សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គិតមកត្រឹមដើមខែកុម្ភៈ ឆ្នាំ២០២៤នេះ អាកាសយានដ្ឋានអន្តរជាតិតេជោនៅស្រុកកណ្ដាលស្ទឹង ខេត្តកណ្ដាល សម្រេចបានការសាងសង់ប្រមាណ៦៤ភាគរយហើយ ដោយគិតជាទំហំទឹកប្រាក់បានចំណាយសម្រាប់សាងសង់អស់ ៩៣២លានដុល្លារអាមេរិក។
យោងតាមឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និងជាអ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលបានមានប្រសាសន៍ថា មកដល់បច្ចុប្បន្ននេះ អាកាសយានដ្ឋានអន្តរជាតិតេជោ បាន និងកំពុងសម្រុកការងារយ៉ាងមមាញឹក ដោយក្នុងមួយថ្ងៃគម្រោងនេះបានចំណាយទឹកប្រាក់សម្រាប់សាងសង់អស់ពី ២លាន ទៅ ៣លានដុល្លារអាមេរិក ។
ឯកឧត្តមបន្តថា គម្រោងអភិវឌ្ឍ៍ន៍អាកាសយានដ្ឋានអន្តរជាតិមួយនេះ នឹងអាចដាក់ឱ្យដំណើរការនៅពាក់កណ្ដាលឆ្នាំក្រោយបើមិនមានការប្រែប្រួលអ្វីនោះទេ ដោយផ្លូវចូលទៅកាន់អាកាសយានដ្ឋានអន្តរជាតិតេជោ តភ្ជាប់ពីផ្លូវជាតិលេខ២ ប្រវែង ១៣,៥គីឡូម៉ែត្រក៏សម្រេចបាននូវវឌ្ឍនភាពប្រមាណ៨៥ភាគរយហើយផងដែរ ។
អាកាសយានដ្ឋានអន្តរជាតិតេជោ ត្រូវបានអភិវឌ្ឍន៍ដោយក្រុមហ៊ុន CAIC ដែលជាក្រុមហ៊ុនបង្កើតឡើងក្រោមកិច្ចសហការរវាងរាជរដ្ឋាភិបាលកម្ពុជា និងក្រុមហ៊ុន OCIC របស់អ្នកឧកញ៉ាពុងឃាវសែ ។ គម្រោងនេះ ស្ថិតនៅលើផ្ទៃដីប្រមាណ ២៦០០ហិកតា លាតសន្ធឹងលើស្រុកកណ្ដាលស្ទឹងខេត្តកណ្ដាល និងផ្នែកខ្លះនៃស្រុកបាទីខេត្តតាកែវ មានចំងាយប្រមាណ ២០គីឡូម៉ែត្រពីប៉ែកខាងត្បូងរាជធានីភ្នំពេញ ។
គម្រោងនេះក៏ត្រូវបានប្រកាសលក់សញ្ញាប័ណ្ណទៅធនាគារ និងក្រុមហ៊ុនក្នុងស្រុកជាច្រើនផងដែរ ដើម្បីទទួលបានទុនយកមកអភិវឌ្ឍន៍បន្ត ដោយក្នុងនោះឃើញធនាគារ និងក្រុមហ៊ុនជាច្រើនបានសម្រេចទិញសញ្ញាប័ណ្ណ ដូចជាធនាគារអេស៊ីលីដា ធនាគារកាណាឌីយ៉ា ធនាគារពាណិជ្ជកម្មក្រៅប្រទេស ( FTB ) ធនាគារវីង និងធនាគារជាច្រើនទៀត ។
នៅពេលគម្រោងអាកាសយានដ្ឋានអន្តរជាតិតេជោសាងសង់រួច និងដាក់ដំណើរការ គេរំពឹងថានឹងទទួលបានអ្នកធ្វើដំណើរការឆ្លងកាត់អាកាសយានដ្ឋានកម្ពុជាច្រើនជាងមុន ជាពិសេសនឹងទទួលបានភ្ញៀវទេសចរ និងវិនិយោគិនចូលមកវិនិយោគនៅកម្ពុជាបន្ថែមទៀត ។
ដោយឡែក សក្ដានុពលវិនិយោគនៅជុំវិញព្រលានយន្តហោះអន្តរជាតិតេជោ នៅពេលនេះក៏ត្រូវបានគេមើលឃើញថា វិនិយោគិនលើវិស័យឧស្សាហកម្មជាច្រើនបាន និងកំពុងសម្លឹងស្វែងរកឱកាសបណ្ដាក់ទុនវិនិយោគ ពីព្រោះថាតំបន់នេះមានសក្ដានុពលខ្ពស់លើវិស័យឧស្សាហកម្ម រោងចក្រ សហគ្រាស និងឃ្លាំងស្តុកទំនិញ ។
បច្ចុប្បន្ននេះ កម្ពុជាមានអាកាសយានដ្ឋានចំនួន៣កំពុងដំណើរការ ក្នុងនោះរួមមានអាកាសយានដ្ឋានអន្តរជាតិភ្នំពេញ អាកាសយាន្ដដ្ឋានអន្តរជាតិព្រះសីហនុ និងអាកាសយានដ្ឋានអន្តរជាតិសៀមរាបអង្គរ និងទទួលបានភ្ញៀវទេសចរអន្តរជាតិចំនួនជិត២លាននាក់ និងអ្នកដំណើរឆ្លងកាត់រាប់លាននាក់ទៀតផងដែរ ៕
Account
Security
Favourite Content