ភ្នំពេញ ៖ វិស័យអចលនទ្រព្យនៅក្នុងរយៈពេលប៉ុន្មានឆ្នាំចុងក្រោយនេះ ឃើញថាបានជួបប្រទះនឹងបញ្ហាប្រឈមមួយចំនួន និងនៅបន្តអូសបន្លាយរយៈពេលយូរបន្ថែមទៀត ។ អ្នកវិនិយោគអចលនទ្រព្យធំៗនៅក្នុងប្រទេសកម្ពុជាបានមើលឃើញថា ការផ្គត់ផ្គង់ច្រើនជាងតម្រូវការធ្វើឱ្យវិស័យនេះជួបប្រទះនឹងបញ្ហារយៈពេលយូរ ។

អ្នកឧកញ៉ា លាង ម៉េង ប្រធានអគ្គនាយកក្រុមហ៊ុនជីបម៉ុងគ្រុបបានមានប្រសាសន៍ថា មួយរយៈចុងក្រោយនេះ អ្នកអភិវឌ្ឍន៍អចលនទ្រព្យនាំគ្នាអភិវឌ្ឍន៍តាមគ្នា ដែលធ្វើឱ្យការផ្គត់ផ្គង់មានច្រើនលើសពីតម្រូវការ ដូច្នេះនៅពេលមានបញ្ហាសេដ្ឋកិច្ចធ្វើឱ្យវិស័យនេះត្រូវជាប់គាំង និងអូសបន្លាយយូរ។

អ្នកឧកញ៉ាបន្តថា អ្នកវិនិយោគក្នុងប្រទេសកម្ពុជាបានមើលឃើញថា អាជីវកម្មអចលនទ្រព្យក្នុងប្រទេសកម្ពុជារកប្រាក់បានចំណេញបានស្រួល ទើបម្នាក់ៗបាននាំគ្នាអភិវឌ្ឍន៍ និងនាំគ្នាមកធ្វើការ និងដាក់ទុនលើវិស័យអចលនទ្រព្យកាន់តែច្រើន ។ នៅពេលម្នាក់ៗបានធ្វើតាមគ្នាកាន់តែច្រើន ធ្វើឱ្យការផ្គត់ផ្គង់កាន់តែច្រើន ហើយនៅពេលដែលបញ្ហាសេដ្ឋកិច្ច ចាប់ផ្ដើមមានបញ្ហាធ្វើឱ្យប៉ះពាល់ដល់វិស័យនេះកាន់តែខ្លាំង ។

អ្នកឧកញ៉ាបន្តឱ្យដឹងទៀតថា អ្នកវិនិយោគខ្លះមិនមានលំហូរសាច់ប្រាក់ត្រឹមត្រូវ ឬមិនមានទុនគ្រប់គ្រាន់ទេ តែពួកគេហ៊ានប្រថុយដាក់ទុនក្នុងវិស័យនេះដែរ ដូច្នេះហើយ ទើបក្នុងរយៈពេលប៉ុន្មានខែចុងក្រោយនេះឃើញមានប្រជាពលរដ្ឋក្នុងប្រទេសកម្ពុជា បានចេញតវ៉ា និងចោទថាអ្នកវិនិយោគអចលនទ្រព្យបោកលុយរបស់ពួកគាត់ ។ ប៉ុន្តែសម្រាប់អ្នកវិនិយោគអចលនទ្រព្យដែលបានគិតគូរពីលំហូរសាច់ប្រាក់ត្រឹមត្រូវនោះគឺត្រូវមានទុនខ្លួនឯងយ៉ាងហោចណាស់៧០ភាគរយនៃទុនសរុប។ ឧទាហរណ៍ថា គម្រោងវិនិយោគអស់ទឹកប្រាក់ ១០០លានដុល្លារ យ៉ាងហោចណាស់ក៏គាត់មានទុន៧០លានដុល្លារអាមេរិកដែរ ហើយអាចរកទុនបន្ថែមដូចជាការខ្ចីពីធនាគារ ឬពីប្រភពផ្សេងៗត្រឹម៣០លានដុល្លារអាមេរិកបានហើយ តែបើសិនជាគម្រោងត្រូវការទុន១០០លានដុល្លារហើយគាត់មានតែ២០លានដុល្លារអាមេរិក គាត់បែរជារកទុនខាងក្រៅរហូតដល់ទៅ៨០លានដុល្លារ នោះគឺប្រឈមនឹងហានិភ័យខ្ពស់ណាស់ ។

អ្នកឧកញ៉ា លាង ម៉េង បានបន្ថែមថា បញ្ហាមួយទៀតដែលធ្វើវិស័យអចលនទ្រព្យត្រូវជាប់គាំងនោះ គឺអ្នកទិញអចលនទ្រព្យមួយចំនួនមិនបានទិញសម្រាប់ប្រើប្រាស់ផ្ទាល់ខ្លួនទេ គឺទិញដើម្បីទុកចំណេញឬហៅថាជាការវិនិយោគ ។ នៅពេលអ្នកទិញបែបនេះកាន់តែច្រើន ពេលដែលសេដ្ឋកិច្ចចាប់ផ្ដើមមានបញ្ហា សួរថាតើគាត់ទៅលក់ឱ្យអ្នកណា បើភាគច្រើនសុទ្ធតែអ្នកលក់មិនមានអ្នកទិញផងនោះ ។

អ្នកឧកញ៉ាបញ្ជាក់ថា វិស័យអចលនទ្រព្យនៅក្នុងឆ្នាំ២០២៣ និងឆ្នាំ ២០២៤ខាងមុខ នៅតែមានផលវិបាកដដែល ពីព្រោះថាក្នុងរយៈពេលមុនមានវិបត្តិកូវីដ១៩ គឺអចលនទ្រព្យកើនខ្លាំងពេក ដូច្នេះនៅពេលមានបញ្ហាក៏ធ្លាក់មកលឿនដែរ និងត្រូវការពេលវេលា ដើម្បីស្ដារឱ្យមកដូចដើមវិញ៕