បរទេស ៖ ថ្ងៃទី២០ ខែឧសភា ឆ្នាំ២០២៤ ជាប្រវត្តិសាស្ត្រនៃកោះតៃវ៉ាន់ដែលអាចជ្រើសបានប្រធានាធិបតីថ្មីរបស់ខ្លួន គឺលោក Lai Ching-te ប៉ុន្តែទោះបីជាយ៉ាងណាក្តី បុរសវ័យ៦៩ឆ្នាំរូបនេះក៏អាចប៉ានស្មានដឹងរួចទៅហើយថា នៅក្រោយភាពជោគជ័យលើកនេះលោកនឹងត្រូវប្រឈមមុខយ៉ាងតានតឹងជាមួយនឹងរដ្ឋាភិបាលប៉េកាំង ជាពិសេសចំពោះគោលការណ៍ចិនតែមួយ ឬ One China។

ជាលទ្ធផលដូចទៅនឹងការរំពឹងទុកថា ភ្លាមៗ រដ្ឋាភិបាលចិនបានប្រើប្រាស់យុទ្ធសាស្ត្រដាក់សំពាធធ្ងន់ៗចំពោះរដ្ឋាភិបាលថ្មីរបស់កោះតៃវ៉ាន់ ហើយក៏ជាយុទ្ធសាស្ត្រដែលតែងតែបានធ្វើកន្លងមកជាច្រើនដងមកហើយដែរនោះគឺជាការបង្កើនអនុភាពរបស់ចិនទៅលើដែនកោះមួយនេះដែលក្នុងនោះបូករួមទាំងការប្រើប្រាស់សកម្មភាពយោធា ការដាក់ទណ្ឌកម្មសេដ្ឋកិច្ច និងការប្រើប្រាស់បណ្តាញសង្គមផងដែរ។

មិនដល់មួយអាទិត្យផងក្រោយការប្រកាសចូលកាន់តំណែង ចិនបានចាប់ផ្តើមធ្វើការសមយុទ្ធយោធាទ្រង់ទ្រាយធំនៅថ្ងៃទី២៣ និងថ្ងៃទី២៤ ខែឧសភានៅជុំវិញដែនកោះតៃវ៉ាន់ក្រោមឈ្មោះថា Joint Sword-2024A ដែលសមយុទ្ធយោធាធ្លាប់បានរៀបចំធ្វើឡើងដោយកងទ័ពចិនដំបូងតាំងតែពីខែមេសា ឆ្នាំ២០២៣មកម្ល៉េះ។

យ៉ាងណាក្តី សមយុទ្ធយោធាទ្រង់ទ្រាយធំបានកើតឡើងជាញឹកញាប់នៅក្បែរកោះតៃវ៉ាន់ដោយរដ្ឋាភិបាលចិន ពោលគឺចាប់តាំងតែពីខែសីហាឆ្នាំ២០២២មកម្ល៉េះ ក្នុងពេលដែលប្រធានរដ្ឋសភាអាមេរិក លោកស្រី Nancy Pelosi ហ៊ានសម្រេចចិត្តក្នុងការធ្វើដំណើរមកបំពេញទស្សនកិច្ចជាផ្លូវការនៅលើដែនកោះមួយនេះដែលវាពិតជាបានធ្វើឲ្យចិនមានការខឹងសំបារខ្លាំងមែនទែន។

ជាការឆ្លើយតបកាលពីគ្រានោះ ចិនបានបន្តធ្វើការសកម្មភាពយោធាស្ទើររៀងរាល់ថ្ងៃ និងមានទាំងការហោះហើរពីលើតំបន់ក្រហមនៃបន្ទាត់ព្រំដែនអាកាសរវាងភាគីទាំងពីរផងដែរ (ADIZ)ដែលក្នុងនោះបើគិតត្រឹមខែឧសភាកន្លងមកការហោះហើរលើបន្ទាត់ក្រហមបានកើនឡើងដល់ទៅកំណត់ត្រាចាស់ ជាពិសេសនៅថ្ងៃទី២៥ ខែឧសភា​ ចំនួននៃការហោះហើរនេះបានឡើងខ្ពស់ជាងគេបំផុតមិនធ្លាប់មាន។ ដូច្នេះ គេអាចមើលឃើញថា សមយុទ្ធយោធាគឺជាវិធីសាស្ត្រដាក់សំពាធខ្លាំងជាងគេសម្រាប់ចិនទៅលើដែនកោះតៃវ៉ាន់។

វិធីសាស្ត្រទី២ដែលចិនបានប្រើប្រាស់នៅក្រោយពេលដែលមេដឹកនាំថ្មីកោះតៃវ៉ាន់បានឡើងកាន់តំណែងនោះគឺជាការរៀបចំទណ្ឌកម្មសេដ្ឋកិច្ចប្រឆាំងទៅនឹងការនាំចេញ។ ចិនបានប្រកាសបញ្ចប់ការអនុគ្រោះពន្ធទៅលើមុខទំនិញនាំចូលពីកោះតៃវ៉ាន់ដល់ទៅ១៣៤មុខ ដែលរួមមានទាំងប្រេងសម្រាប់គ្រឿងបន្លាស់រថយន្ត ប្រេងម៉ាស៊ីន ព្រមទាំងផលិតផលកាត់ដេរ ហើយកត្តានេះបានធ្វើឲ្យអ្នកជំនាញក្នុងស្រុកបារម្ភថានឹងធ្វើឲ្យប៉ះពាល់ខ្លាំងដល់ឧស្សាហកម្មដែលពឹងផ្អែកទៅលើទីផ្សារនៃប្រទេសចិន។

ក្នុងនោះផងដែរ គេកំពុងសង្ស័យថាចិនអាចឈានទៅដល់ការបញ្ចប់ទាំងស្រុងនូវកិច្ចព្រមព្រៀងគ្រប់ជ្រុងជ្រោយធំបំផុតដែលជាកិច្ចព្រមព្រៀងពាណិជ្ជកម្មរវាងចិន និងកោះតៃវ៉ាន់តាំងតែពីឆ្នាំ២០១០នោះផងដែរ(ECFA) ខណៈដែលកាលពីខែធ្នូឆ្នាំទៅចិនធ្លាប់បានប្រកាសបញ្ចប់ការអនុគ្រោះពន្ធទៅលើមុខទំនិញសំខាន់ៗចំនួន១២រួចមកហើយនិងធ្លាប់បានព្រមានថានឹងបញ្ចប់ ECFA នៅត្រឹមខែមិថុនានេះ។

ដូចទៅនឹងមេដឹកនាំកោះតៃវ៉ាន់មុនៗដែរ ចិនតែងតែប្រើប្រាស់ទណ្ឌកម្មសេដ្ឋកិច្ចពាណិជ្ជកម្មដាក់សំពាធនយោបាយផ្តាច់ខ្លួន ជាក់ស្តែងកាលពីអាណត្តិនៃមេដឹកនាំចាស់ចិនធ្លាប់បានដាក់ទណ្ឌកម្មលើការនាំចូលផលិតផលកសិកម្មជាច្រើនរបស់កោះតៃវ៉ាន់ដែលមានដូចជា ស្វាយ ស្ករ ម្នាស់ និងផលិតផលជាអាហារសមុទ្រផង។

ដោយឡែក វិធីសាស្ត្រចុងក្រោយដែលចិនតែងតែនិយមប្រើប្រាស់ក្នុងការដាក់សំពាធទៅលើកោះតៃវ៉ាន់នោះគឺជាឥទ្ធិពលនៃបណ្តាញសង្គមតាមរយៈបុគ្គលដែលមានឥទ្ធិពលដែលក្នុងនោះមានទាំងអ្នកពាណិជ្ជករជនជាតិតៃវ៉ាន់និងសិល្បៈករជនជាតិតៃវ៉ាន់ដែលប្រកបរបររកស៊ីនៅក្នុងប្រទេសចិន។ពួកគេជាញឹកញាប់បានបង្ខំចិត្តក្នុងការធ្វើសារបង្ហោះឬវិដេអូគាំទ្រគោលការណ៍ចិនតែមួយ One China នៅពេលដែលរដ្ឋាភិបាលចង់ឲ្យធ្វើយុទ្ធនាការនេះហើយជាក់ស្តែងនៅក្នុងខែឧសភាកន្លងមកក៏ចិនបានរៀបចំការងារនេះជាច្រើនផងដែរ៕