សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ថ្វីត្បិតតែនៅក្នុងឆ្នាំ២០២៤នេះ ទីផ្សារលំនៅឋានមិនទាន់មានភាពល្អប្រសើរដូចគ្រាមុនវិបត្តិកូវីដ១៩ ក៏ដោយ ប៉ុន្តែការវិនិយោគលើអនុវិស័យមួយនេះនៅតែបន្តមាន និងរួមចំណែកធ្វើឱ្យវិស័យសាងសង់ ក៏ដូចជាវិស័យសំណង់មានសកម្មភាពមិនស្ងប់ស្ងាត់នោះទេ។
យោងតាមក្រសួងសេដ្ឋកិច្ច និងហិរញ្ញវត្ថុ ដែលបានចេញផ្សាយពីរបាយការណ៍និន្នាការសេដ្ឋកិច្ចកម្ពុជាកាលពីពេលកន្លងទៅថ្មីៗនេះបានឱ្យដឹងថា ក្នុងរយៈពេល៦ខែក្នុងឆ្នាំ២០២៤នេះ គម្រោងលំនៅឋានដែលទទួលបានការអនុញ្ញាតឱ្យសាងសង់មានចំនួន ១ ៣៤៦គម្រោង ក្នុងនោះមានគម្រោងបុរីចំនួន ១ ២៩៨ គម្រោង ខុនដូ ចំនួន៤៨គម្រោង ។
បើតាមទិន្នន័យដដែលនេះបានបង្ហាញ គម្រោងលំនៅឋានដែលទទួលបានការអនុញ្ញាតសាងសង់ក្នុងរយៈពេល ៦ខែកន្លងមកនេះ មានចំនួនច្រើនជាងគេក្នុងចំណោមគម្រោងក្នុងវិស័យសំណង់ទាំងមូល ។ តាមទិន្នន័យបានបង្ហាញថា គម្រោងទទួលបានការអនុញ្ញាតសាងសង់សរុបរយៈពេល៦ខែនេះ មានចំនួន ១ ៦៤២គម្រោង ក្នុងនោះគ្រាន់តែលំនៅឋានមានចំនួន ១ ៣៤៦គម្រោងទៅហើយ ។ ក្រៅពីនេះ មានគម្រោងឧស្សាហកម្ម ១១៥គម្រោង សំណង់ពាណិជ្ជកម្មចំនួន១០៥គម្រោង ទេសចរណ៍ចំនួន ២៦គម្រោង សំណង់សាធារណៈចំនួន ៤៩គម្រោង និងសំណង់វិនិយោគ១គម្រោង ។
បើតាមក្រាហ្វិកទិន្នន័យនៅក្នុងបាយការណ៍បានបង្ហាញឱ្យឃើញថា ចាប់តាំងពីក្រោយវិបត្តិកូវីដ១៩ ការវិនិយោគលើវិស័យសំណង់ចាប់ផ្ដើមមាននសន្ទុះឡើងវិញ ហើយការដាក់ស្នើសុំសាងសង់លំនៅឋាន និងសំណង់ពាណិជ្ជកម្មឃើញថាមានចំណែកច្រើនជាងគេ ។
លោក ញឹម ចាន់ឌី ដែលជាអ្នកអភិវឌ្ឍន៍លំនៅឋានមួយរូបបានបង្ហើបឱ្យដឹងថា ថ្វីត្បិតតែទីផ្សារលំនៅឋាននាពេលបច្ចុប្បន្នមើលទៅហាក់ជាប់គាំង ប៉ុន្តែមិនមែនគាំងគ្រប់គម្រោងនោះទេ ជាក់ស្ដែងចំពោះគម្រោងលំនៅឋាណាដែលស្ថិតនៅទីតាំងល្អ អាចប្រកបអាជីវកម្មបាន ជាពិសេសបញ្ចប់ការសាងសង់ជាស្ថាពរ នៅតែមានអ្នកត្រូវការ និងទិញជាហូរហែ លើកឡែងតែគម្រោងដែលស្ថិតនៅគ្រោងឆ្អឹងនៅឡើយ ហើយអ្នកវិនិយោគ ឬអ្នកអភិវឌ្ឍន៍មានបញ្ហាហិរញ្ញវត្ថុតែប៉ុណ្ណោះដែលគ្មានសកម្មភាព។
អ្នកនាង លាវ ហ្គេចលាង មន្ត្រីទំនាក់ទំនងនៃក្រុមហ៊ុនក្រេឌីតប្យូរ៉ូខេមបូឌា បានបង្ហាញពីរបាយការណ៍ឥណទានរបស់ក្រុមហ៊ុនក្រេឌីតប្យូរ៉ូខេមបូឌា ឱ្យដឹងថា កម្ចីសម្រាប់ទិញអចលនទ្រព្យ មានទិញផ្ទះ អគារ ដី និងសម្រាប់បើកអាជីវកម្មហាង មានកំណើនជាវិជ្ជាមាន ដោយក្នុងរយៈពេលពាក់កណ្ដាលឆ្នាំ កម្ចីប្រភេទមានទំហំទឹកប្រាក់ដល់ទៅ ជាង៧ពាន់លានដុល្លារអាមេរិកទៅហើយ ។
ឯកឧត្តម លាង មុនីរិទ្ធ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានថ្លែង បើទោះបីជាស្ថានភាពសេដ្ឋកិច្ចក្នុងតំបន់ និងពិភពលោក នៅពុំទាន់ប្រសើរឡើងវិញដូចស្ថានភាពមុនការរីករាលដាលនៃជំងឺកូវីដ១៩ក៏ដោយ ប៉ុន្តែទុនវិនិយោគក្នុងសំណង់អគារ រយៈពេល៦ខែដើមឆ្នាំ២០២៤នេះ កម្ពុជាទទួលបានប្រមាណ ២,៦ពាន់លានដុល្លារអាមេរិក ដែលជាសញ្ញាបង្ហាញថា វិស័យសំណង់កម្ពុជានៅតែមានកំណើនជាប្រចាំ ជាពិសេសគម្រោងថ្មីៗដែលបានស្នើសុំក្នុងរយៈពេល៦ខែដើមឆ្នាំ២០២៤នេះ មានកំណើនខ្ពស់ជាងរយៈពេលដូចគ្នាកាលពីឆ្នាំ២០២៣ ៕
Account
Security
Favourite Content