សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៣ កម្ពុជាទទួលបានទុនវិនិយោគសរុបប្រមាណ ៤,៩២ពាន់លានដុល្លារអាមេរិក ធៀបនឹងឆ្នាំ២០២២ ដែលមានចំនួន ៤,០៣ពាន់លាន ដុល្លារអាមេរិកប៉ុណ្ណោះ ក្នុងនោះដែរ ទុនវិនិយោគដែលជាគម្រោងរបស់វិនិយោគិនចិនមានរហូតដល់៦៦ភាគរយនៃទុនវិនិយោគសរុប ចំណែកទុនវិនិយោគក្នុងស្រុកមានប្រមាណ២៤ភាគរយផងដែរ ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយកាលពីពេលថ្មីៗនេះ ។
តាមរបាយការណ៍ដដែលឱ្យដឹងថា ក្រៅពីប្រភពទុនវិនិយោគពីប្រទេសចិន និងក្នុងស្រុក ប្រភពទុនវិនិយោគពីប្រតេសសិង្ហបុរីមានប្រមាណ២ភាគរយ ប្រទេសម៉ាឡេស៊ីមានប្រមាណ២ភាគរយ និងពីបណ្ដាប្រទេសផ្សេងៗជាច្រើនទៀតមាន៦ភាគរយ ។ គម្រោងវិនិយោគក្នុងឆ្នាំ២០២៣ ភាគច្រើនមានទីតាំងនៅក្នុងខេត្តកំពង់ស្ពឺ ហើយគម្រោងវិនិយោគមួយចំនួនទៀតបានប្រមូលផ្ដុំនៅរាជធានីភ្នំពេញ និងខេត្តជុំវិញរាជធានីភ្នំពេញ ដូចជាខេត្តកណ្ដាល ខេត្តតាកែវ និងខេត្តដែលមានការអភិវឌ្ឍតំបន់សេដ្ឋកិច្ចពិសេសរួមមានខេត្តស្វាយរៀង និងខេត្តព្រះសីហនុ ។
ក្នុងរបាយការណ៍បានបញ្ជាក់ផងដែរថា វិស័យដែលទទួលបានគម្រោងវិនិយោគច្រើនជាងគឺវិស័យឧស្សាហកកម្ម ដែលមានរហូតដល់ទៅ ៩២,៥៤ភាគរយ ឬស្មើនឹងប្រមាណ ២៤៨គម្រោង ។ ប៉ុន្តែវិស័យដែលមានទុនវិនិយោគច្រើនជាងគេ គឺវិស័យហេដ្ឋារចនាសម្ព័ន្ធ ដែលមានទុនវិនិយោគរហូតដល់ ២,១ពាន់លានដុល្លារក្នុងចំណោមទុនវិនិយោគសរុបចំនួន៤,៩២ពាន់លានដុល្លារអាមេរិក ។
នៅក្នុងឆ្នាំ២០២៣នេះដែរ គម្រោងដែលមានទុនវិនិយោគច្រើនជាងគេក៏ជាគម្រោងវិនិយោគពីប្រទេសចិនដែរ នោះគឺគម្រោងវិនិយោគផ្លូវល្បឿនលឿន ភ្នំពេញ បាវិត ដែលមានទុនវិនិយោគរហូតដល់ ១,៤ពាន់លានដុល្លារអាមេរិក ។
អ្នកជំនាញនៃវិស័យអចលនទ្រព្យជាច្រើនបានថ្លែងស្រដៀងៗគ្នាថា ការវិនិយោគលើគម្រោងធំៗនៅកម្ពុជានៅតែពឹងលើវិនិយោគិនចិន ហើយកម្ពុជាក៏បានបន្តទាក់ទាញអ្នកវិនិយោគជនជាតិចិនដើម្បីមកបណ្ដាក់ទុនលើគម្រោងវិនិយោគនានាបន្ថែមទៀតផងដែរ ដូចជាបន្តការវិនិយោគលើអគារជាប់គាំងនៅក្នុងក្រុងព្រះសីហនុ គម្រោងវិនិយោគលើឧស្សាហកម្ម បច្ចេកវិទ្យា និងកសិកម្មជាដើម ។
អ្នកនាង គឹម គិនកេសា អគ្គនាយិការងនៃក្រុមហ៊ុន CBRE Cambodia បានបញ្ជាក់ថា កម្ពុជានៅតែបន្តពឹងលើវិនិយោគិនចិន ប៉ុន្តែកម្ពុជាក៏បានបន្ថែមភាពទាក់ទាញវិនិយោគិនប្រទេសផ្សេងឱ្យចូលមកវិនិយោគនៅក្នុងប្រទេសកម្ពុជាបន្ថែមពីលើវិនិយោគិនចិនដែលកំពុងមាននាពេលបច្ចុប្បន្ន៕
Account
Security
Favourite Content