សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងស្ថានភាពដែលវិស័យអចលនទ្រព្យនៅតែមិនទាន់មានភាពល្អប្រសើរ ចាប់តាំងពីបានជួបបញ្ហាប្រឈមដោយសារវិបត្តិកូវីដ១៩ អ្នកជំនាញក្នុងវិស័យអចលនទ្រព្យបានណែនាំឱ្យអ្នកដែលមានបំណងទិញអចលនទ្រព្យសម្រាប់វិនិយោគ ឬលក់បន្តយកចំណេញ ត្រូវបង្កើនការប្រុងប្រយ័ត្នជៀសវាងខាតបង់ប្រាក់កាស ។
លោក វ៉ា វីរៈ អ្នកជំនាញវិស័យអចលនទ្រព្យអន្តរជាតិបានមានប្រសាសន៍ឱ្យដឹងថា កន្លងមកមានបងប្អូនប្រជាពលរដ្ឋទទួលបានផលចំណេញពីការវិនិយោគ ឬទិញអចលនទ្រព្យ ប៉ុន្តែក៏មានបងប្អូនមួយចំនួនបានជួបប្រទះនឹងបញ្ហាខាតបង់ប្រាក់កាសផងដែរ ។ ដូច្នេះ សម្រាប់អ្នកដែលចង់វិនិយោគនៅក្នុងវិស័យមួយនេះ គម្បីមានការប្រុងប្រយ័ត្នឱ្យបានខ្ពស់ជាងមុន។
លោកបន្តថា ៖
«មុននឹងយើងទិញ ឬវិនិយោគអចលនទ្រព្យ យើងត្រូវកំណត់គោលដៅ ផែនការជាមុនសិន ថាតើអចលនទ្រព្យនោះយកមកប្រើប្រាស់ក្នុងគោលបំណងអ្វី ។ ឧទាហរណ៍ថា ទិញដើម្បីស្នាក់នៅ ឬបង្កើតអាជីវកម្ម ឬក៏ទិញដើម្បីទុកយកចំណេញក្នុងរយៈណាមួយ ។ ក្នុងដំណាក់កាលនេះ ការទិញអចលនទ្រព្យសម្រាប់ជាតម្រូវការប្រើប្រាស់មិនមានហានិភ័យនោះទេ ប៉ុន្តែបើសិនជាទិញទុកដើម្បីយកចំណេញ ដោយយកប្រភពទុនពីខាងក្រៅមកប្រើប្រាស់នោះទើបជាហានិភ័យ » ។
លោកបន្តទៀតថា មុននឹងទិញអចលនទ្រព្យក៏គួរតែមើលម្ចាស់នៃគម្រោងនោះដែរ ហើយត្រូវស៊ើបប្រវត្តិរបស់ម្ចាស់គម្រោង ថាតើធ្លាប់មានប្រវត្តិអាក្រក់ ឬអត់ក្នុងការវិនិយោគ ឬអភិវឌ្ឍន៍គម្រោងអចលនទ្រព្យ ។ ចំណុចសំខាន់មួយទៀត មុននឹងទិញអចលនទ្រព្យក៏ត្រូវសម្លឹងមើលពីសក្ដានុពលនៃតំបន់ដែលត្រូវទិញគម្រោងនោះ ថាតើវាមានសក្ដានុពលកម្រិតណា ហើយអាចប្រកបអាជីវកម្មអ្វីបាន ។
អ្វីដែលសំខាន់ ការវិនិយោគលើអចលនទ្រព្យគួរកុំពឹងអាស្រ័យទាំងស្រុងលើកម្ចីពីប្រភពខាងក្រៅដែលបង្កើតអត្រាការប្រាក់ ដូចជា ធនាគារ និងហិរញ្ញវត្ថុជាដើម ។ បើសិនជាចរន្តសាច់ប្រាក់ ឬប្រាក់ចំណូលមិនអាចទប់ទល់នឹងការចំណាយលើការទិញអចលនទ្រព្យបាន គួរតែកុំប្រថុយ ព្រោះវាមានហានិភ័យខ្ពស់។ ដូច្នេះ មុនទិញអចលនទ្រព្យគួរតែមានប្រភពចំណូលយ៉ាងតិច៥០ភាគរយ ហើយ៥០ភាគរយទៀតអាចរកប្រភពទុនពីខាងក្រៅ ជាពិសេសធនាគារ ពីព្រោះថា ធនាគារមុននឹងផ្ដល់កម្ចីឱ្យគេនឹងចុះសិក្សាពីលទ្ធភាពនៃការសងត្រលប់ ។
អ្នកឧកញ៉ា សំ សុខនឿន ប្រធានក្រុមប្រឹក្សាភិបាលសម្ព័ន្ធក្រុមហ៊ុន SAM SN GROUP ក៏បានឱ្យដឹងផងដែរថា ស្ថានភាពនៃវិបត្តិអចលនទ្រព្យកម្ពុជាអាចបន្តអូសបន្លាយរយៈពេល៣ទៅ៥ឆ្នាំទៀត ទោះបីជាដើមហេតុនៃវិបត្តិ កូវីដ១៩បានធូរស្រាលក្ដី ។ ក្រោយកូវីដ១៩បានធូរស្រាល សង្គ្រាមរវាងរុស្ស៊ី-អ៊ុយក្រែន និងនៅបស្ចឹមបូព៌ា បានផ្ទុះឡើង ហើយថ្មីៗនេះ ក៏មានការផ្ទុះសង្គ្រាមរវាងកម្ពុជា និងថៃ ដែលធ្វើឱ្យស្ថានភាពទីផ្សារអចលនទ្រព្យកាន់តែយ៉ាងយ៉ឺន ។
អ្នកឧកញ៉ាបន្តថា អ្វីដែលជាកត់សម្គាល់ ក្រុមហ៊ុនអភិវឌ្ឍន៍អចលនទ្រព្យធំជាងគេមួយនៅកម្ពុជា គឺក្រុមហ៊ុនព្រីនស៍គ្រុប ក៏បានជួបប្រទះនឹងបញ្ហាប្រឈម ដែលនឹងធ្វើឱ្យស្ថានភាពកាន់តែពិបាករកច្រកចេញ ហើយទាមទារពេលវេលាយូរដើម្បីស្ដារវិស័យនេះឱ្យល្អប្រសើរឡើងវិញ ៕
Account
Security
Favourite Content