បរទេស ៖ យោងតាមប្រភពព័ត៌មានពី​ Business Insider បានរាយការណ៍ថា តុលាការហុងកុងបានបញ្ជាឱ្យមានការរំលាយក្រុមហ៊ុនអចលនទ្រព្យយក្ស China Evergrande Group ហើយការសម្រេចចិត្តនេះអាចនឹងបង្កឱ្យមានការរង្គោះរង្គើរនៅក្នុងទីផ្សារកាន់តែខ្លាំង ខណៈដែលអ្នកបង្កើតគោលនយោបាយព្យាយាមទប់ទល់នឹងវិបត្តិកាន់តែមានភាពធ្ងន់ធ្ងរ។

Evergrande គឺជាក្រុមហ៊ុនអភិវឌ្ឍន៍ខាងអចលនទ្រព្យដែលជំពាក់បំណុលច្រើនបំផុតរបស់ពិភពលោកដោយមានបំណុលសរុបជាង ៣០០ ពាន់លានដុល្លារ និងបានខកខានការទូទាត់លើប្រាក់កម្ចីរបស់ខ្លួននៅឆ្នាំ២០២១។ ​ចាប់តាំងពីពេលនោះមក វាបានបណ្តាលឲ្យវិស័យអចលនទ្រព្យមិនមានភាពច្បាស់លាស់រួចទៅហើយ និងបានធ្វើឱ្យវិបត្តិបំណុលនៅក្នុងវិស័យនេះកាន់តែស៊ីជម្រៅនៅហុងកុង។ បន្ថែមពីនេះ បញ្ហាហិរញ្ញវត្ថុនៅក្នុងវិស័យអចលនទ្រព្យកាន់តែធ្ងន់ធ្ងរឡើងៗ និងនាំឱ្យមានការបរាជ័យជាច្រើនទៀត ដែលបណ្តាលឱ្យមានផលប៉ះពាល់យ៉ាងធ្ងន់ធ្ងរដល់សេដ្ឋកិច្ច និងបន្តរារាំងដល់កំណើនរហូតមកដល់សព្វថ្ងៃនេះ។ ដូច្នោះហើយ ការសម្រេចចិត្តលើការរំលាយចោលនូវក្រុមហ៊ុនអភិវឌ្ឍន៍មានទ្រព្យសកម្មចំនួន ២៤០ ពាន់លានដុល្លារនេះ អាចនឹងធ្វើឱ្យទីផ្សារអចលនទ្រព្យ និងទីផ្សារមូលធនរបស់ចិនមានភាពរង្គោះរង្គើរ។

ស្របពេលនេះដែរ ទីក្រុងប៉េកាំងក៏កំពុងប្រឈមមុខនឹងបញ្ហាសេដ្ឋកិច្ចខ្លះដែរ ខណៈដែលទីផ្សារអចលនទ្រព្យស្ថិតក្នុងស្ថានភាពមិនល្អក្នុងរយៈពេល ៩ឆ្នាំ ហើយទីផ្សារភាគហ៊ុនដែលធ្លាក់ដល់កម្រិតទាបក្នុងរយៈពេល៥ឆ្នាំចុងក្រោយ។ ដូច្នោះហើយ ការរំខានថ្មីៗចំពោះទីផ្សារអចលនទ្រព្យអាចប៉ះពាល់ដល់កិច្ចខិតខំប្រឹងប្រែងរបស់អ្នកបង្កើតគោលនយោបាយក្នុងការស្តារកំណើនឡើងវិញ។ មិនត្រឹមតែប៉ុណ្ណោះ ដំណើរការរំលាយចោលក្រុមហ៊ុនអភិវឌ្ឍអចលនទ្រព្យ Evergrande នៅហុងកុងនេះអាចមានភាពស្មុគស្មាញ ជាមួយនឹងការពិចារណាផ្នែកនយោបាយដែលមានសក្តានុពលដោយសារវាមានអាជ្ញាធរជាច្រើនពាក់ព័ន្ធ។

គួរឲ្យបញ្ជាក់ដែរថា ក្រុមហ៊ុន Evergrande បានធ្វើការលើផែនការកែប្រែបំណុលចំនួន ២៣ ពាន់លានដុល្លារជាមួយក្រុមអ្នកកាន់ប័ណ្ណផ្សព្វផ្សាយពាណិជ្ជកម្មអស់រយៈពេលជិត ២ ឆ្នាំ ប៉ុន្តែផែនការដើមរបស់វាត្រូវបានខ្ទេចខ្ទាំនៅចុងខែកញ្ញា ពោលគឺនៅពេលដែលស្ថាបនិក Evergrande លោក Hui Ka Yan កំពុងស្ថិតនៅក្រោមការស៊ើបអង្កេតនៃក្តីឧក្រិដ្ឋកម្ម។ កាលពីខែមិថុនា ឆ្នាំ២០២២ ញត្តិនៃការរំលាយនេះត្រូវបានដាក់ជាលើកដំបូងដោយ Top Shine ដែលជាអ្នកវិនិយោគនៅក្នុងគម្រោង Fangchebao របស់ Evergrande ដោយសារអ្នកអភិវឌ្ឍន៍មិនបានគោរពកិច្ចព្រមព្រៀងដើម្បីទិញភាគហ៊ុនដែលខ្លួនបានទិញនៅក្នុងក្រុមហ៊ុនបុត្រសម្ព័ន្ធនោះទេ៕