បរទេស ៖ យោងតាមប្រភពព័ត៌មានពី CTV News បានរាយការណ៍ថា ការលេចចេញនូវកម្មវិធីបញ្ញាសិប្បនិមិត្ត (AI) ដ៏ទំនើបដែលមានសមត្ថភាពបំពេញការងារមនុស្សកាន់តែច្រើនឡើង ប៉ុន្តែក៏មានសំណួរជាច្រើនសួរថា តើ AI នឹងជំនួសការងារមនុស្សនៅថ្ងៃអនាគតទាំងស្រុងបានឬទេ?

ChatGPT គឺជា AI chatbot ដែលបង្កើតឡើងដោយ OpenAI ហើយបានបើកដំណើរការក្នុងខែវិច្ឆិកា ឆ្នាំ២០២២ កន្លងទៅនេះ។ វាមានសមត្ថភាពឆ្លើយសំណួរជាច្រើន ប៉ុន្តែ ChatGPT មិនល្អឥតខ្ចោះដូចមនុស្សទេ។ ជាឧទាហរណ៍ នៅពេលដែលត្រូវបានស្នើសុំឱ្យសរសេសម្រាយអំពីរឿងមួយ វាបានបញ្ជូនសារកំហុសមកវិញ ប៉ុន្តែវាអាចផ្តល់នូវការយល់ដឹងអំពីទំនាក់ទំនងរវាង AI និងការងាររបស់មនុស្ស។ ChatGPT មិនផ្តល់ឯកសារយោងជាមួយនឹងចម្លើយរបស់វាទេ ប៉ុន្តែចម្លើយរបស់ ChatGPT គឺសមស្របទៅនឹងអ្វីដែលមនុស្សចង់បាន។ ChatGPT គឺជាបញ្ញាសិប្បនិមិត្តមានសមត្ថភាពបំពេញកិច្ចការផ្សេងៗបាន ដែលស័ក្តិសម ជាពិសេសសម្រាប់ប្រភេទការងារ និងកម្មវិធីមួយចំនួន។

ChatGPT មានសមត្ថភាពក្នុងការវិភាគទិន្នន័យ ដោយសារក្បួនដោះស្រាយ AI អាចដំណើរការទិន្នន័យយ៉ាងច្រើនយ៉ាងឆាប់រហ័ស កំណត់អត្តសញ្ញាណគំរូ និងការស្វែងរកទិន្នន័យមួយចំនួនដែលមនុស្សពិបាករក។ មុខងារមួយទៀត គឺការទទួលស្គាល់រូបភាព និងការនិយាយ ដោយសារក្បួនដោះស្រាយ AI ត្រូវបានបណ្តុះបណ្តាលដើម្បីសម្គាល់ ចាត់ថ្នាក់រូបភាព ការនិយាយ ការចាប់សំឡេង និងរូបភាពផ្សេងៗទៀតជាមួយនឹងលទ្ធផលត្រឹមត្រូវខ្ពស់។ មួយវិញទៀត សេវាកម្មអតិថិជនរបស់ chatbots ដែលដំណើរការដោយ AI អាចដោះស្រាយការសាកសួរសេវាកម្មអតិថិជនសាមញ្ញ ដោយជួយសម្រួលភ្នាក់ងារសេវាកម្មជាមនុស្សក្នុងការដោះស្រាយបញ្ហាស្មុគស្មាញបន្ថែមទៀត។

មុខងារមួយទៀត គឺការរកឃើញការក្លែងបន្លំ ដែលក្បួនដោះស្រាយ AI ត្រូវបានបណ្តុះបណ្តាលដើម្បីកំណត់អត្តសញ្ញាណប្រតិបត្តិការក្លែងបន្លំ និង គំរូដែលមានភាពមិនប្រក្រតីនៅក្នុងទិន្នន័យហិរញ្ញវត្ថុ។ មុខងារមួយទៀត គឺការទស្សន៍ទាយនៃប្រតិបត្តិការថែទាំមួយចំនួន ដែលក្បួនដោះស្រាយ AI អាចវិភាគទិន្នន័យពីឧបករណ៍ចាប់សញ្ញា ដើម្បីទស្សន៍ទាយថាតើនៅពេលណាដែលត្រូវការការថែទាំ កាត់បន្ថយពេលវេលារង់ចាំ និង ថ្លៃថែទាំ។ ការកំណត់ផ្ទាល់ខ្លួន ដោយសារក្បួនដោះស្រាយ AI អាចវិភាគទិន្នន័យអំពីឥរិយាបថ និងចំណូលចិត្តរបស់អ្នកប្រើប្រាស់ ដើម្បីផ្តល់នូវមតិយោបល់មួយចំនួន។ វាក៏មានមុខងារការបកប្រែដោយស្វ័យប្រវត្តិផងដែរ ដោយសារក្បួនដោះស្រាយ AI អាចបកប្រែអត្ថបទពីភាសាមួយទៅភាសាមួយទៀត ធ្វើឱ្យទំនាក់ទំនង និងការសហការកាន់តែងាយស្រួលសម្រាប់អ្នកដែលនិយាយភាសាផ្សេងៗគ្នា។

មនុស្សជាច្រើនបានទាយថា AI អាចជំនួសមនុស្សនៅក្នុងឧស្សាហកម្មមួយចំនួន ជាពិសេសសម្រាប់កិច្ចការដែលមានលក្ខណៈដដែលៗ គ្រោះថ្នាក់ ឬទាមទារកម្រិតខ្ពស់នៃភាពជាក់លាក់។ ទោះជាយ៉ាងណាក្តី វាមិនទំនងដែលថា AI នឹងជំនួសមនុស្សទាំងស្រុងនោះទេ ដោយសារការងារជាច្រើននៅតែទាមទារការច្នៃប្រឌិតរបស់មនុស្ស ការគិតរិះគន់ និង មតិយោបល់ផ្សេងៗ។ ជាឧទាហរណ៍ នៅក្នុងការផលិត មនុស្សយន្តដែលដំណើរការដោយ AI កំពុងត្រូវបានប្រើប្រាស់កាន់តែខ្លាំងឡើង ដើម្បីបំពេញការងារមួយចំនួន។ នៅក្នុងសេវាកម្មអតិថិជន chatbots ដែលដំណើរការដោយ AI អាចដោះស្រាយការសាកសួរសាមញ្ញ ប៉ុន្តែបញ្ហាស្មុគ្រស្មាញជាងនេះនៅតែទាមទារឱ្យមានអន្តរាគមន៍ពីមនុស្ស។ នៅក្នុងឧស្សាហកម្មហិរញ្ញវត្ថុ ក្បួនដោះស្រាយ AI អាចជួយរកឃើញការក្លែងបន្លំ ប៉ុន្តែនៅតែត្រូវការអ្នកវិភាគជាមនុស្សដើម្បីបកស្រាយលទ្ធផល និងធ្វើការសម្រេចចិត្តផ្សេងៗ។

ឥទ្ធិពលរបស់ AI លើកម្លាំងពលកម្មរបស់មនុស្សនឹងអាស្រ័យលើល្បឿនដែលវារីកចម្រើន ប្រភេទនៃការងារដែលរងផលប៉ះពាល់ និងលទ្ធភាពទទួលបានការងារជំនួស។ ក្នុងករណីខ្លះ មនុស្សអាចស្វែងរកការងារថ្មីក្នុងវិស័យដែលពាក់ព័ន្ធ ការទទួលបានជំនាញថ្មី និងការផ្លាស់ប្តូរទៅកាន់ឧស្សាហកម្មផ្សេងៗគ្នា។ ដើម្បីកាត់បន្ថយផលប៉ះពាល់អវិជ្ជមាននៃ AI លើការងាររបស់មនុស្ស នោះរដ្ឋាភិបាល អាជីវកម្ម និងស្ថាប័នអប់រំគួរតែវិនិយោគលើកម្មវិធីបណ្តុះបណ្តាលខាងបច្ចេកវិទ្យា បង្កើនជំនាញផ្សេងទៀតដើម្បីជួយមនុស្សទទួលបានជំនាញថ្មីៗ។ ការអភិវឌ្ឍន៍ និងការដាក់ឱ្យប្រើប្រាស់ AI គួរតែត្រូវបានដឹកនាំដោយការពិចារណាប្រកបដោយក្រមសីលធម៌ និងធានាថាវាផ្តល់អត្ថប្រយោជន៍ដល់មនុស្សទាំងអស់នៅក្នុងសង្គម។ មិនត្រឹមតែប៉ុណ្ណោះ មនុស្សគួរពង្រឹងការយល់ដឹងខាងផ្នែកបច្ចេកវិទ្យា អភិវឌ្ឍជំនាញទន់ ស្វែងរកឱកាសថ្មីៗ បង្កើតទំនាក់ទំនង និង បណ្តាញផ្សេងៗ។ សរុបមក AI អាចនឹងផ្លាស់ប្តូរលក្ខណៈនៃការងារនៅក្នុងឧស្សាហកម្មជាច្រើន។ នៅពេលដែល AI កាន់តែរីកចម្រើន ការងារប្រើ កម្លាំងពលកម្មរបស់មនុស្សនឹងត្រូវបានកាត់បន្ថយ ប៉ុន្តែជំនួសមកវិញនឹងផ្តោតលើការងារកម្រិតខ្ពស់ ការច្នៃប្រឌិត និងយុទ្ធសាស្ត្រដោយប្រើខួរក្បាលវិញ។ ផ្អែកទៅលើមុខងារមួយចំនួននេះរបស់ ChatGPT គេអាចកត់សម្គាល់បានថាប្រព័ន្ធ AI នៅតែមានកម្រិតក្នុងសមត្ថភាពរបស់ពួកវា ហើយពេលខ្លះអាចធ្វើការខុស។ ដូច្នេះហើយ ក្នុងករណីជាច្រើន ការត្រួតពិនិត្យ និងការបញ្ចូលរបស់មនុស្សនៅតែត្រូវបានទាមទារ ដើម្បីធានាថាប្រព័ន្ធ AI ត្រូវបានប្រើប្រាស់ប្រកបដោយប្រសិទ្ធភាព និងប្រកបដោយក្រមសីលធម៌៕