សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ឌីជីថល បានជ្រៀតចូលក្នុងកិច្ចការប្រចាំថ្ងៃ និងសូម្បីតែការរស់នៅជាប្រចាំ។ ដោយឡែក សម្រាប់កម្ពុជា គេធ្លាប់ឮអំពីរដ្ឋាភិបាលឌីជីថល និងពលរដ្ឋឌីជីថល ដែលសំដៅទៅលើការគ្រប់គ្រង និងរស់នៅដោយប្រើប្រាស់បច្ចេកវិទ្យាជាជំនួយ។
សម្រាប់សេដ្ឋកិច្ចឌីជីថលវិញក៏ស្ថិតក្នុងគោលនយោបាយរបស់រាជរដ្ឋាភិបាលក្នុងការកែប្រែ និងជំរុញសេដ្ឋកិច្ចជាតិឱ្យកាន់តែរីកចម្រើន។ បច្ចុប្បន្ននេះ ពិភពលោកកំពុងតែឈានចូលដល់បដិវត្តន៍
ជំនាន់ថ្មីនៃឌីជីថល ដោយរាប់បញ្ចូលទាំងអ៊ីនធឺណិត ប្រព័ន្ធទិន្នន័យធំ (Big Data) ប្រព័ន្ធ Cloud Computing បច្ចេកវិទ្យាហិរញ្ញវត្ថុ (FinTech) និងបច្ចេកវិទ្យាឌីជីថលជាច្រើនទៀត។
បច្ចេកវិទ្យាទាំងនេះបានក្លាយជាប្រព័ន្ធផ្ទុកព័ត៌មានដ៏សំខាន់សម្រាប់ការធ្វើពាណិជ្ជកម្ម និងជំរុញឲ្យការរស់នៅកាន់តែមានភាពងាយស្រួល។ ជាក់ស្ដែង ក្រុមហ៊ុនបច្ចេកវិទ្យាដូចជា Apple, Huawei, Microsoft និងវេទិកាអនឡាញដ៏មានឥទ្ធិពលជាច្រើនផ្សេងទៀត ដូចជា Google, Amazon, Alibaba, Airbnb, Uber និង Facebook ជាដើម គឺជាឧទាហរណ៍នៃការងារវៃឆ្លាត និងភាពជោគជ័យរបស់សេដ្ឋកិច្ចឌីជីថល។
បើតាមការស្រាវជ្រាវពីមជ្ឈមណ្ឌលអភិវឌ្ឍន៍កម្ពុជា គេបានឱ្យនិយមន័យនៃសេដ្ឋកិច្ចឌីជីថលថាជាទម្រង់នៃសកម្មភាព និងដំណើរការសេដ្ឋកិច្ចដែលចរាចរនៅលើប្រព័ន្ធអ៊ីនធឺណិតដោយមានជំនួយពីបច្ចេកវិទ្យាគមនាគមន៍ ព័ត៌មានដែលជំរុញឲ្យមានការតភ្ជាប់កាន់តែទូលំទំលាយបំផុតរវាងមនុស្ស ពាណិជ្ជកម្ម ឧបករណ៍ និងទិន្នន័យ។
យោងតាមប្រភពដដែលនេះបានឱ្យដឹងថា ក្នុងរយៈពេលកន្លងមក បដិវត្តន៍ឧស្សាហកម្មទី១ បានលេចរូបរាងឡើងដោយតាមរយៈការបង្កើតឧស្សាហកម្មដែក និងដែកថែប ព្រមទាំងម៉ាស៊ីនដើរដោយ ចំហាយទឹក។
បដិវត្តន៍ឧស្សាហកម្មទី២ ឯណោះវិញបានដំណើរការដោយរបកគំហើញថាមពលអគ្គិសនី ប្រព័ន្ធទូរគមនាគមន៍ និងការបង្កើតខ្សែសង្វាក់ផលិតកម្មនៅក្នុងរោងចក្រ។ របកគំហើញនេះបានត្រួសត្រាយផ្លូវសម្រាប់សន្ទុះយ៉ាងខ្លាំងខ្លានៃការរីកចម្រើនផ្នែកផលិតកម្មនៅក្នុងទសវត្សរ៍៦០។
បដិវត្តន៍ឧស្សាហកម្មទី៣ វិញត្រូវបានគេស្គាល់ផងដែរថាជាបដិវត្តន៍ឌីជីថល ដែលបានបង្ហាញវត្តមានក្នុងយុគសម័យព័ត៌មាន រួមមានការអភិវឌ្ឍប្រព័ន្ធអ៊ីនធឺណិត ព័ត៌មានវិទ្យា (IT) ស៊ីមីកុងឌុចទ័រ (Semiconductor) កុំព្យូទ័រភាវូបនីយកម្ម និងបច្ចេកវិទ្យាជាច្រើនទៀត។
បច្ចេកវិទ្យាគមនាគមន៍ និងព័ត៌មាន (ICT) ក្នុងយុគសម័យឌីជីថល បានតម្រង់ទិសដៅឆ្ពោះទៅកាន់បដិវត្តន៍ឧស្សាហកម្មទី៤ (ឧស្សាហកម្ម ៤.០) ហើយបានបង្កើតជាមូលដ្ឋានសម្រាប់ការមកដល់នៃបច្ចេកវិទ្យាទំនើបបំផុតសម្រាប់ការធ្វើពាណិជ្ជកម្មក្នុងយុគសម័យថ្មី ដែលគេស្គាល់ជាទូទៅថា «សេដ្ឋកិច្ចឌីជីថល»។
សេដ្ឋកិច្ចឌីជីថល ក៏ត្រូវបានគេហៅថា សេដ្ឋកិច្ចអីនធឺណិត (Internet Economy) ឬ សេដ្ឋកិច្ចថ្មី (New Economy) ឬសេដ្ឋកិច្ចវេបសាយ (Web Economy) ផងដែរ ដោយសារតែការពឹងផ្អែកយ៉ាងខ្លាំងលើបណ្តាញតភ្ជាប់ទៅនឹងប្រព័ន្ធអ៊ីនធឺណិត។
យ៉ាងណាមិញ ពាក្យ “សេដ្ឋកិច្ចឌីជីថល» នេះត្រូវបានបង្កើតឡើងដំបូងដោយលោក Don Tapscott ក្នុងឆ្នាំ១៩៩៥ នៅក្នុងសៀវភៅរបស់លោកដែលមានចំណងជើងថា «សេដ្ឋកិច្ចឌីជីថល៖ ការសន្យា និងគ្រោះថ្នាក់នៅក្នុងយុគសម័យបណ្តាញនៃភាពវៃឆ្លាត»៕
Account
Security
Favourite Content