សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ដើម្បីលាងជម្រះមន្ទិលពីមហាជនដែលតែងចោទសួរថា តើគម្រោងព្រែកជីហ្វូណនតេជោនឹងអាចលេចជារូបរាងឬយ៉ាងណានោះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថា គម្រោងព្រែកជីកហ្វូណនតេជោនឹងបើកការដ្ឋាននៅអំឡុងខែសីហា ឆ្នាំ២០២៤ ប៉ុន្តែសម្ដេចមិនបានបញ្ជាក់ថានៅថ្ងៃណាច្បាស់លាស់នៅឡើយ ។
ថ្លែងនៅក្នុងឱកាសអញ្ជើញជាអធិបតីក្នុងពិធីសម្ពោធឆ្លង “ធម្មចេតិយទី១ តម្កល់ ព្រះត្រៃបិដកចម្លាក់ថ្មម៉ាប ១ ១៧០ផ្ទាំង ផ្លូវបេតុង ៩ខ្សែ និងសមិទ្ធផលនានាក្នុងមជ្ឍមណ្ឌលវប្បធម៌ព្រះពុទ្ធសាសនាកម្ពុជា ខេត្តកំពង់ស្ពឺ នៅព្រឹកថ្ងៃទី៣០ ឧសភា ២០២៤ សម្ដេចធិបតីបានមានប្រសាសន៍ថា គម្រោងព្រែកជីកហ្វូណនតេជោនឹងបើកការដ្ឋានសាងសង់នៅក្នុងខែសីហា ឆ្នាំ២០២៤នេះ បើទោះបីជាអ្នកណាថាអីក៏ថាចុះ ពីព្រោះយើងធ្វើនៅលើទឹកដីខ្មែរ ។
សម្ដេចធិបតីមានប្រសាសន៍ថា ការបើកការដ្ឋានសាងសង់គម្រោងព្រែកជីកហ្វូណនតេជោនឹងជម្រះនូវមន្ទិល និងកុំឱ្យយប់យន់សុបិនយូរ និងការស្រមើស្រម៉ៃច្រើនពេក ដូច្នេះហើយមានតែការប្រកាសបើកការដ្ឋានសាងសង់ជាផ្លូវការទេ ទើបលែងមានការស្រមើស្រម៉ៃតទៅទៀត ។
សម្ដេចធិបតីបានបន្តថា ៖
«កន្លងមករាជរដ្ឋាភិបាលបានកសាងនូវសមិទ្ធផលជាច្រើនមកហើយ ដែលមានតម្លៃច្រើនជាងគម្រោងព្រែកជីកហ្វូណនតេជោ ដូចជាអាកាសយានដ្ឋាន ផ្លូវល្បឿនលឿន ដូច្នេះរឿងអីដែលយើមិនអាចសាងសង់លើគម្រោងព្រែកជីកដែលមានតម្លៃប្រមាណ១ ៧០០លានដុល្លារអាមេរិកបាន ។ គម្រោងព្រែកជីកហ្វូណនតេជោនេះ នឹងមានការចូលរួមពីពលរដ្ឋកម្ពុជាជាច្រើនជាងការវិនិយោគពីខាងក្រៅប្រទេស »។
សម្ដេចបានបន្ថែមថា បច្ចុប្បន្នគម្រោងនេះបានចរចាជាមួយភាគីចិនដើម្បីចូលមកវិនិយោគ ព្រោះចិនគេមានអ្នកជំនាញបច្ចេកទេសលើការសាងសង់ ។ ប៉ុន្តែបើទោះបីជាគ្មានការចូលរួមវិនិយោគពីភាគីចិន ក៏កម្ពុជាអាចសាងសង់គម្រោងនេះបានដោយសារតែការរួបរួមពីពលរដ្ឋខ្មែរស្ទើរតែមួយប្រទេស ។
សម្ដេចបន្ថែមទៀតថា នៅពេលគម្រោងនេះបានសាងសង់រួចរាល់វានឹងក្លាយជាមធ្យោបាយដឹកជញ្ជូនថ្មីមួយ និងជាគម្រោងប្រវត្តិសាស្ត្ររបស់កម្ពុជា។ នៅពេលសាងសង់រួច បងប្អូនប្រជាពលរដ្ឋអាចសាងល្បងធ្វើដំណើរតាមផ្លូវទឹកពីភ្នំពេញទៅលេងខេត្តកែប និងកំពត ដ៏ដូចជាជិះទូកតាមផ្លូវថ្មីរបស់កម្ពុជា។
ភ្នាក់ងារទិញលក់អចលនទ្រព្យជាច្រើននៅខេត្តកែប និងកំពត បានបង្ហាញក្ដីរីករាយជាខ្លាំងក្រោយឮការប្រកាសរបស់នាយករដ្ឋមន្ត្រីពីកាលបរិច្ឆេទបើកការដ្ឋានសាងសង់គម្រោងព្រែកជីហ្វូណនតេជោ ដែលគម្រោងមួយនឹងជំរុញឱ្យមានការទិញលក់ និងតម្លៃដីធ្លីនៅក្នុងខេត្តកំពត និងកែបមានសន្ទុះមួយកម្រិតទៀត ។
គួរបញ្ជាក់ថា គម្រោងព្រែកជីកហ្វូណនតេជោ ត្រូវបានទទួលការគាំទ្រយ៉ាងខ្លាំងពីសំណាក់ប្រជាពលរដ្ឋទូទាំងប្រទេស និងបានជំរុញឱ្យរាជរដ្ឋាភិបាលអនុវត្តគម្រោងនេះឱ្យបានឆាប់ ដើម្បីឱ្យកូនចៅជំនាន់ក្រោយឃើញគម្រោងដ៏អស្ចារ្យមួយ និងជាប្រវត្តិសាស្ត្រផុសឡើងនៅលើទឹកដីខ្មែរ ៕
Account
Security
Favourite Content