម្ពុជា គឺការ​ចុះអនុស្សរណៈយោគ​យល់​មួយ​រវាង​សហព័ន្ធស្រូវ​អង្ករ និង​ក្រុមហ៊ុន​អាមេរិក ដែលនឹងជួយជំរុញ​វិស័យស្រូវ​អង្ករ​កម្ពុជា​បានមួយកម្រិតទៀត ។​

អ្នកឧកញ៉ា​បន្តទៀតថា​ វិនិយោគិនអាមេរិក គឺជាវិនិយោគិន​ ដែ​ល​ចូលចិត្តស្វែងរក​ការ​វិនិយោគនៅប្រទេស​ណាដែលមាន​សន្តិភាព មាន​ស្ថិរភាពសេដ្ឋកិច្ច និងការអភិវឌ្ឍ​ ។​ ជាការ​កត់​សម្គា​ល់ អ្នកឧកញ៉ា​បានមើលឃើ​ញ​ថា ក្រុមហ៊ុន​អាមេរិក​ បានចាប់អារម្មណ៍​ច្រើនលើការ​​វិនិយោគ​នៅកម្ពុជា​ ដែល​បង្ហាញឱ្យឃើញថាប្រទេស​កម្ពុជា​ជា​ប្រទេស​ដែលមានស្ថិរភាព នយោបាយ​ល្អ​ មាន​ការអភិវឌ្ឍ​ និងជា​កន្លែង​ដែលផ្ដល់ឱកាស​ដល់​ក្រុមហ៊ុន​វិនិយោគមកពីអាមេរិកផងដែរ ។ ទាំងនេះ គឺជាកត្តា​សំខាន់មួយ ដែល​ធ្វើឱ្យក្រុមហ៊ុន​​អាមេរិកអាច​នឹង​ចូលមក​បណ្ដា​ក់​ទុន​បន្ថែម​នៅ​ពេល​អនាគត ។​

បើតា​មសេចក្ដី​ប្រកាស​ព័ត៌មានរ​បស់​ក្រុមប្រឹក្សាអភិវឌ្ឍន៍​កម្ពុជា ​បានបង្ហាញពីដំណើរ​បេសកកម្ម​របស់​ ឯក​ឧ​ត្ត​ម​​ ស៊ុន ចាន់ថុល ឧបនាយករដ្ឋមន្ត្រី និងជាអនុប្រធាន​ទី១ ក្រុម​ប្រឹក្សា​អភិ​វឌ្ឍន៍​ឱ្យឃើញថា ក្នុងដំណើរ​​បេស​​ក​កម្មនេះ ឯកឧត្តម​បានជួបជាមួយ​​អ្នកវិនិយោគជាច្រើន​ និង​បាន​ចូលរួម​បើក​វគ្គសិក្ខាសាលា​ផ្សព្វ​ផ្សា​យ​ពី​ស​ក្ដា​នុ​​ពល​វិនិយោគ​នៅកម្ពុជាដល់​បណ្ដា​វិនិ​យោ​គិន​អាមេរិក​ជាច្រើនផងដែរ ។

អ្នកស្រី អាន សុធីតា នាយិកា​ប្រតិបត្តិ​នៃក្រុមហ៊ុន​អចលនទ្រព្យ PropNex Cambodia ក៏បាន​ឱ្យដឹងថា រាល់ដំណើរ​បេសកកម្ម​របស់​ថ្នាក់ដឹកនាំរាជរដ្ឋាភិបាល​នៅ​ក្រៅ​ប្រទេស​ តែង​តែ​នាំ​មក​នូវ​ការ​វិនយោគថ្មីៗដល់កម្ពុជា ហើយកម្ពុជា​ក៏តែងតែ​ទាក់ទាញ​វិនិយោគិនមកពីគ្រប់ទិសទី ដោយមិនផ្ដោតលើ​វិនិយោគិន​តែមួយប្រទេស​នោះទេ​​​ ជាក់ស្ដែង​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​​​នេះ មាន​វិនិយោគិន​មកពីគ្រប់ទិសទីចូលមកបណ្ដាក់ទុនវិនិយោគ​នៅកម្ពុជា​ ។

សូមរំលឹកដែរថា កាលពីពេលកន្លងទៅនេះ សម្ដេច​មហា​បវរធិបតី​ ហ៊ុន ម៉ាណែត នាយករដ្ឋមន្ត្រី​នៃព្រះរាជាណាចក្រកម្ពុជា បានមានប្រសាសន៍លើក​ឡើ​ង​​ថា ទាំងសម្ដេចផ្ទាល់ ទាំង​មន្ត្រីជាន់ខ្ពស់​រាជរដ្ឋាភិបាលជាច្រើនទៀត ដែល​បាន​ចេ​ញ​ដំ​ណើ​​រ​ទ​ស្ស​ន​កិ​​ច្ច​នៅ​ក្រៅ​ប្រទេស​តែងតែ​ទាក់ទាញឱ្យវិនិយោគិន​បរទេសទាំង​នោះ ចូលមក​សិក្សា​ស្វែងយល់ពី​សក្ដានុពល​វិនិយោគ​នៅកម្ពុជា ។

សម្ដេចធិបតី ក៏បាន​ណែនាឱ្យ​ថ្នាក់ដឹកនាំរាជធានី ខេត្ត ជួយផ្សព្វផ្សាយ និង​ទាក់ទាញ​ការ​វិនិយោគ​​ពីសំណាក់​វិនិយោគិនបរទេស​ដែល​ថ្នាកដឹកនាំ​ជាតិ ក៏ដូចជា​សម្ដេចផ្ទាល់​បាន​ទាញឱ្យពួកគេ​ចូល​មក​កម្ពុជា ដើម្បីសិក្សា​វិនិយោគ ​។​

សម្ដេច​ធិបតី ក៏មានគម្រោង​ក្នុងកា​រផ្ដល់ពាន​រង្វាន់លើក​ទឹកចិត្ត​ដល់​បណ្ដាខេត្ត​ណាដែលទាក់ទាញ​បាន​ការ​វិនិយោគ​ច្រើនជាង​គេ​ផងដែរ ដើម្បីឱ្យថ្នាក់ដឹកនាំខេត្ត ជាពិសេសអភិបាលខេត្ត ​រា​​ជ​ធានីខិតខំទាក់ទាញ​វិនិយោគិន​ទៅ​បណ្ដាក់ទុនវិនិយោគនៅក្នុង​ខេត្ត​ដែលជា​ដែន​គ្រប់គ្រង​របស់ខ្លួន​បន្ថែមទៀត ៕