សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ជាការពិត អតិថិជនបច្ចុប្បន្នច្រើនតែប្រឈមមុខនឹងបញ្ហាក្នុងការសងត្រឡប់លើអចលនវត្ថុ ហើយដែលជារឿយៗគេតែងសង្កេតឃើញករណីរឹបអូសពីសំណាក់ម្ចាស់បុរី ឬម្ចាស់ខុនដូរក្រោយពេលដែលអតិថិជនមិនមានលទ្ធភាពសងត្រឡប់។ ចំណុចនេះបានក្លាយជាបញ្ហាក្ដៅមួយសម្រាប់វិស័យអចលនទ្រព្យដែលទាមទារឱ្យមានការយកចិត្តទុកដាក់ខ្លាំងជាងមុន ជាពិសេសអ្នកដែលមានបំណងចង់ទិញផ្ទះ។
ដោយសារតែផ្ទះជាអចលនវត្ថុដែលមានតម្លៃថ្លៃ ដូច្នេះវាក៏ត្រូវការពេលវេលាយូរក្នុងការសងត្រឡប់ផងដែរក្នុងករណីដែលអតិថិជនប្រើប្រាស់សេវាឥណទានពីធនាគារ។
លោក ឈី ពុធតុលា នាយកនៃនាយកដ្ឋានឥណទានបុគ្គលនៃធនាគារ ហ្វីលីប បានចែករំលែកពីគន្លិះក្នុងការរៀបចំហិរញ្ញវត្ថុសម្រាប់ទិញផ្ទះថា៖
«ធនាគារគេនឹងមើលទៅលើឯកសារនៃចំណូលរបស់អតិថិជន និងប្រវត្តិនៃការសងត្រឡប់របស់គេដើម្បីធានាស្ថិរភាពនៃចំណូល ម្លោះហើយអតិថិជនដែលមានបំណងចង់ខ្ចីគឺត្រូវពិនិត្យលើចំណុចសំខាន់ៗទាំងពីរនេះ»។
ចំពោះដំណោះស្រាយទៅលើបញ្ហាជម្លោះជាមួយម្ចាស់បុរី ដែលឈានដល់ការរឹបអូសជាដើមនោះ លោកបានលើកទឹកចិត្តឱ្យអតិថិជនប្រើប្រាស់កម្ចីធនាគារ ជាជាងការបង់ផ្ទាល់ជាមួយបុរីដែលមានការប្រាក់ខ្ពស់ និងមិនមានល័ក្ខខ័ណ្ឌលើកលែង។
ពាក់ព័ន្ធនឹងរឿងនេះ លោកឧកញ៉ា ឃាង ពុទ្ធី ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា បានគូសបញ្ជាក់ពីចំណុចសំខាន់ៗផ្សេងទៀតដែលអតិថិជនត្រូវគិតគូរផងដែរនោះគឺ លទ្ធភាពរបស់ខ្លួន។
ត្រង់ចំណុចនេះលោកឧកញ៉ាបានបកស្រាយថា៖
«អ្នកដែលចង់ទិញផ្ទះភាគច្រើនចង់បានផ្ទះធំ ផ្ទះថ្លៃ ដែលលើសពីលទ្ធភាពរបស់ខ្លួន ដូច្នេះហើយបានជាពួកគេច្រើនតែជួបប្រទះបញ្ហាក្នុងការសងត្រឡប់ទៅគេវិញ»។
លោកបន្តថា ដើម្បីជៀសពីហានិភ័យនានាក្នុងពេលសងប្រាក់ទៅធនាគារ ឬខាងបុរីផ្ទាល់ អតិថិជនត្រូវបង់ក្នុងចំនួនត្រឹមតែ ៣០%នៃចំណូលរបស់ខ្លួនតែប៉ុណ្ណោះ។ ៣០% នៃចំណូលព្រោះពួកគេត្រូវ ទុកប្រាក់ពី ២០% ទៅ ៣០% សម្រាប់សន្សំ និង ៣០%ទៀតសម្រាប់ចាយវាយ។
លោកបន្តថា ប្រាក់សន្សំ ៣០%នោះអាចជាប្រាក់បម្រុងទុកនៅពេលដែលអតិថិជនមានបញ្ហាណាមួយដូចជា បាត់បង់ការងារ បញ្ហាសុខភាព ឬគ្រោះថ្នាក់ផ្សេងៗជាដើម។ ធ្វើដូច្នេះ ពួកគេនៅតែមាន លទ្ធភាពក្នុងការបង់ យ៉ាងហោចណាស់ក៏ ៤ ទៅ ៦ខែដែរ។
ម្យ៉ាងទៀត អ្នកដែលមានបំណងចង់ទិញផ្ទះក៏ត្រូវមានប្រាក់មួយកញ្ចប់ដែលបម្រុងទុកសម្រាប់ជួស ជុល និងថែទាំផ្ទះជាប្រចាំផង ព្រោះទាំងនោះជាបញ្ហាជាក់ស្ដែងដែលអ្នកទិញផ្ទះនឹងជួបប្រទះ។
លោកឧកញ៉ាបន្តគូសបញ្ជាក់ដែរថា៖
«មានតែផែនការហិរញ្ញវត្ថុតែមួយមុខក៏មិនគ្រប់គ្រាន់ដែរ អតិថិជនក៏ត្រូវមានភាពចាស់ទុំក្នុងការគ្រប់គ្រងហិរញ្ញវត្ថុរបស់ខ្លួន ទើបអាចសម្រេចបាន។»
ម្យ៉ាងទៀត ការទិញផ្ទះក៏ត្រូវតែពិនិត្យលើទីតាំង ជៀសវាងក្នុងករណីបន្ទាន់ណាមួយមិនអាចលក់ អចលនវត្ថុនោះចេញវិញបាន៕
Account
Security
Favourite Content