សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ កំណើននៃតម្រូវការ និងការផ្គត់ផ្គង់ការិយាល័យ (Office Space) ក្នុងរាជធានីភ្នំពេញ បានកើនឡើងជាបន្តបន្ទាប់ក្រោយវិបត្តិកូវីដ១៩ ដោយសហគ្រិន ឬម្ចាស់ក្រុមហ៊ុនជាច្រើន បានផ្លាស់ប្តូរពីការជួលផ្ទះល្វែង ផ្ទះវីឡា រាប់ទាំងសណ្ឋាគារមួយចំនួនផងនោះ ទៅជាការជួលអគារការិយាល័យស្តង់ដារជំនួសវិញ ។ ជាក់ស្ដែង នៅក្នុងឆ្នាំ២០២៤នេះ ការផ្គត់ផ្គង់ការិយាល័យជួលនៅក្នុងរាជធានីភ្នំពេញ រំពឹងថានឹងមានកំណើនប្រមាណជិត២០ម៉ឺនម៉ែត្រការ៉េបន្ថែមទៀតចាក់ចូលក្នុងទីផ្សាររួម ។
បើតាមរបាយការណ៍របស់ក្រុមហ៊ុន CBRE Cambodia បានបង្ហាញថា ជាទូទៅ ការផ្គត់ផ្គង់ការិយាល័យត្រូវបានបែងចែកជា៣កម្រិត រួមមានកម្រិត A, B, C ខណៈដែលកម្រិត C មានអត្រាផ្គត់ផ្គង់ច្រើនជាងគេ ហើយបន្ទាប់មកគឺកម្រិត B , ដោយឡែកចំណែកអគារការិយាល័យកម្រិត A មានតិចជាងគេក្នុងចំណោមទាំង៣កម្រិត ។ ប៉ុន្តែចូលមកដល់ឆ្នាំ២០២៤នេះ តាមរបាយការណ៍បានបង្ហាញថា ការិយាល័យទាំង ៣ កម្រិត មានទំហំប្រហាក់ប្រហែលគ្នាទៅវិញ ឬអាចនិយាយបានថា ខុសគ្នាតិចតួចប៉ុណ្ណោះ។
ក្នុងរបាយការណ៍បានបង្ហាញផងដែរថា តម្លៃនៃការជួលអគារការិយាល័យក្នុងឆមាសទី១ឆ្នាំ ២០២៤នេះ បើធៀបនឹងឆមាសទី១ឆ្នាំ ២០២៣ ឃើញថាមានការធ្លាក់ចុះបន្តិចបន្តួច ប៉ុន្តែកំណើននៃការប្រើប្រាស់ការិយាល័យស្តង់ដារមានការកើនឡើងជាងឆ្នាំ២០២៣ ។ បើប្រៀបធៀបនឹងប្រទេសជិតខាង ដូចជា ថៃ និងវៀតណាម ទាំងតម្រូវការ និងតម្លៃ ឃើញថានៅរាជធានីភ្នំពេញមានតម្លៃទាបជាងបាងកក និងនៅហូជីមិញ ហើយការប្រើប្រាស់វិញក៏មានអត្រាតិចជាងតំបន់ទាំងនោះដែរ ។
បើតាមរបាយការណ៍នេះឱ្យដឹងថា នៅក្នុងឆ្នាំ ២០២៤នេះ មានគម្រោងអគារការិយាល័យលេចធ្លោចំនួន៤គម្រោងនឹងរំពឹងបញ្ចប់នៅក្នុងឆ្នាំ ២០២៤នេះ ក្នុងនោះមានគម្រោង Versailles Square មានទីតាំងនៅតំបន់ខណ្ឌមានជ័យ គម្រោង Maline Office Park មានទីតាំងនៅចំការមន គម្រោង Chief Tower ស្ថិតនៅបឹងកេងកង និងគម្រោង អគារពន្ធដារ ( GDT Tower ) នៅក្នុងខណ្ឌជ្រោយចង្វារ ។
នៅដំណាច់ឆ្នាំ ២០២៤នេះ ការិយាល័យប្រមាណ ៣៥ភាគរយត្រូវបានរំពឹងថាគឺស្ថិតនៅក្នុងអគារពាណិជ្ជកម្មចម្រុះ ក៏ដូចជាអគារខុនដូផងដែរ ហើយក្រៅពីនេះក៏មាននៅក្នុងអគារពាណិជ្ជកម្មដែលមានផ្សារទំនើបនៅខាងក្រោមជាន់ផ្ទាល់ដី នៅក្នុងអគារខុនដូផង និងអគារការិយាល័យផ្ទាល់តែម្ដង ។
អ្នកជំនាញអចលនទ្រព្យជាច្រើនបានលើកឡើងថា តម្រូវការការិយាល័យចាប់ផ្ដើមមានកំណើននៅក្រោយវិបត្តិកូវីដ១៩ ពោលគឺនៅពេលដែលម្ចាស់អាជីវកម្មមួយចំនួនដែលបានផ្អាកដំណើរការចាប់ផ្តើមមានសកម្មភាពឡើងវិញ ជាពិសេស ប្រភេទអាជីវកម្មថ្មីៗចាប់បើកដំណើរការ និងមានតម្រូវការលើការិយាល័យកម្រិតស្តង់ដារ ខុសពីមុនដែលភាគច្រើនត្រូវការផ្ទះល្វែង ផ្ទះវីឡា ធ្វើជាការិយាល័យរបស់ខ្លួន។ កំណើននៃសហគ្រិនថ្មីៗទាំងក្នុងស្រុក និងមកពីក្រៅប្រទេសក៏បានធ្វើឱ្យតម្រូវការការិយាល័យកើនខ្ពស់ជាងឆ្នាំមុនៗផងដែរ ដូច្នេះហើយទើបអ្នកអភិវឌ្ឍន៍បានងាកមកស្វែងរកការវិនិយោគលើអគារការិយាល័យកាន់តែច្រើន ក្នុងនោះ ការិយាល័យកម្រិត A ក៏ឃើញមានតម្រូវការ និងការផ្គត់ផ្គង់ខ្ពស់ជាងមុន ផ្ទុយកាលពីមុនវិបត្តិកូវីដ១៩ ម្ចាស់ក្រុមហ៊ុនជាច្រើនបានជ្រើសរើសយកការិយាល័យកម្រិតC ជាទីតាំងការិយល័យរបស់ខ្លួន ៕
Account
Security
Favourite Content