សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈប្រមាណជិត១ឆ្នាំមកនេះ ពោល គឺក្នុងឆ្នាំ២០២៥ ទូទាំងខេត្តពោធិ៍សាត់ បានអនុញ្ញាតសាងសង់សំណង់ ទាំងដែនសមត្ថកិច្ចរដ្ឋបាលខេត្ត និងដែនសមត្ថកិច្ចរបស់រដ្ឋបាលក្រុង/ស្រុក សរុបចំនួន៥៥គម្រោង និងគិតជាទឹកប្រាក់ប្រមាណ ១៦លានដុល្លារអាម៉េរិក ។ នេះបើតាមរបាយការណ៍របស់មន្ទីររៀបចំដែនដី នគរូបនីយកម្ម សំណង់ និងសុរិយដី ខេត្តពោធិ៍សាត់ ។
នៅក្នុងរបាយការណ៍បានបង្ហាញថា សំណង់ដែលមានការអនុញ្ញាតសាងសង់ជាសមត្ថកិច្ចរបស់រដ្ឋបាលខេត្តមានចំនួន២០គម្រោង មានផ្ទៃក្រឡាសំណង់ ៤២ ៩៧៣ម៉ែត្រក្រឡា មានទុនវិនិយោគសរុបចំនួន ១៣ ៣៦៧ ១០០ដុល្លារអាម៉េរិក ។ ចំណែកសំណង់មានការអនុញ្ញាតសាងសង់ជាសមត្ថកិច្ចរបស់រដ្ឋបាលក្រុង/ស្រុក មានចំនួន ៣៥គម្រោង មានផ្ទៃក្រឡាសំណង់ ៨ ៨៧១ម៉ែត្រក្រឡា និងមានទុនវិនិយោគចំនួន ២ ៦៣៣ ៣៨៩ដុល្លារអាម៉េរិក ។
ក្នុងឆ្នាំ២០២៥នេះ អាជ្ញាធរក៏បានរកឃើញសំណង់គ្មានការអនុញ្ញាតសាងសង់ដែលស្ថិតនៅក្រោមសមត្ថកិច្ចរបស់រដ្ឋបាលក្រុង មានចំនួន១៨គម្រោងផងដែរ ខណៈក្នុងដែនសមត្ថកិច្ចរបស់រដ្ឋបាលខេត្តគឺមិនមានសំណង់ដែលគ្មានការអនុញ្ញាតសាងសង់នោះឡើយ ។ ក្រៅពីការងារសំណង់នេះដែរ មន្ទីររៀបចំដែនដីនគរូបនីយកម្មសំណង់ និងសុរិយោដីខេត្តពោធិ៍សាត់ ក៏បានបង្ហាញលទ្ធផលពាក់ព័ន្ធនឹងការងារដីធ្លី ក្នុងរយៈពេល៣ត្រីមាស ក្នុងនោះរួមមាន ការវិនិច្ឆ័យដីសរុបបានចំនួន ៤២ ១០៣ក្បាលដី វាស់វែងសរុបបានចំនួន ៤៩ ១៧៦ក្បាលដីបន្ថែមទៀត និងបញ្ចូលទិន្នន័យសរុបប្រមាណ៣៦ ១៧៦ក្បាលដី ។
ក្រៅពីនេះដែរ ក្រុមការងារក៏បានគូរក្បាលដីបន្ថែមបានចំនួន ២០ ៤៦០ក្បាលដី ហើយបានបិទផ្សាយជាសាធារណៈចំនួន១៨ភូមិ ស្មើនឹង ១៨ ១៧៧ក្បាលដី និងបានប្រគល់វិញ្ញាបនបត្រសម្គាល់ម្ចាស់អចលនវត្ថុកម្មសិទ្ធិករជូនពលរដ្ឋបានចំនួន ១៥ ១៣៩បណ្ណ ។
គួររម្លឹកថា ពោធិ៍សាត់ជាខេត្តដែលមានសក្ដានុពលខ្ពស់មួយក្នុងការទាក់ទាញការវិនិយោគក្នុងនិងក្រៅប្រទេស ខណៈថ្មីៗនេះមានគម្រោងវិនិយោគមួយចំនួនបានលេចរូបរាងជាបន្តបន្ទាប់ ជាពិសេសតាមបណ្ដោយផ្លូវជាតិលេខ៥ ។ ការណ៍នេះ បានជំរុញឱ្យរដ្ឋបាលខេត្តក៏ដូចជាស្ថាប័នពាក់ព័ន្ធ ត្រូវរៀបចំដីធ្លី និងសណ្ដាប់ធ្នាប់ដើម្បីទាក់ទាញអ្នកវិនិយោគក្នុងនិងក្រៅប្រទេសបន្ថែមចូលទៅកាន់ខេត្តពោធិ៍សាត់ដើម្បីដំណើរការវិនិយោគ ។
នៅក្នុងរបាយការណ៍ លោក ឱន សទ្ធា ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តពោធិ៍សាត់ លើកឡើងថា ដើម្បីជាកិច្ចតបស្នងចំពោះចំការយកចិត្តទុកដាក់ដ៏ខ្ពង់ខ្ពស់ពីសំណាក់ថ្នាក់ដឹកនាំក្រសួងរៀបចំដែនដី នគរូបនីយកម្មនិងសំណង់ ក៏ដូចជារដ្ឋបាលខេត្តពោធិ៍សាត់ មន្ទីរសុរិយោដីខេត្ត នឹងបន្តខិតខំយកចិត្តទុកដាក់អស់ពីកម្លាំងកាយចិត្ត និងប្រាជ្ញាស្មារតីដែលមាន ជំរុញការចុះបញ្ជីដីឱ្យបានបញ្ចប់ ទូទាំងខេត្តពោធិ៍សាត់នៅឆ្នាំ២០២៥នេះ ពង្រឹងការផ្ដល់សេវាសាធារណៈជូនប្រជាពលរដ្ឋឱ្យកាន់តែប្រសើរ ស្របតាមគោល នយោបាយរបស់ក្រសួង គឺសេវាគាប់ចិត្ត បរិយាកាសគ្មានវិវាទ និងខិតខំសហការដោះស្រាយវិវាទដែលនៅសេសសល់ដើម្បីភាពសុខសាន្តរបស់ប្រជាពលរដ្ឋ ។
ឯកឧត្តមឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ជានិច្ចកាល តែងតែបានលើកឡើង និងជំរុញការងារវាស់វែងដីធ្លី ចុះបញ្ជី ឱ្យបានចប់ឆាប់ និងចេញបណ្ណជូនពលរដ្ឋ ដើម្បីបញ្ចប់វិវាទនៅទូទាំងប្រទេស បង្កើតបរិយាកាសគ្មានវិវាទ និងរៀបចំតំបន់ទីប្រជុំជន ក៏ដូចជាក្រុង ស្រុក នៅទូទាំងប្រទេសឱ្យមានសណ្ដាប់ធ្នាប់ ក្នុងគោលបំណងលើកកម្ពស់សុខុមាលភាពរបស់ប្រជាពលរដ្ឋទូទាំងប្រទេស៕
Account
Security
Favourite Content