សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ ខេត្តពោធិ៍សាត់ កាន់តែទទួលបានការចាប់អារម្មណ៍ខ្ពស់ពីសំណាក់វិនិយោគិនទាំងក្នុង និងក្រៅប្រទេស ដោយក្នុងនោះមានគម្រោងបង្កើតរោងចក្រ សហគ្រាសធុនធំៗជាច្រើនចាប់ផ្ដើមដំណើរការផលិតនៅក្នុងទឹកដីនៃខេត្តមួយនេះ។ ជាក់ស្ដែងនៅអំឡុងពាក់កណ្ដាលខែកញ្ញា ឆ្នាំ២០២៤នេះ រោងចក្រដ៏ធំមួយរបស់ជប៉ុននឹងបើកការដ្ឋានសាងសង់នៅក្នុងទឹកដីខេត្តពោធិ៍សាត់ដើម្បីដំណើរការខ្សែច្រវាក់ផលិតកម្ម ។
ជាការកត់សម្គាល់ និងចាប់អារម្មណ៍លើទឹកដីខេត្តពោធិ៍សាត់ គឺចាប់តាំងពីផ្លូវជាតិលេខ៥ ត្រូវបានសាងសង់រួចរាល់ និងបានប្រកាសដាក់ឱ្យប្រើប្រាស់ជាផ្លូវការ គេឃើញមានក្រុមហ៊ុនធំៗជាបន្តបន្ទាប់បានដំណើរការវិនិយោគនៅក្នុងខេត្តពោធិ៍សាត់ ដូចជា ក្រុមហ៊ុន RMA Cambodia បានបង្កើតរោងចក្រដំឡើងរថយន្តម៉ាក Ford រោងចក្រដំឡើងរថយន្តអគ្គិសនីសម្រាប់ដឹកទំនិញ ជាពិសេសនៅអំឡុងពាក់កណ្ដាលខែកញ្ញា នេះ រោងចក្រ Minebea ដែលកំពុងមានប្រតិបត្តិការនៅក្នុងតំបន់សេដ្ឋកិច្ចពិសេសរ៉ូយ៉ាល់ភ្នំពេញនោះ នឹងបើកការដ្ឋានសាងសង់រោងចក្រថ្មីមួយនៅក្នុងខេត្តពោធិ៍សាត់ ជាមួយទំហំទុនវិនិយោគរហូតដល់៦៥០លានដុល្លារអាមេរិក ។
ឯកឧត្តម កែវ រតន រដ្ឋមន្ត្រីក្រសួងរ៉ែ និងថាមពល បានមានប្រសាសន៍ឱ្យដឹងថា ការអភិវឌ្ឍផ្លូវ ទឹក និងភ្លើង នៅខេត្តពោធិ៍សាត់ ជាពិសេសតាមបណ្ដោយផ្លូវជាតិលេខ៥ បានធ្វើឱ្យទាក់ទាញវិនិយោគិនពីបរទេស និងក្នុងស្រុកជាច្រើនចូលមកបណ្ដាក់ទុនជាបន្តបន្ទាប់ ជាក់ស្ដែងក្នុងរយៈពេលមិនដល់មួយឆ្នាំផង ខេត្តពោធិ៍សាត់ទទួលបានការវិនិយោគពីគម្រោងធំៗ ដែលមិននឹកស្មានដល់ ។ ការទទួលបានគម្រោងវិនិយោគទាំងនេះ នឹងបង្កើតឱកាសការងារដល់ពលរដ្ឋរាប់ម៉ឺននាក់ ទាំងពលរដ្ឋក្នុងខេត្តពោធិ៍សាត់ ក៏ដូចជាពលរដ្ឋដែលមកពីបណ្ដាខេត្តផ្សេងៗទៀតផងដែរ។
អ្នកជំនាញនៃវិស័យអចលនទ្រព្យកម្ពុជាបានបង្ហាញទស្សនថា បណ្ដាខេត្តនៅជាប់នឹងផ្លូវជាតិលេខ៥ នឹងបន្តទទួលការវិនិយោគបន្ថែមទៀត ក្រោយផ្លូវជាតិលេខ៥បានសាងសង់រួច និងដាក់ឱ្យប្រើប្រាស់ជាស្ថាពរ ។ ជាក់ស្ដែង នៅពេលបច្ចុប្បន្ននេះ បើទោះបីជាស្ថានភាពសេដ្ឋកិច្ចសកលមិនទាន់ប្រសើរក្ដី ក៏មានគម្រោងវិនិយោគបរទេសចូលមកបណ្ដាក់ទុនវិនិយោគនៅក្នុងខេត្តពោធិ៍សាត់ជាបន្តបន្ទាប់។
អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានមានប្រសាសន៍ថា ផ្លូវជាតិលេខ៥ ជាផ្លូវដ៏សំខាន់សម្រាប់តភ្ជាប់ទៅកាន់តំបន់ព្រំដែន កម្ពុជា – ថៃ ងាយស្រួលក្នុងការដឹកជញ្ជូនទំនិញចេញ និងចូលទៅកាន់កន្លែងផលិត ។ ម្យ៉ាងវិញទៀតតំបន់នេះ ក៏មានហេដ្ឋារចនាសម្ព័ន្ធសំបូរបែប ដោយមានផ្លូវថ្នល់យ៉ាងធំទូលាយ រួមជាមួយនឹងផ្លូវដែកភ្ជាប់ពីតំបន់ព្រំដែនទៅដល់រាជធានីភ្នំពេញទៀតផង។
Account
Security
Favourite Content