បរទេស ៖ អ្នកវិភាគសេដ្ឋកិច្ចសកលសំខាន់ៗបានមើលឃើញដូចគ្នាថា សេដ្ឋកិច្ចមហាយក្សចិនកំពុងបន្តភាពរីកចម្រើនតិចតួច និងកំពុងមានបញ្ហាខ្លាំងនៅពីខាងក្នុង ជាក់ស្តែងតួលេខចុងក្រោយបានបង្ហាញថា ទាំងឧស្សាហកម្មក៏មានការធ្លាក់ចុះ សកម្មភាពវិនិយោគតិចជាងមុន សន្ទស្សនៃការប្រើប្រាស់របស់អតិថិជនមិនខ្ពស់ដូចមុន ហើយបូករួមទាំងបញ្ហាអត្រាពលរដ្ឋអត់ការងារធ្វើក៏មានច្រើនផងដែរ។

ធនាគារធំៗកម្រិតពិភពលោកដែលរួមមានទាំង Goldman Sachs និង Morgan Stanley បានធ្វើការព្យាករណ៍សាជាថ្មីចំពោះកំណើនសេដ្ឋកិច្ចចិនថា នឹងបន្តធ្លាក់ទាបជាងការរំពឹងទុកនាចុងឆ្នាំ២០២៤នេះ ហើយបានផ្តល់ជាដំណោះស្រាយមួយដើម្បីជួយកាត់បន្ថយបញ្ហានេះ តាមរយៈការបញ្ចេញខ្ទង់ចំណាយ និងថវិកាជាតិឲ្យបានច្រើនបន្ថែមទៀតសម្រាប់ឆ្នាំសារពើពន្ធខាងមុខ។ ទោះបីជាយ៉ាងណា រដ្ឋាភិបាលទីក្រុងប៉េកាំង ហាក់បង្ហាញនូវការចាប់អារម្មណ៍តិចតួចបំផុតចំពោះការងារនេះ ហើយក៏ពុំមានផែនការដើម្បីបង្កើនចំណាយរបស់ខ្លួនសម្រាប់ឆ្នាំក្រោយនេះដែរ។

ក្នុងគ្រាជាមួយគ្នានេះដែរ គេសង្កេតឃើញ ថាវិស័យនាំចេញតែមួយគត់ដែលកំពុងទទួលបានផលចំណេញខ្លាំងជាងគេបំផុត ដោយគិតត្រឹមខែសីហាប៉ុណ្ណោះ ការនាំចេញសរុបរបស់ចិនបានកើនឡើងដល់កំណត់ត្រាខ្ពស់បំផុតក្នុងរយៈពេល២ឆ្នាំចុងក្រោយនេះបើទោះបីជារដ្ឋាភិបាលប៉េកាំងកំពុងទទួលរងទណ្ឌកម្ម និងការបង្កើនតម្លៃពន្ធពីសំណាក់រដ្ឋាភិបាលលោកខាងលិចដែលរួមមានដូចជា អាមេរិក និងអឺរ៉ុបក្តី។

ក្រៅតែពីបញ្ហាធំៗខាងលើនេះ ប្រទេសចិនក៏កំពុងជួបប្រទះបញ្ហាសំខាន់ផ្សេងទៀតដូចជា វិបត្តិអាយុមនុស្សចាស់ជរានៃក្រុមពលរដ្ឋភាគច្រើន បញ្ហាបំណុល និងការធ្លាក់ចុះដ៏ដុនដាបនៃវិស័យអចលនទ្រព្យជាដើម។ អ្នកវិភាគសេដ្ឋកិច្ចរបស់ទូរទស្សន៍ CNBC ម្នាក់បានធ្វើការលើកឡើងថា វិបត្តិនៅចិនកំពុងរីកកាន់តែធំ និងស៊ីជម្រៅ ហើយអាចនឹងធ្លាក់ចូលទៅដល់ស្ថានភាពដ៏អាក្រក់ជាងនេះបន្ថែមទៀតជាមិនខាន។ អ្នកវិភាគរូបនេះបានបន្តថា វិបត្តិសេដ្ឋកិច្ចនេះស្រដៀងទៅនឹងវិបត្តិហិរញ្ញវត្ថុសកលដែលធ្លាប់បានកើតឡើងកាលពីឆ្នាំ២០០៧ និងឆ្នាំ២០០៨ដែរ ដែលវាបានបង្កឡើងដោយបញ្ហាវិបត្តិនៅក្នុងប្រទេសអាមេរិក។ ប៉ុន្តែរដ្ឋាភិបាលចិនបានកសាងភាពខ្លាំងមួយចំនួនរបស់ខ្លួនបានយ៉ាងល្អក្នុងគ្រាមានវិបត្តិនេះ ជាពិសេសចាប់តាំងតែពីពេលដែលទណ្ឌកម្មរបស់លោកខាងលិចបានធ្លាក់មកលើចិនកាលពីប៉ុន្មានឆ្នាំមុន ខណៈដែលអ្នកជំនាញសេដ្ឋកិច្ចរបស់ចិនបាននិយាយតាមរយៈ The South China Morning Post ថា ទណ្ឌកម្មទាំងនោះបានក្លាយទៅជាកាដូដ៏អស្ចារ្យមួយសម្រាប់ចិន។

ជាមួយគ្នានេះ ក្រុមអ្នកជំនាញបានពន្យល់ថា កាដូនេះ គឺជាការបង្វែរពីការរឹតបន្តឹងនៅលើទីផ្សារសកលដោយមហាអំណាចលោកខាងលិចទៅជាការខិតខំប្រឹងប្រែងពង្រឺងសមត្ថភាពរបស់ខ្លួននៅក្នុងការអភិវឌ្ឍបច្ចេកវិទ្យាក្នុងស្រុក។ ជាក់ស្ដែង នៅត្រឹមប៉ុន្មានឆ្នាំចុងក្រោយនេះប៉ុណ្ណោះ ចិនបានបង្កើនសាច់ដុំរបស់ខ្លួនទៅលើបច្ចេកវិទ្យានៃផលិតផលក្នុងស្រុក ក៏ដូចជាសមត្ថភាពនៃប្រព័ន្ធសង្វាក់ផ្គត់ផ្គង់ផលិតកម្ម ជាពិសេសទៅលើបច្ចេកវិទ្យាឆ្លាតវ៉ៃ ( AI ) និងបច្ចេកវិទ្យាបៃត ( Green Tech ) ៕