បរទេស៖ យោងតាមប្រភពពី Forbes India បានបង្ហាញពីប្រទេសសេដ្ឋកិច្ចធំៗទាំង ១០ របស់ពិភពលោកក្នុងឆ្នាំ២០២៣ តាមចំណាត់ថ្នាក់នៃផលិតផលក្នុងស្រុកសរុប Nominal GDP ដែលគេប្រើតម្លៃទំនិញបច្ចុប្បន្នមកគណនា។ ទិន្នន័យនៃប្រទេសទាំង ១០ នេះត្រូវបានដកស្រង់ចេញពី IMF។

១. សហរដ្ឋអាមេរិក នៅតែរក្សាតំណែងរបស់ខ្លួនជាសេដ្ឋកិច្ចកំពូលដ៏សំខាន់របស់ពិភពលោក និងជាប្រទេសអ្នកមានបំផុតចាប់តាំងពីឆ្នាំ១៩៦០ ដល់ឆ្នាំ២០២៣។ សេដ្ឋកិច្ចរបស់អាមេរិកមានភាពចម្រុះដែលជំរុញដោយវិស័យសំខាន់ៗរួមមាន សេវាកម្ម ផលិតកម្ម ហិរញ្ញវត្ថុ និងបច្ចេកវិទ្យា។ លើសពីនេះ អាមេរិកមានទីផ្សារអ្នកប្រើប្រាស់ធំ ជំរុញឲ្យមានការបង្កើតថ្មី ស្មារតីមានភាពជាសហគ្រិន ភាពធន់នៃហេដ្ឋារចនាសម្ព័ន្ធ និងបទពិសោធន៍ក្នុងលក្ខខណ្ឌអាជីវកម្មដែលមានអត្ថប្រយោជន៍។ ផលិតផលក្នុងស្រុកសរុប (norminal) ២៦ ៨៥៤ ពាន់លានដុល្លារ, GDP សម្រាប់មនុស្សម្នាក់ៗគឺ ៨០ ០៣០ ដុល្លារ, និងអត្រាកំណើន GDP ប្រចាំឆ្នាំ ១,៦ ភាគរយ។

២. ចិន ជាមហាអំណាចសេចកិច្ចអាស៊ីដែលមានវឌ្ឍនភាពសេដ្ឋកិច្ចឡើងពីចំណាត់ថ្នាក់ទី ៤ ក្នុងឆ្នាំ១៩៦០ មកដល់ចំណាត់ថ្នាក់ទី ២ ក្នុងរយៈពេលប៉ុន្មានឆ្នាំមកនេះ។ សេដ្ឋកិច្ចចិនភាគច្រើនពឹងផ្អែកលើការផលិត ការនាំចេញ និងការវិនិយោគ។ លើសពីនេះ ចិនមានកម្លាំងពលកម្មយ៉ាងទូលំទូលាយ ការគាំទ្រពីរដ្ឋាភិបាលដ៏រឹងមាំ វឌ្ឍនភាពផ្នែកហេដ្ឋារចនាសម្ព័ន្ធ និងទីផ្សារអ្នកប្រើប្រាស់ដែលកំពុងរីកលូតលាស់យ៉ាងឆាប់រហ័ស។ ផលិតផលក្នុងស្រុកសរុប (norminal) ១៩,៣៧៤ ពាន់លានដុល្លារ, GDP សម្រាប់មនុស្សម្នាក់ៗ ១៣ ៧២០ ដុល្លារ, និង អត្រាកំណើន GDP ប្រចាំឆ្នាំ ៥,២ ភាគរយ។

៣. ជប៉ុន មានបច្ចេកវិទ្យាជឿនលឿន សមត្ថភាពផលិត និងឧស្សាហកម្មសេវាកម្ម ដែលជំរុញដល់កំណើនសេដ្ឋកិច្ច។ វិស័យជឿនលឿនរួមមានវិស័យយានយន្ត អេឡិចត្រូនិក គ្រឿងម៉ាស៊ីន និងផ្នែកហិរញ្ញវត្ថុ។ បន្ថែមពីនេះ ជប៉ុនត្រូវបានទទួលស្គាល់ចំពោះក្រមសីលធម៌ការងារ ការត្រួសត្រាយផ្លូវផ្នែកបច្ចេកវិទ្យា និងការនាំចេញប្រកបដោយគុណភាពខ្ពស់។ ផលិតផលក្នុងស្រុកសរុប (norminal) ៤ ៤១០ ពាន់លានដុល្លារ, GDP សម្រាប់មនុស្សម្នាក់ៗ ៣៥ ៣៩០ ដុល្លារ, និង អត្រាកំណើន GDP ប្រចាំឆ្នាំ ១,៣ ភាគរយ។

៤. អាល្លឺម៉ង់ មានសេដ្ឋកិច្ចផ្តោតលើការនាំចេញសេដ្ឋកិច្ច និង ​មានភាពល្បីល្បាញខាងផ្នែកវិស្វកម្ម រថយន្ត គីមី និងឱសថ។ លើសពីនេះ ប្រទេសនេះទទួលបានអត្ថប្រយោជន៍ពីកម្លាំងពលកម្មដ៏ជំនាញរបស់ខ្លួន ការស្រាវជ្រាវ គំនិតផ្តួចផ្តើមក្នុងការអភិវឌ្ឍន៍ដ៏រឹងមាំ និងការប្តេជ្ញាចិត្តក្នុងការបង្កើតថ្មី។ ផលិតផលក្នុងស្រុកសរុប (norminal) ៤​ ៣០៩ ពាន់លានដុល្លារ, GDP សម្រាប់មនុស្សម្នាក់ៗ ៥១ ៣៨០ ដុល្លារ, និង អត្រាកំណើន GDP ប្រចាំឆ្នាំ -០,១ ភាគរយ។

៥. ឥណ្ឌា ជាប្រទេសសេដ្ឋកិច្ចមានភាពសម្បូរបែប និងកំណើនយ៉ាងឆាប់រហ័ស ដែលជំរុញដោយវិស័យសំខាន់ៗដូចជា បច្ចេកវិទ្យាព័ត៌មាន សេវាកម្ម កសិកម្ម និងផលិតកម្ម។ ប្រទេសនេះទទួលបានប្រយោជន៍ពីទីផ្សារក្នុងស្រុកដ៏ធំទូលាយ កម្លាំងពលកម្មវ័យក្មេង និងជំនាញខាងបច្ចេកវិទ្យា។ ផលិតផលក្នុងស្រុកសរុប (norminal) ៣ ៧៤០ ពាន់លានដុល្លារ, GDP សម្រាប់មនុស្សម្នាក់ៗ ២ ៦០១ ដុល្លារ និង អត្រាកំណើន GDP ប្រចាំឆ្នាំ ៥,៩ ភាគរយ។

៦. ​ចក្រភព​អង់គ្លេស​ មានសេដ្ឋកិច្ចរួម​បញ្ចូល​ទាំង​ផ្នែក​សេវាកម្ម ផលិតកម្ម ហិរញ្ញវត្ថុ និង​ផ្នែក​ច្នៃប្រឌិត។ ទីក្រុងឡុងដ៍មានមុខងារជាមជ្ឈមណ្ឌលហិរញ្ញវត្ថុទូទាំងពិភពលោក ដោយទាក់ទាញការវិនិយោគបរទេស។ ផលិតផលក្នុងស្រុកសរុប (norminal)  ៣.១៥៩ ពាន់លានដុល្លារ, GDP សម្រាប់មនុស្សម្នាក់ៗគឺ ៤៦ ៣៧០ ដុល្លារ, និង អត្រាកំណើន GDP ប្រចាំឆ្នាំ -០.៣ ភាគរយ។

៧. បារាំង ជាប្រទេសសេដ្ឋកិច្ចធំមួយរបស់អឺរ៉ុបដែលផ្តោតលើឧស្សាហកម្មដូចជា លំហអាកាស ទេសចរណ៍ ទំនិញប្រណីតៗ និងកសិកម្ម។ លើសពីនេះ បារាំងមានភាពល្បីល្បាញដោយសារប្រព័ន្ធសុខុមាលភាពសង្គមដ៏រឹងមាំ ហេដ្ឋារចនាសម្ព័ន្ធដែលត្រូវបានអភិវឌ្ឍយ៉ាងល្អ និងការវិនិយោគយ៉ាងច្រើនក្នុងការស្រាវជ្រាវ និងការអភិវឌ្ឍន៍។ ផលិតផលក្នុងស្រុកសរុប (norminal) ២ ៩២៤ ពាន់លានដុល្លារ, GDP សម្រាប់មនុស្សម្នាក់ៗ ៤៤ ៤១០ ដុល្លារ, និង អត្រាកំណើន GDP ប្រចាំឆ្នាំ ០,៧ ភាគរយ។

៨. អ៊ីតាលី​ ​ជា​ប្រទេស​សេដ្ឋកិច្ច​ធំ​ទី​បី​នៅ​អឺរ៉ុប និង មាន​ទីផ្សារ​អភិវឌ្ឍន៍​ខ្លាំង។ ប្រទេស​នេះ​មាន​ឥទ្ធិពល ពី​វិស័យ​ពាណិជ្ជកម្ម​ ជំនួញ និង​ឧស្សាហ៍​កម្ម​កសិកម្ម​ដែលមានការ​ប្រកួត​ប្រជែង។​ ផលិតផលក្នុងស្រុកសរុប (norminal) ២ ១៧០ ពាន់លានដុល្លារ, GDP សម្រាប់មនុស្សម្នាក់ៗ ៣៦ ៨១០ ដុល្លារ, និង អត្រាកំណើន GDP ប្រចាំឆ្នាំ ០,៧ ភាគរយ។

៩. កាណាដា មានសេដ្ឋកិច្ចពឹងផ្អែកយ៉ាងខ្លាំងលើធនធានធម្មជាតិដ៏សម្បូរបែបរបស់ខ្លួនរួមមាន ប្រេង ឧស្ម័ន រ៉ែ និងឈើ។ មិនត្រឹមតែប៉ុណ្ណោះ ប្រទេសនេះមានវិស័យសេវាកម្មដែលរីកចម្រើន ឧស្សាហកម្មផលិតកម្មមានការអភិឌ្ឍន៍ ការយកចិត្តទុកដាក់លើការបង្កើតថ្មី និងវឌ្ឍនភាពបច្ចេកវិទ្យា។ ផលិតផលក្នុងស្រុកសរុប (norminal) ២ ០៩០ ពាន់លានដុល្លារ, GDP សម្រាប់មនុស្សម្នាក់ៗ ៥២ ៧២០ ដុល្លារ,និង អត្រាកំណើន GDP ប្រចាំឆ្នាំ ១,៥ ភាគរយ។

១០. ប្រេស៊ីល មានសេដ្ឋកិច្ចគ្របដណ្តប់លើវិស័យកសិកម្ម ការរុករករ៉ែ ការផលិត និងសេវាកម្ម។ លើសពីនេះ ប្រទេសនេះជាមជ្ឈមណ្ឌលដ៏លេចធ្លោមួយរបស់ពិភពលោកខាងផលិតកម្មកសិកម្ម និងការនាំចេញ។ កំណើនសេដ្ឋកិច្ចត្រូវបានជំរុញដោយ​ តម្លៃទំនិញ ការប្រើប្រាស់ក្នុងស្រុក និងការរីកចំរើននៃហេដ្ឋារចនាសម្ព័ន្ធ។ ផលិតផលក្នុងស្រុកសរុប (norminal) ២ ០៨០ ពាន់លានដុល្លារ, GDP សម្រាប់មនុស្សម្នាក់ៗ ៩ ៦៧០ ដុល្លារ,និង អត្រាកំណើន GDP ប្រចាំឆ្នាំ ០,៩ ភាគរយ៕