ភ្នំពេញ ៖ ចាប់តាំងពីឆ្នាំ២០២០ ជាការកត់សម្គាល់គេឃើញមានគម្រោងអភិវឌ្ឍន៍៍អចលនទ្រព្យ​មួយចំនួន ដូចជា គម្រោង បុរី បណ្តុំផ្ទះល្វែង និងគម្រោងអភិវឌ្ឍន៍ដីឡូត៍​ ចាប់ផ្ដើម​ជួបប្រទះនឹង​បញ្ហា​ ដោយមិនអាចបញ្ចប់ការ​ស្ថាបនា​ជូនអតិថិជន​បានទាន់​ពេលវេលា ហើយក៏មានម្ចាស់គម្រោងអភិវឌ្ឍន៍អចលនទ្រព្យ​មួយចំនួន ក៏ដូចជាប្រជាពលរដ្ឋដែលជាអតិថិជន ស្នើសុំ​ឱ្យ​ក្រសួងរៀបចំដែនដី នគរូបនីយកម្ម និសំណង់ ជួយរក​ដំណោះស្រាយ​ផងដែរ ។ ជាលទ្ធផល​ក្រសួងរៀបចំដែនដី នគរូបនីយកម្ម និងសំណង់ ​បានជួយសម្របសម្រួល​ និងដោះស្រាយជូន​អតិថិជនជាមួយគម្រោងដែលមានបញ្ហា​បានជោគជ័យជា​បន្តបន្ទាប់ដោយប្រើប្រាស់យន្ត​ការ​ចំនួន ៦ចំណុច ។​

នៅក្នុង​របាយការណ៍របស់​ក្រសួងរៀបចំដែនដី នគរូបនីយកម្ម និងសំណង់​ បានបង្ហាញពីយន្តការចំនួន ៦ចំណុច ​ដែល​ក្រុមការងារជំនាញរបស់ក្រសួង​រៀបចំដែនដី បានអនុវត្ត​ន៍ និងទទួលបានលទ្ធផលផ្លែផ្កាជាវិជ្ជមាន ដែលក្នុងនោះរួមមាន ទី១. ការស្រាវជ្រាវ ​និងផ្អាកការផ្ទេរ​កម្មសិទ្ធិ​អចលនវត្ថុ​របស់ភាគីពាក់ព័ន្ធ​, ទី២. ផ្អាកការទិញលក់​ និងទប់ស្កាត់ការ​ចុះបញ្ជី , ទី៣. ប្រមូលទិន្នន័យ​ កំណត់​បញ្ហា​ និងសម្របសម្រួលដោះស្រាយ , ទី៤. សុំគោលការណ៍ពីថ្នាក់ដឹកនាំ និងដាក់ចេញវិធានការ​ដោះស្រាយ , ទី៥. លើកលែង​ពន្ធអាករ​ និង​កម្រៃសេវាសរិយោដី ហើយទី៦. ត្រួតពិនិត្យ​ និងតាមដានការអនុវត្ត ។

បើតាមក្រសួង​រៀបចំដែនដី នគរូបនីយកម្ម និងសំណង់ បានឱ្យដឹងថា ដើមហេតុដែលនាំឱ្យមានបញ្ហា​ស​ម្រា​ប់គម្រោង​ បុរី បណ្តុំលំនៅដ្ឋាន ដីឡូត៍ និង​ខុនដូ គឺដោយសារតែមុន​វិបត្តិកូវីដ១៩ តម្លៃអចលនទ្រព្យ​នៅកម្ពុជា​បានហក់ឡើង​ខ្ពស់ជាមួយនឹងទីផ្សារ​ដំណើរការល្អ ធ្វើឱ្យប្រជាជនទូទៅ​ រួមទាំង​អ្នកវិនិយោគ បាននាំគ្នា​សម្រុក​វិនិយោគទិញអចលនទ្រព្យ​ (ដីធ្លី ផ្ទះ និងខុនដូ ) ។ លុះនៅពេលមាន​វិបត្តិ​កូវីដ១៩​ចូលមកដល់​ ធ្វើឱ្យសេដ្ឋកិច្ចពិភពលោក​មានភាពមិនច្បាស់លាស់ ហើយសេដ្ឋកិច្ច​កម្ពុជា​មានការធ្លាក់ចុះ ។ ក្រោយវិបត្តិ​កូវីដ១៩ បានតែបន្តិច​ ក៏មានព្រឹត្តិការណ៍ធំៗលើពិភពលោក គឺសង្គ្រាមរុស្ស៊ី​ – អ៊ុយក្រែន និងសង្គ្រាម​អ៊ីស្រាអែល – ហាម៉ាស ​ផ្ទុះឡើង ។ មិនតែប៉ុណ្ណោះ សង្គ្រាមពាណិជ្ជកម្ម​លើពិភពលោក ​ជាពិសេស ​រវាង​ប្រទេស​មហាអំណាចធំៗ ក៏កើតឡើង​ជាថ្មីម្ដងទៀត ទើបធ្វើឱ្យទុន​ង្វិល​សម្រាប់អភិវឌ្ឍន៍គម្រោងអចលនទ្រព្យនៅកម្ពុជា​ចាប់ផ្ដើមមានបញ្ហា​ ហើយក៏ធ្វើឱ្យគម្រោងមួយចំនួន​ចាប់ផ្ដើមជួបបញ្ហា​ សាងសង់យឺត​ និងមិនទាន់ទទួលបានបណ្ណកម្មសិទ្ធិ​អចលនវត្ថុ​ជាដើម។

គួររម្លឹកថា ក្រោយ​ទទួលបានការសម្រប​សម្រួល​ និងដោះស្រាយ​ពី​ក្រុមការងារជំនាញរបស់ក្រសួង​រៀបចំដែនដី​ នគរូបនីយកម្ម និងសំណង់ ប្រជាពលរដ្ឋជា​អតិថិជនរបស់​គម្រោង​ដែលមាន​បញ្ហានោះ បានសាទរ និងទទួល​យក​ដំណោះស្រាយយ៉ាងសប្បាយចិត្ត ដោយសារ​អតិថិជន​បានទទួល​ប្លង់​កម្មសិទ្ធិ​កាន់​កាប់​អចលនវត្ថុ​ស្របច្បាប់ ។ ជាក់ស្ដែង ​អតិថិជនរបស់ ​បុរី ​ឡេង ណាវ៉ាត្រា , បុរី ម៉នដានី , បុរី VIP និង​គម្រោង​បុរី ដីឡូត៍ មួយចំនួន​ទៀត​ បាន​មកទទួលយកប្លង់កម្មសិទ្ធិ​ពីក្រសួង​រៀបចំដែនដីរួចរាល់ ហើយក្រសួងក៏កំពុង​បន្ត​នីតិវិធីក្នុងការសម្របសម្រួល ​និង​ដោះស្រាយ​ជូន​ជា​បន្ត​បន្ទាប់ ។​

ដោយឡែក ចំពោះគម្រោង​ដែល​ម្ចាស់​ជាអ្នកអភិវឌ្ឍន៍​គេចវេស ឬមិនទទួល​ខុស​ត្រូវ​ (ជាប់ពន្ធនាគារ ឬភៀសខ្លួន​ទៅក្រៅប្រទេស) ក្រសួង​បាន និងកំពុងស្វែងរក​អ្នកវិនិយោគថ្មីចូលសង់ អភិវឌ្ឍបន្ត ធ្វើឱ្យគម្រោង​នោះបានដំណើរការទៅមុខ​ ដើម្បីបញ្ចប់វិវាទក្នុងសង្គម​ឱ្យបានដាច់ស្រឡះ ​។ ជារួម នៅក្នុងចក្ខុវិស័យ និងគោដៅចម្បងរបស់ក្រសួង គឺការ​កសាងឱ្យមានទ្រនំ​សុភមង្គល​ និងភូមិឋាន​ក្សេមក្សាន្ត ដោយ​ត្រូវ​រៀបចំឯកសារ​ច្បាប់ រៀបចំហេដ្ឋារចនាសម្ព័ន្ធ ជំរុញឱ្យមានការ​បញ្ចុះអត្រា​ការ​ប្រាក់​សម្រាប់កម្ចីទិញផ្ទះ និងការ​ទប់ស្កាត់​កុំឱ្យ​មានបញ្ហា​កើតឡើង​ជាថ្មី​៕