សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តម្លៃដីនៅក្នុងតំបន់មួយចំនួននៃខណ្ឌដូនពេញ រាជធានីភ្នំពេញ ក្នុងឆ្នាំ២០២៥នេះ មានការថមថយបន្តិចបើធៀបនឹងឆ្នាំមុនៗ ប៉ុន្តែ ទោះជាយ៉ាងណាក្ដី តម្លៃដីនៅតាមតំបន់មួយចំនួនក្នុងខណ្ឌនេះ នៅតែមានតម្លៃខ្ពស់ជាងគេបើធៀបនឹងបណ្ដាខណ្ឌផ្សេងទៀតក្នុងរាជធានីភ្នំពេញ ។
យោងតាមការវាយតម្លៃរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជា CVEA ដែលចេញផ្សាយសម្រាប់ឆមាសទី១ ឆ្នាំ២០២៥ បានបង្ហាញឱ្យឃើញថា តម្លៃដីនៅក្នុងខណ្ឌដូនពេញមានអត្រាខ្ពស់ជាងគេ ដែលក្នុងនោះ មានតំបន់ខ្លះ តម្លៃរហូតដល់ជាង១ម៉ឺនដុល្លារអាម៉េរិកក្នុងមួយម៉ែត្រការ៉េ ប៉ុន្តែក៏មានតំបន់ខ្លះតម្លៃត្រឹមតែ ១៧០០ដុល្លារអាម៉េរិកប៉ុណ្ណោះក្នុងមួយម៉ែត្រការ៉េ។
យោងតាមការវាយតម្លៃនេះឃើញថា តំបន់នៅក្នុងសង្កាត់ផ្សារថ្មីទី១ ទី២ និងទី៣ តម្លៃនៅតាមបណ្ដោយផ្លូវធំ មានចន្លោះពី ៤៦០០ដុល្លារអាម៉េរិក ទៅ ១១ ០០០ដុល្លារអាម៉េរិកក្នុងមួយម៉ែត្រការ៉េ និងនៅតាមបណ្ដោយផ្លូវតូចៗមានតម្លៃចន្លោះពី ២ ៣០០ដុល្លារអាម៉េរិក ដល់ ៤ ០០០ដុល្លារអាម៉េរិកក្នុងមួយម៉ែត្រការ៉េ ។ សម្រាប់តំបន់ក្នុងសង្កាត់ផ្សារកណ្ដាលទី១ និងទី២ ក៏ឃើញថាដីធ្លីមានតម្លៃប្រហាក់ប្រហែលនឹងសង្កាត់ផ្សារថ្មីដែរ ដោយសារតែតំបន់នេះស្ថិតនៅជិតគ្នា ។
ដោយឡែក តំបន់ដែលមានតម្លៃដីទាបជាងគេក្នុងខណ្ឌដូនពេញ រួមមានសង្កាត់ស្រះចក និងសង្កាត់វត្តភ្នំ ដោយសង្កាត់ស្រះចក ដីដែលស្ថិតនៅតាមបណ្ដោយផ្លូវធំ មានតម្លៃប្រមាណ ៣១០០ដុល្លារអាម៉េរិកក្នុងមួយម៉ែត្រការ៉េទៅ ៤៩០០ដុល្លារអាម៉េរិកក្នុងមួយម៉ែត្រការ៉េ និងនៅតាមផ្លូវតូចៗ មានតម្លៃចន្លោះពី ១៧០០ដុល្លារ ទៅ ៣៤០០ដុល្លារក្នុងមួយម៉ែត្រការ៉េ ។ សម្រាប់សង្កាត់វត្តភ្នំឃើញថាដីនៅតាមបណ្ដោយផ្លូវធំមានតម្លៃចន្លោះពី ៣៦០០ដុល្លារ ទៅ ៥០០០ដុល្លារអាម៉េរិកក្នុងមួយម៉ែត្រការ៉េ និងនៅតាមបណ្ដោយផ្លូវតូចៗមានតម្លៃចន្លោះពី ២២០០ដុល្លារ ទៅ ៣៨០០ដុល្លារអាម៉េរិកក្នុងមួយម៉ែត្រការ៉េ ។
បើតាមការវាយតម្លៃរបស់សមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានបង្ហាញផងដែរថា ហាងឆេងដីធ្លីក្នុងរាជធានីភ្នំពេញ មានការថមថយបន្តិចធៀបនឹងឆ្នាំ ២០២៤ និងឆ្នាំ២០២៣ ហើយការទិញលក់ក៏មានសកម្មភាពស្ងប់ស្ងាត់ជាងឆ្នាំមុនៗដែរ ។
លោក ប៉ូ អ៊ាវគង់ អគ្គនាយកក្រុមហ៊ុនអចលនទ្រព្យ Advance បានឱ្យដឹងថា បច្ចុប្បន្ននេះ តម្រូវការដីធ្លីសម្រាប់ប្រើប្រាស់ក្នុងវិស័យឧស្សាហកម្មនៅតែមាន ដូច្នេះការទិញលក់ដីធ្លីសម្រាប់បម្រើក្នុងវិស័យនេះ នៅតែមានហូរហែរ ។ ដោយឡែក ការទិញលក់ដីធ្លីក្នុងឆ្នាំ២០២៤ និងឆ្នាំ២០២៥នេះ ភាគច្រើនធ្វើឡើងនៅតំបន់ជាយក្រុង និងតំបន់ដែលមានតម្លៃដីទាប ជាពិសេសដីធ្លីសម្រាប់បម្រើក្នុងវិស័យឧស្សាហកម្ម ដូចជាសម្រាប់សាងសង់រោងចក្រ ឃ្លាំងស្តុកទំនិញ ជាដើម ហើយតម្លៃដីដែលមានការទិញលក់ច្រើនក្នុងរង្វង់១០ដុល្លារអាម៉េរិកក្នុងមួយម៉ែត្រការ៉េ ព្រោះការសាងសង់រោងចក្រ ឬឃ្លាំងស្តុកទំនិញ មិនអាចទិញដីដែលមានតម្លៃខ្ពស់មកសង់នោះទេ ។
សម្រាប់តំបន់កណ្ដាលក្រុងការប្រើប្រាស់ដីធ្លី គឺផ្ដោតទៅលើពាណិជ្ជកម្ម និងការរស់នៅ ពោលគឺការសាងសង់អគារខ្ពស់ពហុមុខងារ ដែលមានដូចជាខុនដូ អាផាតមិន អាគារការិយាល័យ និងសម្រាប់ធ្វើពាណិជ្ជកម្មផងដែរ ពីព្រោះដីនៅកណ្ដាលក្រុងមានតម្លៃថ្លៃដែលមិនអាចទិញយកមកសង់ជាលំនៅដ្ឋានផ្ទាល់ដីនោះទេ៕
Account
Security
Favourite Content