សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ គម្រោងខ្សែក្រវាត់ទី៣ប៉ែកខាងកើតរាជាធានីភ្នំពេញដែលមានប្រវែងជាង ៣៤គីឡូម៉ែត្រនោះត្រូវបានក្រុមហ៊ុនសំណង់សៀងហៃ លើកយកមកធ្វើបទបង្ហាញជូនអ្នកជំនាញបច្ចេកទេសក្រសួងដើម្បីពិនិត្យ និងផ្ដល់ធាតុចូលបន្ថែម ដែលគម្រោងនេះគ្រោងនឹងចំណាយថវិកាប្រមាណ២៤០លានដុល្លារអាមេរិក។
យោងតាមបទបង្ហាញរបស់ក្រុមហ៊ុនសំណង់សៀងហៃកាលពីថ្ងៃចុងសប្ដាហ៍កន្លងទៅបាននេះឱ្យដឹងថា គម្រោងខ្សែក្រវាត់ទី៣ ប៉ែកខាងកើតរាជធានីភ្នំពេញនេះ មានប្រវែងប្រមាណ ៣៤,១៥គីឡូម៉ែត្រ សាងសង់ជាផ្លូវ៤គន្លង (ពីរគន្លងទៅ ពីរគន្លងមក) ចេញពីមហាវិថីឈ្នះឈ្នះ (ចំណុចប្រសព្វផ្លូវជាតិលេខ៦) រហូតដល់ចំណុចប្រសព្វផ្លូវលេខ ៧០B ឆ្លងកាត់កោះចំនួន២ គឺកោះដាច់ និងកោះតាង។
គម្រោងមួយនេះ ត្រូវសាងសង់ស្ពានឆ្លងទន្លេមេគង្គចំនួន៣ ក្នុងនោះស្ពានទី១ (ផ្លូវជាតិលេខ៦-កោះដាច់) មានប្រវែង ១ ៣១១ម៉ែត្រ ស្ពានទី២ (កោះដាច់-កោះតាង) មានប្រវែង ៥៧៩ម៉ែត្រ និងស្ពានទី៣ (កោះតាង-ផ្លូវ៧០B) មានប្រវែង ១ ០៤៤ម៉ែត្រ គ្រោងចំណាយថវិកាប្រមាណ ២៤០លានដុល្លារអាមេរិក។
បន្ទាប់ពីបានស្វែងយល់បទបង្ហាញរួចមក អ្នកជំនាញបច្ចេកទេសក្រសួងបានជជែកពិភាក្សា និងផ្ដល់យោបល់ជាធាតុចូលលើការងារបច្ចេកទេសសំខាន់ៗក្នុងការសាងសង់ រួមមានការរៀបចំជាចំណតយានយន្ត ព្រមទាំងការសិក្សាបន្ថែមលើភូមិសាស្ត្រតំបន់ ការសិក្សាលើលំហូរទឹក និងទំនប់ទឹកជាធាតុចូលដើម្បីធ្វើឱ្យគម្រោងនេះមានប្រសិទ្ធភាព និងនិរន្តរភាព ។
គម្រោងនេះនឹងជំរុញឱ្យតំបន់កោះដាច់ និងកោះតាងកាន់តែខិតជិតរាជធានីភ្នំពេញ ខណៈបច្ចុប្បន្នប្រជាជននៅតំបនកោះទាំង២ ដែលត្រូវឆ្លងមករាជធានីភ្នំពេញ គឺត្រូវធ្វើដំណើរតាមទូកចម្លង និងមិនអាចធ្វើដំណើរចេញបាន២៤ម៉ោងនោះឡើយ ហើយបើនិយាយពីសក្ដានុពលតំបន់កោះទាំង២នេះវិញ តម្លៃដីធ្លីក៏នៅមានកម្រិតទាបនៅឡើយ ពីព្រោះអ្នកអភិវឌ្ឍន៍មិនដឹងថាទិញដីនោះហើយអភិវឌ្ឍអ្វីឱ្យទទួលបានប្រាក់ចំណេញខ្ពស់នោះទេ ៕
Account
Security
Favourite Content