សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងអភិវឌ្ឍន៍ព្រលានយន្តហោះខេត្តមណ្ឌលគិរី កាលពីអំឡុងឆ្នាំ២០២៩ ធ្លាប់មានក្រុមហ៊ុនចិនមួយបានសិក្សាលម្អិត និងមានផែនការវិនិយោគ អភិវឌ្ឍន៍រួចរាល់ហើយ ប៉ុន្តែដោយសារតែវិបត្តិជំងឺកូវីដ១៩ រាតត្បាតទូទាំងសាកល រាប់ទាំងកម្ពុជាផងដែរនោះ បានធ្វើឱ្យក្រុមហ៊ុនចិនពន្យារពេលអភិវឌ្ឍន៍រហូតមកដល់ពេលបច្ចុប្បន្ន។ យ៉ាងណាក៏ដោយ កាលពីពេលថ្មីៗនេះ ថ្នាក់ដឹកនាំខេត្តភាគឦសានមួយនេះបានប្រាប់ឱ្យថា មានក្រុមហ៊ុនកូរ៉េថ្មីមួយទៀតបានចុះមកសិក្សាពីសក្ដានុពល និងលទ្ធភាពក្នុងការវិនិយោគជាថ្មី។
យោងតាមឯកឧត្តម ងិន សុវិមាន អភិបាលរងខេត្តមណ្ឌលគិរី បានឱ្យដឹងថា គម្រោងព្រលានយន្តហោះខេត្តមណ្ឌលគិរី បច្ចុប្បន្ននេះ មានក្រុមហ៊ុនថ្មីមួយមកពីប្រទេសកូរ៉េបានចុះមកសិក្សាជាថ្មី ខណៈកាលពីមុន គម្រោងនេះធ្លាប់មានក្រុមហ៊ុនចិនមួយបានសិក្សា និងវាយតម្លៃរួចរាល់ហើយ ប៉ុន្តែក្រោយមកក៏ស្ងាត់ទៅវិញចំពេលស្ថានភាពនៃវិបត្តិកូវីដ១៩មកដល់ ធ្វើឱ្យក្រុមការងាររបស់ក្រុមហ៊ុនសិក្សាគម្រោងប្លង់នោះត្រូវអាក់ខានមិនបានមកកម្ពុជាដើម្បីបន្ត ។
ឯកឧត្តមបន្តថា ៖
«ពីមុនមានក្រុមហ៊ុនចិនមួយបានចុះមកសិក្សាគម្រោងព្រលានយន្តហោះមណ្ឌលគិរីរួចហើយក៏បាត់ដំណឹងទៅវិញ ទើបតែថ្មីៗនេះ មានក្រុមហ៊ុនកូរ៉េមួយក្រុមទៀតបានចុះមកមើលគម្រោងនេះ ប៉ុន្តែមិនទាន់លេចចេញជារូបទេ គ្រាន់តែបានជួបជាមួយថ្នាក់ដឹកនាំខេត្តប៉ុណ្ណោះ និងបានត្រលប់ទៅវិញ ដោយបានសន្យាថានឹងត្រលប់មកវិញម្ដងទៀតនៅពេលឆាប់ៗនេះ»។
ជុំវិញបញ្ហានេះដែរ ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរស៊ីវិល បានមានប្រសាសន៍ថា ពាក់ព័ន្ធនឹងគម្រោងអភិវឌ្ឍន៍ព្រលានយន្តហោះខេត្តមណ្ឌលគិរី មានខ្លះពិត ខ្លះមិនពិត។
ឯកឧត្តមបញ្ជាក់ថា ៖
«ខ្ញុំសុំមិនចង់បកស្រាយច្រើនទេ រង់ចាំច្បាស់ការនៅពេលណាចាំលម្អិតនៅពេលនោះ ប៉ុន្តែលោកបានប្រាប់ថា ពេលខ្លះគម្រោងមិនទាន់ចេញជារូបរាង ឬមិនទាន់មានព័ត៌មានច្បាស់ការ តែមានអ្នកលក់ដីធ្លី អ្នករកស៊ីខាងវិស័យដីធ្លី បំប៉ោងថាមានគម្រោងនេះ គម្រោងនោះ ដើម្បីឱ្យដីរបស់គេឡើងថ្លៃ»។
គួរបញ្ជាក់ថា កាលអំឡុងចុងឆ្នាំ២០២១ ឬដើមឆ្នាំ២០២២ ដីធ្លីនៅក្នុងខេត្តមណ្ឌលគិរី មានការចាប់អារម្មណ៍ពីសំណាក់អ្នកវិនិយោគ និងមានសកម្មភាពទិញលក់ច្រើនគួរសម ដែលក្នុងនោះមានទាំងអ្នកនៅក្នុងខេត្ត អ្នកពីបណ្តាខេត្តផ្សេងៗ រួមទាំងអ្នកវិនិយោគនៅក្នុងរាជធានីភ្នំពេញផងដែរ។ តាមរយៈសកម្មភាពនៃការទិញលក់ដីធ្លីទាំងនេះបានធ្វើឱ្យតម្លៃដីធ្លីនៅមណ្ឌលគិរីហក់ឡើងខ្លាំង ជាពិសេសនៅជុំវិញតំបន់គម្រោងអភិវឌ្ឍន៍ព្រលានយន្តហោះ និងតំបន់ជាប់ព្រំដែន។
យ៉ាងណាក៏ដោយ បើតាមការឱ្យដឹងពីមន្ត្រីសាលាខេត្តមណ្ឌលគិរី បានបញ្ជាក់ឱ្យដឹងថា បច្ចុប្បន្ននេះ នៅក្នុងខេត្តមានគម្រោងវិនិយោគ និងអភិវឌ្ឍន៍ថ្មីៗច្រើន ទាំងគម្រោងបែបរីហ្សត និងគម្រោងលើវិស័យកសិកម្ម ដូចជាចំការដំណាំកាហ្វេ ម្រេច កៅស៊ូ និងបន្លែ ហើយក៏មានគម្រោងវិនិយោគលើវិស័យកសិ-ឧស្សាហកម្មផងដែរ៕
Account
Security
Favourite Content