ភ្នំពេញ ៖ គិតត្រឹមដើមឆ្នាំ២០២៦​នេះ កម្មវិធីពិសេស​ជំរុញការ​វិនិយោគដែល​រាជរដ្ឋាភិបាលបានប្រកាស​ឱ្យអនុវត្ត​ន៍លើតំបន់សក្ដានុពលចំនួន​ពីរ ដែលស្ថិតនៅប៉ែកនិរតី និងភាគឦសាន កំពុង​ទាក់ទាញបានការ​ចាប់អារម្មណ៍ពីសំណាក់​វិនិយោគិនទាំងក្នុង និងក្រៅ​ប្រទេស ហើយក៏មានគម្រោងតូចធំជាច្រើន​ចាប់ផ្ដើម​ចូលទៅកាន់តំបន់ទាំង​នោះ ដើម្បីស្នើសុំ​ការលើកទឹកចិត្តពិសេស​​ទៅលើ​គម្រោង​វិនិយោគរបស់ខ្លួន​ ។​

កម្មវិធីជំរុញការ​វិនិយោគ​ត្រូវបានរាជរដ្ឋាភិបាល​ប្រកាស​ឱ្យ​អនុវត្ត​ន៍​លើខេត្តព្រះសីហនុ និង​តំបន់​ភូមិភាគ​ឦសាន​ ដែលគ្របដណ្ដប់លើខេត្តចំនួន៤ រួមមាន ខេត្ត​ក្រចេះ ស្ទឹងត្រែង មណ្ឌលគិរី និង​រតនគិរី ដោយមាន​គម្រោង​ជាច្រើន​បានដាក់​ពាក្យស្នើ​សុំ​លើកទឹកចិត្តពីរាជរដ្ឋាភិបាល ។​

សម្រាប់កម្មវិធីពិសេស​ជំរុញការ​វិនិយោគនៅខេត្តព្រះសីហនុ គិតចាប់តាំងពីរាជរដ្ឋាភិបាលប្រកាស​ឱ្យ​អនុវត្ត​ន៍នៅដើមឆ្នាំ២០២៤ មានរយៈពេល២ឆ្នាំមកហើយ និងបានលើកទឹកចិត្ត​ដល់​គម្រោងវិនិយោគ​សរុបចំនួន ៤១២គម្រោង​ជាមួយនឹង​ទុនវិនិយោគ​ប្រមាណ ៧៩៧១លានដុល្លារអាមេរិក​។ ដោយឡែក នៅដើមឆ្នាំ២០២៦នេះ ក៏មានគម្រោង​ចំនួន​២៤​បន្ថែមទៀត ត្រូវ​បាន​រាជរដ្ឋាភិបាល​តាមរយៈ​ក្រុមការងារជំរុញការ​វិនិយោគ​ខេត្តព្រះសីហនុសម្រេច​ផ្ដល់ការលើកទឹកចិត្ត​ ជាមួយនឹងទុនវិនិយោគប្រមាណ២០៨លានដុល្លារអាមេរិក​ ក្នុង​ចំណោម​គម្រោង​២៥​គម្រោង ​មានទុន​១ ០១៧​លានដុល្លារអាមេរិក​ដែលបានដាក់ពាក្យស្នើសុំការ​លើកទឹកចិត្ត ។

តាមរយៈការ​វិនិយោគនេះដែរ បាន​បង្កើតការងារ​ជូន​ប្រជាពលរដ្ឋ រាប់ម៉ឺនកន្លែង ជាក់ស្ដែង​ក្នុងសម្រាប់គម្រោងទាំង​៤១២​គម្រោងដែលទទួលបានការ​លើកទឹកចិត្តពិសេស​ពីរាជរដ្ឋាភិបាល​នេះ បានបង្កើតការងារ​បានប្រមាណជាង​ ៥ម៉ឺន​កន្លែង ដែលអាច​ឱ្យពលរដ្ឋទទួលបានប្រាក់ចំណូល​សម្រាប់ផ្គត់ផ្គង់​ជីវភាពលើកស្ទួយសេដ្ឋកិច្ច​គ្រួសារ ។

ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការ​ក្រសួង​សេដ្ឋកិច្ច​ និងហិរញ្ញវត្ថុ បានមានប្រសាសន៍ថា ដោយផ្អែកលើកិច្ចខិតខំប្រឹងប្រែង និងលទ្ធផលសម្រេចបានទំាងនេះ រាជរដ្ឋាភិបាលបានសម្រេចបន្តអនុវត្តកម្មវិធីពិសេសនេះរយៈពេល ២ឆ្នាំបន្ថែមទៀត រហូតដល់ដំណាច់ឆ្នាំ២០២៧ ។ ជាមួយនេះ ឯកឧត្តមបណ្ឌិតសភាចារ្យ បានដាក់ចេញទិសដៅការងារបន្ត ក្នុងឆ្នាំ២០២៦ និង ២០២៧ សម្រាប់ក្រុមការងារដើម្បីអនុវត្ត ព្រមទាំងណែនាំឱ្យលេខាធិការដ្ឋានក្រុមការងារ បន្តកិច្ចខិតខំប្រឹងប្រែងបំពេញភារកិច្ច និង យកចិត្តទុកដាក់ខ្ពស់ក្នុងការសហការជាមួយក្រសួង-ស្ថាប័ន និងរដ្ឋបាលខេត្ត ។

ដោយឡែក​ សម្រាប់កម្មវិធីពិសេសជំរុញការ​វិនិយោគនៅភូមភាគឦសាន​ក៏ទាក់ទាញ​បានគម្រោង​វិនិយោគជាច្រើន​ចូលទៅកាន់​ទីនោះដែរ ដោយមានក្រុមហ៊ុន និងគម្រោងវិនិយោគជាច្រើនបានដាក់ស្នើសុំ​ដើម្បីលើកទឹកចិត្តពិសេស​ពីរាជរដ្ឋាភិបាល ។ កម្មវិធីពិសេស​ជំរុញការវិនិយោគនៅតំបន់​នេះ ត្រូវបានរាជរដ្ឋាភិបាលប្រកាស​ឱ្យ​អនុវត្ត​ន៍កាលពីអំឡុងខែមេសា​ ឆ្នាំ២០២៥ ។

បើតាម​ក្រុមការងារជំរុញការ​វិនិយោគភូមិភាគឦសាន បានបង្ហាញរបាយការណ៍ឱ្យឃើញថា មានគម្រោង​ទាំងចាស់ និងថ្មី​បានដាក់ពាក្យស្នើសុំ​លើកទឹកចិត្ត​ពិសេស ហើយ​រាជរដ្ឋាភិបាលតាមរយៈក្រុមការងារ​នេះ​ បានសម្រេចផ្ដល់​ការ​លើកទឹកចិត្ត​ជា​បន្តបន្ទាប់​ក្រោយចុះពិនិត្យសិក្សាពីសកម្មភាព និងទិដ្ឋភាពជាក់ស្ដែងដល់ទីតាំងផ្ទាល់ ។

ឯកឧត្តម​ វ៉ា ថន​ អភិបាលខេត្ត​ក្រចេះ បានថ្លែងថា ដើម្បី​សម្រួលដល់ការវិនិយោគរបស់វិនិយោគក្នុង​ខេត្ត​ក្រចេះ ក៏ដូចជា​ដើម្បីទាក់ទាញគម្រោង​វិនិយោគថ្មីៗជា​បន្តបន្ទាប់ទៀត អាជ្ញាធរបានជួយ​សម្របសម្រួល​​​ធ្វើយ៉ាងណាឱ្យការ​វិនិយោគកាន់តែរលូន ដោយបានចាត់ក្រុមការងារ​ចុះ​សម្របសម្រួល​នីតិវិធី​ និង​រង់ចាំកិច្ច​សហការ​ជានិច្ចជាមួយក្រុមការ​ងារ​ជំរុញការវិនិយោគភូមិភាគឦសាន គឺ​បង្កលក្ខណៈងាយស្រួលដល់​វិនិយោគិនដែល​ចូលមកកាន់ខេត្ត​ក្រចេះ ៕