សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី BBC បានរាយការណ៍ថា ប្រធានាធិបតីហ្វីលីពីន លោក Ferdinand Marcos Jr បានបញ្ជាឱ្យបិទបណ្តាញកាស៊ីណូអនឡាញ ដោយសារមានជាប់ពាក់ព័ន្ធទៅនឹងសកម្មភាពឧក្រិដ្ឋកម្មមួយចំនួន។
ប្រតិបត្តិករហ្គេមអនឡាញរបស់ហ្វីលីពីន ឬ Pogos ប្រមូលផ្តុំទៅដោយកាស៊ីណូអនឡាញដែលជាការលេងល្បែងខុសច្បាប់ ហើយអ្នកលេងភាគច្រើនមកពីចិនដីគោក។ មិនត្រឹមតែប៉ុណ្ណោះ កាស៊ីណូអនឡាញទាំងនោះត្រូវបានគេរកឃើញថា វាគឺជាប្រតិបត្តិការបិទបាំងលើសកម្មភាពខុសច្បាប់ រួមមាន ការឆបោកតាមទូរស័ព្ទរហូតដល់ការជួញដូរមនុស្ស។ កាស៊ីណូអនឡាញទាំងនោះបានចាប់ផ្តើមកើនឡើងកាន់តែខ្លាំងក្រោមការដឹកនាំរបស់អតីតប្រធានាធិបតីហ្វីលីពីន លោក Rodrigo Duterte ដែលបានជំរុញឱ្យមានទំនាក់ទំនងមិត្តភាពជាមួយប្រទេសចិនក្នុងអំឡុងពេលអាណត្តិរបស់លោក។
កាលពីថ្ងៃច័ន្ទកន្លងទៅនេះ នៅក្នុងសុន្ទរកថាប្រចាំឆ្នាំរបស់ប្រធានាធិបតីហ្វីលីពីន Ferdinand Marcos Jr បានអំពាវនាវឱ្យបញ្ឈប់សកម្មភាពដែលប្រមាថដល់ប្រទេស។ លោកបានលើកឡើងថា ការក្លែងបន្លំជាអង្គភាពស្របច្បាប់ ប្រតិបត្តិការរបស់ពួកគេបានប្រព្រឹត្តសកម្មភាពខុសច្បាប់ដែលឆ្ងាយបំផុតពីល្បែង ដូចជា ការឆបោកផ្នែកហិរញ្ញវត្ថុ ការលាងលុយកខ្វក់ ពេស្យាចារ ការជួញដូរមនុស្ស ការចាប់ជំរិត ការធ្វើទារុណកម្មដ៏ឃោរឃៅ និងឈានដល់ឃាតកម្ម។ កាលពីថ្ងៃអង្គារ និយតករហ្គេមរបស់ហ្វីលីពីនបាននិយាយថា ពួកគេនឹងលុបចោលនូវអាជ្ញាប័ណ្ណរបស់ Pogos និងបញ្ឈប់វិស័យនេះនៅចុងឆ្នាំ។
យោងតាមការប៉ាន់ប្រមាណរបស់រដ្ឋាភិបាលហ្វីលីពីនបានឲ្យដឹងថា ឧស្សាហកម្ម pogo មានបុគ្គលិកចំនួន ៤ ម៉ឺននាក់ដោយផ្ទាល់ និងដោយប្រយោល ហើយត្រូវបានបង្កើតឡើងជាង ៤០០ អាជីវកម្មទាំងមានអាជ្ញាប័ណ្ណ និងគ្មានអាជ្ញាប័ណ្ណ។ ឧស្សាហកម្មនេះត្រូវបានប៉ាន់ស្មានថា រកប្រាក់ចំណូលប្រមាណជាង ១៦៦,៥ ពាន់លានប៉េសូ (២,៩ ពាន់លានដុល្លារ) ក្នុងមួយឆ្នាំដោយគិតទាំងចំណូលពន្ធ និងហ្គេម។
ទន្ទឹមនឹងនេះ BBC បានទាក់ទងអាជីវកម្ម និងបុគ្គលិកដែលមានទំនាក់ទំនងជាមួយ Pogos ប៉ុន្តែពួកគេបានបដិសេធមិនធ្វើអត្ថាធិប្បាយទេ។ នាពេលថ្មីៗនេះ ទំនាក់ទំនងរវាង Pogos និងរង្វង់ឧក្រិដ្ឋជនបានស្ថិតនៅក្រោមការយកចិត្តទុកដាក់របស់រដ្ឋាភិបាលហ្វីលីពីនបន្ទាប់ពីប្រតិបត្តិការ Pogo នៅក្នុងទីក្រុងតូចមួយត្រូវបានគេរកឃើញថាជាមជ្ឈមណ្ឌលឆបោក។ អភិបាលក្រុងម្នាក់ឈ្មោះថា Alice Guo ត្រូវបានចោទប្រកាន់ថាជាគិញសម្ងាត់សម្រាប់ប្រទេសចិន ហើយបច្ចុប្បន្នត្រូវបានគេជឿថាកំពុងលាក់ខ្លួន។ Pogos ក៏ត្រូវបានភ្ជាប់ទៅនឹងមន្ទីរពេទ្យដោយសម្ងាត់ផងដែរ ដោយអាជ្ញាធរបាននិយាយថា មន្ទីរពេទ្យបែបនេះកំពុងផ្តល់សេវាកម្មរបស់ពួកគេដល់អ្នកធ្វើការនៅក្នុងកាស៊ីណូអនឡាញខុសច្បាប់ទាំងនេះ ដោយផ្តល់សេវាកម្មវះកាត់កែសម្ផស្សដល់ជនរត់គេចខ្លួន និងបុគ្គលិកមជ្ឈមណ្ឌលឆបោកដើម្បីជួយពួកគេឱ្យគេចពីការចាប់ខ្លួន។
ចាប់តាំងពីឡើងកាន់តំណែងជាប្រធានាធិបតីមក លោក Marcos បានបង្វែរទិសដៅរបស់ទីក្រុងម៉ានីលពីប្រទេសចិន ហើយបានខិតទៅជិតសហរដ្ឋអាមេរិក ដែលជាសម្ព័ន្ធមិត្តប្រវត្តិសាស្ត្ររបស់ហ្វីលីពីន។ អ្នកវិភាគខ្លះមើលឃើញថា ការហាមឃាត់នេះក៏អាចជាការប៉ុនប៉ងមួយទៀតក្នុងការធ្វើឲ្យហ្វីលីពីនឃ្លាតឆ្ងាយពីចិន។ បច្ចុប្បន្ននេះ ប្រទេសទាំងពីរកំពុងជាប់គាំងនៅក្នុងជម្លោះទឹកដីជុំវិញសមុទ្រចិនខាងត្បូង ជាមួយនឹងភាពតានតឹងកាន់តែខ្លាំងឡើងក្នុងប៉ុន្មានខែថ្មីៗនេះ។
លោក Jean Encinas-Franco សាស្ត្រាចារ្យនៅសាកលវិទ្យាល័យហ្វីលីពីន Diliman បានលើកឡើងថា វត្តមានរបស់ Pogos លែងក្លាយជាបញ្ហាប្រឈមនឹងច្បាប់ និងសណ្តាប់ធ្នាប់របស់ហ្វីលីពីន ទៀតហើយ ដោយសារការកាន់កាប់បន្តិចម្ដងៗរបស់ចិនដែលភ្ជាប់ជាមួយប្រជាជនហ្វីលីពីនត្រូវបានកាត់បន្ថយបន្តិចម្ដងៗ។ យ៉ាងណាមិញ ចំណាត់ការរបស់លោក Marcos អាចបង្កើនប្រជាប្រិយភាពរបស់លោកមុនពេលការបោះឆ្នោតពាក់កណ្តាលអាណត្តិនៅឆ្នាំ២០២៥ ។ ទន្ទឹមនឹងនេះ ការរហាមឃាត់នេះត្រូវបានអបអរសាទរដោយប្រជាជនហ្វីលីពីន។ លោក Alferdo Pascual រដ្ឋលេខាធិការពាណិជ្ជកម្មហ្វីលីពីន បានប្រាប់ប្រព័ន្ធផ្សព្វផ្សាយក្នុងស្រុកថា ការហាមឃាត់នេះនឹងធ្វើឱ្យហ្វីលីពីនកាន់តែមានភាពទាក់ទាញសម្រាប់ភ្ញៀវទេសចរណ៍ឡើងវិញ ដោយសារតែវត្តមាន Pogo បង្កើតចំណាប់អារម្មណ៍មិនល្អដល់បណ្តាទេសចរ ព្រោះវាបានបង្កអំពើហិង្សា និងប៉ះពាល់ដល់មូលដ្ឋានសីលធម៌នៃប្រទេស៕
Account
Security
Favourite Content