ព្រះសីហនុ ៖ ក្នុងរយៈពេល​២ឆ្នាំ នៃការអនុវត្ត​កម្មវិធីពិសេសជំរុញការ​វិនិយោគខេត្តព្រះសីហនុ មានគម្រោង​ចំនួន​៤១២​គម្រោង​ ទទួលបានការលើកទឹកចិត្តពិសេសពីរាជរដ្ឋាភិបាល ជាមួយទុនវិនិយោគប្រមាណជាង ៧ ៩០០ លានដុល្លារអាម៉េរិក ។ ​នេះបើតាម​សេចក្ដីប្រកាសព័ត៌មាន​ក្រោយ​កិច្ច​ប្រជុំ​បូ​កសរុប​ និងវាយតម្លៃ​របស់​ក្រុមការងារនៃកម្មវិធីពិសេស​ជំរុញការ​វិនិយោគខេត្តព្រះសីហនុ កាលពីសប្ដាហ៍កន្លងទៅនេះ ។​

នៅក្នុងកិច្ច​ប្រជុំ​ ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ​ក្រសួង​សេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងខេត្តព្រះសីហនុ បានមានប្រសាសន៍ថា ក្នុងរយៈពេល ២ឆ្នាំ គឺ ២០២៤-២០២៥ ក្រុមការងារបានសម្រេចជាគោលការណ៍ផ្ដល់ការលើកទឹកចិត្ត លើការអនុគ្រោះ សម្រួលនីតិវិធី និងការដោះស្រាយវិវាទសរុបចំនួន ៤១២ គម្រោង ជាមួយទុនវិនិយោគប្រមាណ ៧ ៩៧១ លានដុល្លារអាម៉េរិក ដោយអាចបង្កើតការងារបានប្រមាណ ៥២ ០០០ កន្លែង ។

ឯកឧត្តម​បន្តថា សម្រាប់​ក្នុងឆ្នាំ២០២៥ ក្រុមការងារបានសម្រេចផ្តល់គោលការណ៍លើកទឹកចិត្តពិសេស ចំនួន ១៩៩ គម្រោង ស្មើនឹង ១៣៣ភាគរយ​ លើសគោលដៅសូចនាករសមិទ្ធកម្មដែលបានកំណត់ត្រឹម ១៥០ គម្រោង ក្នុងនោះ គម្រោងពាក់ព័ន្ធនឹងអគារកំពុងជាប់គាំងមានចំនួន ៩២ គម្រោង គម្រោងពុំពាក់ព័ន្ធនឹងអគារជាប់គាំង (គម្រោងថ្មី) ចំនួន ៩០ គម្រោង ការពង្រីកគម្រោង ចំនួន ៩ គម្រោង និង គម្រោងវិនិយោគ/ធុរកិច្ចដែលមានស្រាប់ ចំនួន ៨ គម្រោង ដោយគ្របដណ្តប់លើវិស័យអចលនទ្រព្យ, ឧស្សាហកម្ម, ទេសចរណ៍ អប់រំ ។ល។ ក្រៅពីនេះ ក្រុមការងារបានអនុវត្តវិធានការនានា ដោយរលូន ស្របតាមកម្មវិធីពិសេស ដោយមានកិច្ចសហការខ្ពស់ និងការចូលរួមយ៉ាងសកម្មរបស់ក្រសួង-ស្ថាប័ន និងរដ្ឋបាលខេត្តព្រះសីហនុ ស្របតាមអភិក្រម “ជវភាពនៃប្រព័ន្ធតួអង្គតែមួយ” ។

ឯកឧត្តមបណ្ឌិតសភាចារ្យ បានមានប្រសាសន៍បន្ថែមថា ដោយផ្អែកលើកិច្ចខិតខំប្រឹងប្រែង និងលទ្ធផលសម្រេចបានទំាងនេះ រាជរដ្ឋាភិបាលបានសម្រេចបន្តអនុវត្តកម្មវិធីពិសេសនេះរយៈពេល ២ ឆ្នាំបន្ថែមទៀត រហូតដល់ដំណាច់ឆ្នាំ២០២៧ ដោយរក្សាវិធានការដដែល និងបន្ថែមវិធានការចំនួន ៤ ទៀត រួមមាន ១). សម្របសម្រួល និង ជំរុញការវិនិយោគក្នុងស្រុក, ២). សម្របសម្រួលការបណ្តុះបណ្តាលជំនាញដល់វិនិយោគិន ធុរជន និយោជិត និង កម្មករ, ៣). ជំរុញការប្រើប្រាស់កម្លាំងពលកម្មក្នុងស្រុក, ការផ្ទេរជំនាញ, បច្ចេកវិទ្យា និង ៤). ជំរុញការប្រើប្រាស់ធាតុផ្សំ និង ទំនិញដែលផលិតក្នុងស្រុក នៅតាមសហគ្រាស និង រោងចក្រ ក្នុងខេត្តព្រះសីហនុ ដោយសហការជាមួយក្រសួង-ស្ថាប័នមានសមត្ថកិច្ច និង រដ្ឋបាលខេត្តព្រះសីហនុ ។

សូមជម្រាបជូនថា សម្រាប់រយៈពេល ២ ឆ្នាំ (២០២៤-២០២៥) ក្នុងចំណោម ៤១២ គម្រោង ដែលបានទទួលគោលការណ៍លើកទឹកចិត្តពិសេស គម្រោងដែលបញ្ចប់ការសាងសង់ ជួសជុល និង/ឬ កែលម្អរួចរាល់ មាន ១៣៤ គម្រោង ស្មើនឹង ៣៣ភាគរយ គម្រោងដែលកំពុងអនុវត្តការសាងសង់ ជួសជុល និង/ឬ កែលម្អ មាន ១៦២ គម្រោង ស្មើនឹង ៣៩ភាគឬយ និង គម្រោងដែលមិនទាន់ចាប់ផ្ដើមដំណើរការសាងសង់ ជួសជុល និង/ឬ កែលម្អ មាន ១១៦ គម្រោង ស្មើនឹង ២៨ភាគរយ ។

តាមការ​សង្កេតជាក់ស្ដែង អគារ​ដែលជាប់គាំង​ក្នុង​ខេត្តព្រះសីហនុ ជាច្រើន​បាន​ចាប់ផ្ដើម​ដំណើរការឡើង​វិញ ដោយអគា​រដែលមិនទាន់​បញ្ចប់​ក៏រកឃើញ​អ្នកវិនិយោគ​ថ្មីមក​បន្ត​និង​បញ្ចប់គម្រោងអគារ​នោះ ហើយអគារ​ដែលមិនមានប្រតិបត្តិការ ក៏បានធ្វើប្រតិបត្តិការ​ ធ្វើឱ្យ​ខេត្តព្រះសីហនុ​មានសកម្មភាពសេដ្ឋកិច្ច​ល្អប្រសើរ​ឡើង​វិញ ។

ក្រៅពីនេះ មានបណ្ដាវិនិយោគិន​ក្នុងនិងក្រៅប្រទេសជាច្រើន​ជាពិសេសមកពីប្រទេស​ចិន បាន​ចាប់អារម្មណ៍​ក្នុងការ​ដាក់ទុនវិនិយោគបន្ថែមនៅក្នុង​ខេត្តព្រះសីហនុ​ លើ​វិស័យឧស្សាហកម្ម ជាក់ស្ដែង​មាន​ក្រុមហ៊ុនចិន​មួយចំនួន​ហើយ​បានកំពុង​ដំណើរការ​វិនិយោគដូចជា​រោងចក្រ​ដំឡើង​រថយន្ត​អគ្គិសនី BYD និង​ក្រុមហ៊ុន​មួយ​ចំនួនទៀត ។ កម្ពុជាក៏រំពឹងថា​នឹង​ពេល​ខាងមុខនេះ នឹង​មានក្រុមហ៊ុនមកពីចិន​បន្ថែមទៀត​ចូលមក​បណ្ដាក់ទុនវិនិយោគនៅខេត្តព្រះសីហនុ ក្នុងតំបន់សេដ្ឋកិច្ចពិសេស​ក្រុងព្រះសីហនុ និង​តំបន់​សេដ្ឋកិច្ចពិសេស​ផ្សេងទៀត ៕