បរទេស៖​ យោងតាមប្រភពព័ត៌មានពី CNA បានរាយការណ៍ថា រថយន្តអគ្គិសនីរបស់ចិន BYD បានវ៉ាដាច់រថយន្តជប៉ុន Toyota និងក្លាយជាម៉ាករថយន្តលក់ដាច់បំផុតនៅក្នុងប្រទេសសិង្ហបុរី។

យោងតាមទិន្នន័យរបស់អាជ្ញាធរដឹកជញ្ជូនផ្លូវគោក (LTA) របស់សិង្ហបុរី បានឲ្យដឹងថា BYD លក់រថយន្តបានចំនួន ៣ ០០២ គ្រឿង ឬ ស្មើរនឹង ២០% នៃការលក់រថយន្តសរុបនៅក្នុងប្រទេសសិង្ហបុរីក្នុងរយៈពេល ៤ខែដំបូងក្នុងឆ្នាំនេះ។ ជាលទ្ធផល BYD បានក្លាយជារថយន្តដែលពេញនិយមបំផុតក្នុងសិង្ហបុរី​ និងបានយកឈ្នះក្រុមហ៊ុនតូយ៉ូតាដែលលក់រថយន្តចំនួន ២ ០៥០ គ្រឿងក្នុងរយៈពេលដូចគ្នា។ លើសពីនេះ Tesla លក់រថយន្តបានចំនួន ៥៣៥ គ្រឿងប៉ុណ្ណោះនៅក្នុងសឹង្ហបុរី។ កាលពីឆ្នាំ២០២៤ Toyota លក់រថយន្តបាន ៧ ៨៧៦ គ្រឿង ដែលច្រើនជាង BYD លក់បានចំនួន ៦ ១៩១ គ្រឿង។  

កាលពីឆ្នាំ ២០២០ BYD បានលក់រថយន្តត្រឹមតែ ៣ គ្រឿងប៉ុណ្ណោះនៅក្នុងប្រទេសសិង្ហបុរី ហើយតួលេខនេះបានកើនឡើងដល់ ៨៩ គ្រឿងក្នុងឆ្នាំ ២០២១, ៧៨៦ គ្រឿងក្នុងឆ្នាំ ២០២២ និង ១ ៤១៦ គ្រឿងក្នុងឆ្នាំ ២០២៣។ ​​ក្នុង​រយៈ​ពេល​ប៉ុន្មាន​ឆ្នាំ​នេះ ការ​លក់​របស់ Tesla ក៏​បាន​កើន​ឡើងផងដែរ ប៉ុន្តែ​មិន​លឿន​ដូច​ BYD នោះទេ។ Tesla បានលក់រថយន្តចំនួន ២០ គ្រឿងក្នុងឆ្នាំ ២០២០, ៩២៤ គ្រឿងក្នុងឆ្នាំ ២០២១, ៨៧៥ គ្រឿងក្នុងឆ្នាំ ២០២២, ៩៤១ គ្រឿងក្នុងឆ្នាំ ២០២៣, និង ២ ៣៨៤ គ្រឿងក្នុងឆ្នាំ ២០២៤។

តួលេខដែលបង្ហាញពីការកើនឡើងការលក់របស់ BYD មិនសូវជាបង្កការភ្ញាក់ផ្អើលដល់អ្នកជំនាញនោះទេ ដោយសារកត្តាសម្រេចចិត្តរបស់អ្នកបើកបរក្នុងការទិញ BYD ពីព្រោះតម្លៃទាបជាងរថយន្តប្រើសាំង និងរថយន្តអគ្គិសនីផ្សេងទៀត។ មិនត្រឹមតែប៉ុណ្ណោះ BYD បំពាក់ទៅដោយមុខងារទំនើបៗ ដែលអ្នកប្រើប្រាស់ភាគច្រើនយល់ឃើញថា​ ប្រភេទរថយន្តប្រេងសាំងដែលមានមុខងារស្រដៀងគ្នានេះនឹងមានតម្លៃថ្លៃជាង BYD ហើយរថយន្តខ្លះមិនមានលក្ខណៈពិសេសដូច BYD នោះទេ។ សាស្ត្រាចារ្យរង Raymond Ong មកពីសាកលវិទ្យាល័យជាតិសិង្ហបុរី លើកឡើងថា រថយន្ត EV ត្រូវបានចាត់ទុកថាជាផលិតផលកម្រិតចូលដំបូងនៅក្នុងទីផ្សារដ៏ធំ។ ប្រសិនបើប្រៀបធៀបតម្លៃកម្រិតចូលដំបូងរបស់ BYD ទៅនឹង Tesla នោះតម្លៃ BYD មានលក្ខណៈប្រកួតប្រជែងយ៉ាងខ្លាំង ដែលវាជះឥទ្ធិពលដល់ការសម្រេចចិត្តរបស់អ្នកទិញ។

លើសពីនេះ អ្នកជំនាញលើកឡើងថា Tesla ភ្ជាប់មកជាមួយនឹងគោលគំនិត “តិចតួចបំផុត ឬ minimalist” ដែលជាការពេញនិយមក្នុងចំណោមអ្នកចូលចិត្តបច្ចេកវិទ្យា ប៉ុន្តែ BYD ទទួលបានការចាប់អារម្មណ៍ពីមនុស្សទូទៅភាគច្រើន។ ការទទួលស្គាល់កាន់តែច្រើនឡើងនៃម៉ាកយីហោចិនទាំងមូលក៏បានជួយជំរុញ BYD ឱ្យទទួលបានប្រជាប្រិយភាពនាពេលថ្មីៗនេះផងដែរ ដោយស្លាក ‘ផលិតនៅប្រទេសចិន ឬ Made in China” ត្រូវបានគេមើលឃើញថាមានគុណភាពល្អ៕