សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភពព័ត៌មានពី CNBC បានរាយការណ៍ថា ផលិតផលក្នុងស្រុកសរុប (GDP) របស់ចិនបានកើនឡើងយ៉ាងខ្លាំងនៅក្នុងត្រីមាសទី១សម្រាប់ឆ្នាំនេះ ខណៈពេលដែលប្រទេសក្នុងសកលលោកជាច្រើនកំពុងប្រឈមមុខនឹងកំណើនសេដ្ឋកិច្ចយឺត ដោយសារធនាគារកណ្តាលនៅតែបន្តដំឡើងអត្រាការប្រាក់ដើម្បីទប់ទល់នឹងអតិផរណា។
កាលពីថ្ងៃអង្គារកន្លងទៅនេះ ការិយាល័យស្ថិតិជាតិរបស់ចិនបានលើកឡើងថា ផលិតផលក្នុងស្រុកសរុប (GDP) បានកើនឡើង ៤,៥ ភាគរយនៅក្នុងត្រីមាសទីមួយ ដែលវាមានភាពប្រសើរជាងការព្យាករណ៍ ៤ ភាគរយ។ កាលពីឆ្នាំ២០២២ កន្លងទៅនេះ សេដ្ឋកិច្ចបានកើនឡើង ៣ ភាគរយ ដែលតិចជាងការកំណត់គោលដៅរបស់ទីក្រុងប៉េកាំងដែលប្រហែល ៥,៥ ភាគរយ។ ស្របពេលនេះដែរ ការរីកចម្រើនរបស់ចិនបានស្ថិតនៅក្រោមការយកចិត្តទុកដាក់យ៉ាងខ្លាំង ខណៈដែលប្រទេសមួយនេះបានបើកសេដ្ឋកិច្ចឡើងវិញបន្ទាប់ពីបញ្ចប់ការរឹតបន្តឹងកូវីដ-១៩ ដែលបានធ្វើឡើងអស់រយៈពេលជិតបីឆ្នាំមកនេះ។ បើធៀបទៅនឹងត្រីមាសទីបួនក្នុងឆ្នាំ ២០២២ វិញ កំណើនសេដ្ឋកិច្ចបានកើនឡើង ២,៩ ភាគរយប៉ុណ្ណោះ ប៉ុន្តែការលក់រាយចាប់ផ្តើមបានកើនឡើង ១០,៦ ភាគរយកាលពីខែមីនាកន្លងទៅនេះ ដោយសារការលក់ទំនិញតាមអ៊ីនធឺណិតបានកើនឡើង។ ទន្ទឹមនឹងនេះដែរ ទិន្នផលឧស្សាហកម្មបានកើនឡើង ៣,៩ ភាគរយ ដែលទាបជាងការព្យាករណ៍បន្តិច ៤ ភាគរយ ហើយការវិនិយោគលើទ្រព្យសកម្មគឺខ្សោយជាងការរំពឹងទុក ដោយសារកំណើនខាងវិស័យហេដ្ឋារចនាសម្ព័ន្ធ និងការវិនិយោគផ្នែកផលិតកម្មមានការថយចុះ។
ប្រធានសេដ្ឋវិទូចិនរបស់ ING លោកស្រី Iris Pang បាននិយាយថា រដ្ឋាភិបាលចិននឹងជំរុញបន្ថែម ដើម្បីជំរុញការវិនិយោគ និងការប្រើប្រាស់ហេដ្ឋារចនាសម្ព័ន្ធរបស់ខ្លួន។ ដើម្បីសម្រេចគោលដៅកំណើនសេដ្ឋកិច្ច ៥ ភាគរយសម្រាប់ឆ្នាំ២០២៣ រដ្ឋាភិបាលចាំបាច់ត្រូវជំរុញការវិនិយោគលើហេដ្ឋារចនាសម្ព័ន្ធ ដែលភាគច្រើនគួរតែជាការសាងសង់ខ្សែរថភ្លើងក្រោមដី និង បង្កើនចំនួនបង្គោលអ៊ីនធឺណេត 5G។ ដូច្នេះហើយ ពួកគេរំពឹងថា GDP នឹងអាចកើនឡើងលឿនជាងមុនដល់ ៦ ភាគរយនៅក្នុងត្រីមាសទីពីរ។
មិនត្រឹមតែប៉ុណ្ណោះ ការងើបឡើងវិញនៃវិស័យសេវាកម្មរបស់ចិនក៏បានកើនឡើង ៥,៤ ភាគរយនៅក្នុងត្រីមាសទីមួយនេះផងដែរ និងសន្ទស្សន៍នៃការផលិតសេវាកម្មបានកើនឡើង ៩,២ ភាគរយ ដោយយោងទៅតាមទិន្នន័យរបស់រដ្ឋាភិបាលចិន។ យ៉ាងណាមិញ អ្នកវិភាគសេដ្ឋកិច្ចភាគច្រើនមិនរំពឹងថានឹងឃើញមានការផ្លាស់ប្តូរអត្រាការប្រាក់កម្ចីគោលរបស់ធនាគារកណ្តាលនោះ ប៉ុន្តែអ្នកខ្លះជឿថាធនាគារកណ្តាលចិនអាចកាត់បន្ថយអត្រាប្រាក់កម្ចីរយៈពេលមួយឆ្នាំបានតិចតួច ប្រសិនបើអតិផរណារបស់ចិនធ្លាក់ចុះបន្ថែមទៀត។
ស្របពេលនេះផងដែរ អ្នកវិភាគ CMC Markets លោក Leon Li បាននិយាយថា ការស្ទុះងើបឡើងវិញដ៏គួរឱ្យកត់សម្គាល់នៃសេដ្ឋកិច្ចចិនអាចនឹងជំរុញតម្លៃប្រេងផងដែរ ដោយសារខែឧសភាខាងមុខនេះ គឺជាខែធ្វើដំណើរមានអត្រាខ្ពស់បំផុតតាមរដូវកាលនៅក្នុងប្រទេសចិន ដែលជាកត្តាជម្រុញឲ្យមានតម្រូវការប្រេងឥន្ធនៈខ្លាំង។ កាលពីខែមីនាកន្លងទៅនេះ ទិន្នផលនៃរោងចក្រចម្រាញ់ប្រេងរបស់ចិនបានកើនឡើងដល់កម្រិត ដែលជាសញ្ញាបង្ហាញពីតម្រូវការឥន្ធនៈដ៏រឹងមាំមួយ ខណៈដែលក្រុមហ៊ុនចម្រាញ់ប្រេងបានបង្កើនការផលិតដើម្បីជម្រុញតម្រូវការនាំចេញបន្ថែមទៀត និង សម្រាប់ស្តុកទុក។ លើសពីនេះផងដែរ ទីភ្នាក់ងារថាមពលអន្តរជាតិ (IEA) បានព្យាករណ៍ថា តម្រូវការប្រេងឆៅនៅប្រទេសចិននឹងមានការកើនឡើងខ្លាំងក្នុងឆ្នាំ ២០២៣ នេះ៕
Account
Security
Favourite Content