សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រសួងរៀបចំដែនដី នគរូបនីយកម្ម និងសំណង់ បានប្រកាសឱ្យប្រជាពលរដ្ឋជាអតិថិជនរបស់គម្រោងអភិវឌ្ឍន៍ចំនួនពីរដែលមានបញ្ហាត្រូវបង្កើនការប្រុងប្រយ័ត្នបន្ទាប់ពីមានជនទុច្ចរឹតមួយចំនួនបន្លំខ្លួនជាថ្នាក់ដឹកនាំក្រសួងទាក់ទងតាមបណ្តាញសង្គមតេលេក្រាម(Telegram)ទៅអតិថិជនដើម្បីឆបោកក្នុងរូបភាពបង្គាប់ឱ្យអតិថិជនបង់ប្រាក់ជាថ្នូរនឹងការដោះស្រាយជូន ។
យោងតាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃចុងសប្ដាហ៍កន្លងទៅនេះបានឱ្យដឹងថា នាពេលថ្មីៗនេះ មានជនទុច្ចរឹតមួយចំនួនបានឆ្លៀតឱកាសក្លែងបន្លំឋានៈជាថ្នាក់ដឹកនាំក្រសួងដែនដី និងឋានៈជាជំនួយការផ្ទាល់របស់ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ដោយបានទាក់ទងតាមប្រព័ន្ធតេលេក្រាមទៅកាន់ប្រជាពលរដ្ឋដែលជាអតិថិជននៃគម្រោងដីឡូតិ៍ ភូមិមរតក ស្ថិតនៅភូមិចំបក់ សង្កាត់ចេក ក្រុងស្វាយរៀង ខេត្តស្វាយរៀង និងអតិថិជនគម្រោងដីឡូតិ៍ភូមិមរតកថ្មស ដែលស្ថិតនៅទីតាំងភូមិតាប៉ ឃុំតាសួស ស្រុកស្វាយជ្រុំ ខេត្តស្វាយរៀង ។ ជនឆបោក បានទាក់ទងទៅប្រជាពលរដ្ឋទាំងនោះឱ្យបង់ប្រាក់ទៅកាន់ពួកគេជាថ្នូរនឹងការដោះស្រាយលើការទិញ – លក់ដីឡូតិ៍ ។
ក្រសួងរៀបចំដែនដី នគរូបនីយកម្ម និងសំណង់ បានចាត់ទុកទង្វើនេះថា ជាទង្វើបំពានទាំងផ្នែកផ្លូវច្បាប់ និងសីលធម៌ និងធ្វើឱ្យប៉ះពាល់ដល់កិត្តិយស សេចក្ដីថ្លៃថ្នូររបស់ថ្នាក់ដឹកនាំ និងមន្ត្រីរាជការនៃក្រសួងរៀបចំដែនដី នគរូបនីយកម្ម និងសំណង់យ៉ាងធ្ងន់ធ្ងរមិនអាចទទួលយកបាននោះឡើយ ។
តាមរយៈសេចក្ដីប្រកាសព័ត៌មានដដែលបានបញ្ជាក់ថា ក្រោយទទួលបានការប្រគល់ភារកិច្ចពីរាជរដ្ឋាភិបាល ក្រសួងរៀបចំដែនដី នគរូបនីយកម្ម និងសំណង់ បាន និងកំពុងខិតខំពុះពារក្នុងការសម្របសម្រួលដោះស្រាយបញ្ហា លក់-ទិញ របស់ប្រជាពលរដ្ឋក្នុងគម្រោងទាំងពីរខាងលើ និងឈានទៅរកការបិទបញ្ចប់វិវាទជាស្ថាពរក្នុងពេលឆាប់ៗនេះ ដោយរាជរដ្ឋាភិបាល សម្រេចទទួលបន្ទុករ៉ាប់រងពន្ធអាករ និងសេវាសុរិយោដីបន្ថែមទៀតជូនដល់ប្រជាពលរដ្ឋដែលជាអតិថិជនៃគម្រោងទាំងពីរនេះ ។
ជាកិច្ចការបន្ទាន់នៅពេលនេះ ក្រសួងរៀបចំដែនដី នគរូបនីយកម្ម និងសំណង់ នឹងសហការជាមួយក្រសួងមហាផ្ទៃ ស្ថាប័នជំនាញពាក់ព័ន្ធ ព្រមទាំងអាជ្ញាធរមានសមត្ថកិច្ច ដើម្បីចាត់វិធានការតាមផ្លូវច្បាប់ ។ ជាមួយគ្នានេះ ក្រសួងរៀបចំដែនដី នគរូបនីយកម្ម និងសំណង់ សូមអំពាវនាវដល់ប្រជាពលរដ្ឋដែលជាអតិថិជនពាក់ព័ន្ធនឹងគម្រោង បុរី ខុនដូ ឬដីឡូតិ៍ ដែលមានបញ្ហា និងកំពុងទទួលបានការសម្របសម្រួលដោះស្រាយនៅក្រសួងទាំងអស់ ត្រូវមានការប្រុងប្រយ័ត្នខ្ពស់ចំពោះករណីឆបោក ក្លែងបន្លំគ្រប់ប្រភេទ និងស្នើសុំឱ្យអាជ្ញាធរគ្រប់លំដាប់ថ្នាក់ ក៏ដូចជាភាគីពាក់ព័ន្ធទាំអអស់ សហការចូលរួមសម្របសម្រួល និងដោះស្រាយរួមគ្នា ប្រកបដោយភាពស្មោះត្រង់ និងឆន្ទៈខ្ពស់បំផុត។ សេចក្ដីលម្អិតមាននៅក្នុងសេចក្ដីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ដូចខាងក្រោម ៖
Account
Security
Favourite Content