(ភ្នំពេញ)៖ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ក្រសួង បានដាក់ឱ្យដំណើរការនូវសេវាគាប់ចិត្តជូនដល់ប្រជាពលរដ្ឋ ដែលអាចប្រើប្រាស់រាល់សេវារបស់ក្រសួងបានតាមរយៈប្រព័ន្ធអនឡាញ ដែលមានភាពងាយស្រួល លឿនរហ័ស និងអាចជឿទុកចិត្តបាន។ ការលើកឡើងនេះនៅក្នុងសិក្ខាសាលាផ្សព្វផ្សាយសេវាអនឡាញរបស់ក្រសួងរៀបចំដែនដី នគរូបនីយកម្ម និងសំណង់ និងការរៀបចំឥណទានក្នុងវិស័យសំណង់ និងអចលនទ្រព្យ ដែលបានធ្វើឡើងនៅទីស្ដីការក្រសួង នាព្រឹកថ្ងៃទី ១៥ ខែមករា ឆ្នាំ២០២៥។

ឯកឧត្តមឧបនាយករដ្ឋមន្ត្រី សាយ សំអាល់ បានឱ្យដឹងថា សិក្ខាសាលានេះធ្វើឡើងក្នុងគោលបំណងផ្សព្វផ្សាយពីសេវាសាធារណៈដែលបានដាក់ដំណើរការតាមប្រព័ន្ធអនឡាញជូនប្រតិបត្តិករ និងអ្នកប្រើប្រាស់ឱ្យបានដឹងកាន់តែទូលំទូលាយនិងការផ្ដល់អត្រាការប្រាក់តាមធនាគារ។

នាឱកាសនោះ ឯកឧត្តមឧបនាយករដ្ឋមន្ត្រី បានលើកឡើងថា ក្នុងរយៈពេលមួយឆ្នាំកន្លះកន្លងមកនេះ ក្រសួងបានព្យាយាមបង្រួមបញ្ហាដែលមានភាពចម្រូងចម្រាស់នៅក្នុងសង្គមជាតិ ក្នុងនោះបានជំរុញការងារចុះបញ្ជីដីធ្លីឱ្យបានចប់សព្វគ្រប់ ដោយចុះបញ្ជីដីធ្លីបាន ៣ លាន ៧ សែនក្បាលដី ហើយប្រហែលជាដល់ពិធីបុណ្យចូលឆ្នាំថ្មីប្រពៃណីជាតិខាងមុខនេះនឹងអាចបញ្ចប់ទាំងស្រុងនូវការចុះបញ្ជីដីធ្លីនៅកម្ពុជា។ ចំណែកបញ្ហាវិវាទដីធ្លីគឺមានច្រើនករណីប៉ុន្តែរហូតមកទល់ពេលនេះយើងបានដោះស្រាយករណីទាំងនោះអស់ជាច្រើននិងនៅសល់ត្រឹមក្រោម ១០០០ ករណីប៉ុណ្ណោះ។ រីឯការងារបឹងទន្លេសាប គឺយើងបានបន្តរក្សាអាយុជីវិតបឹងទន្លេសាបដោយមិនអោយមានការកាត់ឆ្វៀលដីបន្តទៀតនោះទេ ហើយរក្សាបាននូវគន្លងមួយថាកម្ពុជាមានលទ្ធភាពរក្សាបាននូវមរតកធនធានធម្មជាតិរបស់ខ្លួន ជាការទទួលខុសត្រូវរបស់អ្នកជំនាន់នេះសម្រាប់អ្នកជំនាន់ក្រោយៗទៀត។

ចំពោះបញ្ហាវិវាទដីធ្លីរវាងអាជ្ញាធរជាតិអប្សរា និងប្រជាពលរដ្ឋនៅក្នុងតំបន់រមណីយដ្ឋានអង្គរ ខេត្តសៀមរាបក៏ត្រូវបានដោះស្រាយសម្របសម្រួលនិងរក្សាបាននូវសម្បត្តិបេតិកភណ្ឌរបស់ដូនតាខ្មែរនិងធានាបាននូវជីវភាពរបស់ប្រជាពលរដ្ឋដែលរស់នៅជុំវិញតំបន់អង្គរ។ ដោយឡែកបញ្ហាវិវាទនៅក្នុងបុរីក៏ត្រូវបានដោះស្រាយសម្របសម្រួល ដោយបច្ចុប្បន្ននៅសល់ត្រឹមតែប្រមាណជាង ២០គម្រោងទៀតប៉ុណ្ណោះ។ ក្រៅពីនេះក្រសួងរៀបចំដែនដី នគរូបនីយកម្ម និងសំណង់ ក៏បានដាក់ឱ្យដំណើរការនូវសេវាគាប់ចិត្តជូនដល់ប្រជាពលរដ្ឋដែលអាចប្រើប្រាស់រាល់សេវារបស់ក្រសួងបានតាមរយៈប្រព័ន្ធអនឡាញមានភាពងាយស្រួល លឿនរហ័សនិងអាចជឿទុកចិត្តបានផងដែរ។

ទន្ទឹមនេះ ឯកឧត្តម សាយ សំអាល់ បានបញ្ជាក់ថា លទ្ធផលការងារទាំង ៦ ចំណុចដែលក្រសួងបានអនុវត្តមកនេះអាចនិយាយបានថាក្រសួងបានបង្កើតនូវបរិយាកាសគ្មានវិវាទជូនសង្គមជាតិកម្ពុជាហើយនេះគឺជាគម្រូសម្រាប់ពិភពលោកសម្រាប់ប្រទេសដែលធ្លាប់ញាំញីដោយសង្គ្រាមខ្ទេចខ្ទី អាចស្រោចស្រង់ខ្លួនត្រឡប់មកវិញបានហើយកសាងនិងអភិវឌ្ឍន៍ខ្លួនបានមកដល់បច្ចុប្បន្ននេះ ដែលមិនងាយនឹងមានប្រទេសណាអាចធ្វើបានបែបនេះទេ។

ឯកឧត្តមរដ្ឋមន្ត្រី បានបញ្ជាក់ថា ក្រសួងបានធ្វើការផ្សព្វផ្សាយអំពីទិន្នន័យឌីជីថល និងរបៀបរបបការងារតាមបែបឌីជីថលនេះ ជូនទៅដល់អតិថិជនដែលរួមមានទាំងបងប្អូនប្រជាជនទូទៅ ស្ថាប័នពាក់ព័ន្ធ និងដៃគូហិរញ្ញវត្ថុដូចជាធនាគារ និងមីក្រូហិរញ្ញវត្ថុ។

សូមគូសបញ្ជាក់ថា ទិន្នន័យគ្រប់គ្រងរួមមាន៖ ប្រភេទក្បាលដីរបស់បុគ្គលនីមួយៗអាចឆែកបាន និងរបៀបរបបការងារ គឺដៃគូដូចជាធនាគារ មីក្រូហិរញ្ញវត្ថុ អាចចូលមើលទិន្នន័យអ្នកដែលមកខ្ចីលុយ ឬធ្វើការជាមួយស្ថាប័នខ្លួន។ ជាមួយគ្នានោះ ទ្រព្យដែលបានដាក់រក្សាការពារដោយតុលាការក៏អាចចូលទៅពិនិត្យមើលផងដែរ តែទិន្នន័យទាំងនោះត្រូវបានរក្សាការសម្ងាត់ និងឯកជនភាព៕