សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលអាណត្តិទី៧នៃរដ្ឋសភា បានផ្ដោតការយកចិត្តទុកដាក់លើការងារដីធ្លី និងការរៀបចំទីក្រុង ក្នុងនោះ ឯកឧត្តម ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ឯកឧត្តម សាយ សំអាល់ ក៏តែងតែលើកឡើងពីសារសំខាន់ការងារចុះបញ្ជីដីធ្លី ក៏ដូចជាការងាររៀបចំទីក្រុងឱ្យកាន់តែទំនើប ដើម្បីផ្ដល់ការរស់នៅកាន់តែប្រសើរសម្រាប់ប្រជាពលរដ្ឋ ។
នៅក្នុងពិធីបើកកិច្ចពិគ្រោះយោបល់ស្ដីពី ការគ្រប់គ្រងតំបន់រមណីយដ្ឋានបេតិកភណ្ឌពិភពលោកអង្គរ នៅថ្ងៃទី១២ ខែសីហា ឆ្នាំ២០២៤ ឯកឧត្តម សាយ សំអាល់ បានមានប្រសាសន៍ថា ក្នុងអាណត្តិទី៧នេះ រាជរដ្ឋាភិបាលកម្ពុជាបានដាក់ចេញនូវគោលនយោបាយមួយចំនួន ផ្ដោតលើការគ្រប់គ្រងដីធ្លី និងសំណង់ ដោយបន្តអនុវត្តការកែទម្រង់ឱ្យកាន់តែសកម្ម និងស៊ីជម្រៅលើវិស័យដីធ្លី តាមរយៈការពង្រឹងការគ្រប់គ្រងដីធ្លី ដោយជំរុញការបញ្ចប់ការចុះបញ្ជីដីធ្លីលើកដំបូង ជំរុញការចុះបញ្ជីដីសហគមន៍ជនជាតិដើមភាគតិច និងជំរុញការចុះបញ្ជីបន្តដីគ្រប់ប្រភេទ ព្រមទាំងផ្ដល់បណ្ណកម្មសិទ្ធិជូនអ្នកកាន់កាប់ដីធ្លីដែលមានលក្ខណៈសម្បត្តិគ្រប់គ្រាន់តាមលក្ខខណ្ឌ ។ ដាក់ចេញនូវវិធានការទប់ស្កាត់ការទន្ទ្រានកាន់កាប់ដីគ្រប់ប្រភេទរបស់រដ្ឋ និងបន្តពិនិត្យធ្វើប្រទានកម្មដីធ្លីជូនពលរដ្ឋរស់នៅ និងអាស្រ័យផលលើទីតាំងដីរដ្ឋ ជាពិសេសនៅតំបន់៣ និងតំបន់២នៃបឹងទន្លេសាប ដែលជាមូលដ្ឋានចាស់បុរាណរបស់ប្រជាជន និងជំរុញការពង្រឹងគ្រប់យន្តការដោះស្រាយវិវាទដីធ្លី ដើម្បីផ្ដល់ភាពសុខដុមរមនាក្នុងសង្គម ។
ឯកឧត្តមបន្តថា ក្នុងអាណត្តិទី៧នេះ រាជរដ្ឋាភិបាលនឹងបន្តអនុវត្តកម្មវិធីសម្បទានដីសង្គមកិច្ច ដើម្បីចែករំលែកដីជូនប្រជាពលរដ្ឋស៊ីវិលក្រីក្រ និងផ្ទះជូនកងកម្លាំងកំពុងឈរជើងតាមព្រំដែន និងជូនអតីតកងកម្លាំងប្រដាប់អាវុធ និងគ្រួសារក្រីក្រ និងខ្វះដីប្រកបដោយតម្លាភាព និងសមធម៌ ។ ការកសាងផែនការរៀបចំដែនដី ប្លង់គោលប្រើប្រាស់ដី និងផែនការប្រើប្រាស់ ជាពិសេសនៅតំបន់អាទិភាព ដើម្បីធានាអភិវឌ្ឍប្រកបដោយចីរភាព ក៏ជាគោលនយោបាយរបស់រាជរដ្ឋាភិបាលកម្ពុជាអាណត្តិថ្មីនេះដែរ ។ រាជរដ្ឋាភិបាលក៏នឹងបន្តកសាង និងគ្រប់គ្រងស្ថានីយវាស់វែងអចិន្ត្រៃយ៍ ក៏ដូចជាដាក់ឱ្យដំណើរការប្រព័ន្ធគ្រប់គ្រងព័ត៌មាន និងទិន្នន័យសុរិយោដី ទិន្នន័យរៀបចំដែនដី និងនគរូបនីយកម្ម ទិន្នន័យសំណង់ និងលំនៅឋានទូទាំងប្រទេសប្រកបដោយប្រសិទ្ធភាពក្នុងបរិការណ៍នៃបច្ចេកទេសឌីជីថល ។
ឯកឧត្តមបានបន្ថែមថា រាជរដ្ឋភិបាលក៏នឹងពង្រឹងការអភិវឌ្ឍវិស័យសំណង់ផងដែរ ដោយអនុលោមទៅតាមច្បាប់ស្ដីពីសំណង់ និងបទដ្ឋានគតិយុត្តិនគរូបនីយកម្ម និងបច្ចេសទេស ដើម្បីធានាបាននូវគុណភាព សន្តិសុខ សុវត្ថិភាពសោភ័ណភាព សណ្ដាប់ធ្នាប់សាធារណៈ និងបរិស្ថាន ព្រមទាំងចាត់វិធានការទបស្កាត់ការសាងសង់លើចំណីសាធារណៈ និងជំរុញការសាងសង់លំនៅឋានតម្លៃសមរម្យ សម្រាប់ជួល និងលក់ជូនពលរដ្ឋ ដែលមានប្រាក់ចំណូលមធ្យម ចំណូលទាប និងជនងាយរងគ្រោះ ស្របតាមគោលនយោបាយជាតិស្ដីពីលំនៅឋាន និងគោលនយោបាយស្ដីពីការលើកទឹកចិត្ត និងការបង្កើតកម្មវិធីជាតិសម្រាប់ការអភិវឌ្ឍលំនៅឋានតម្លៃសមរម្យ ។
ពាក់ព័ន្ធនឹងវិស័យលំនៅឋាននេះដែរ រាជរដ្ឋាភិបាលក៏បានបន្តអនុគ្រោះ ដោយលើងលែងពន្ធប្រថាប់ត្រាចំពោះលំនៅឋានដែលមានតម្លៃក្រោម៧ម៉ឺនដុល្លារអាមេរិក ។ ការលើកលែងនេះ ក៏ជាការរួមចំណែកដល់ប្រជាពលរដ្ឋ និងអ្នកអភិវឌ្ឍន៍លំនៅឋានក្នុងការបន្ធូរបន្ថយតម្លៃបានមួយកម្រិតផងដែរ ៕
Account
Security
Favourite Content