សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី IMF Blog ដែលជាបណ្តាញផ្សព្វផ្សាយយ៉ាងទូលាយពាក់ព័ន្ធទៅនឹងសេដ្ឋកិច្ចសកលបានលើកឡើងថា ការផលិត គឺជាក្បាលម៉ាស៊ីននៃកំណើនសេដ្ឋកិច្ចនៅអាស៊ី ប៉ុន្តែការផ្តោតសំខាន់លើសេវាកម្មទំនើបបន្ថែមទៀតគឺជាវិធីសាស្រ្តថ្មីក្នុងការជំរុញកំណើនសេដ្ឋកិច្ច និងបង្កើនផលិតភាពសម្រាប់តំបន់មួយនេះ។
បច្ចុប្បន្ននេះ តំបន់អាស៊ីប៉ាស៊ីហ្វិកបានក្លាយជាប្រភពនៃទិន្នផលផលិតកម្មជាងពាក់កណ្តាលនៃទិន្នផលសរុបរបស់ពិភពលោក ប៉ុន្តែការផ្តោតសំខាន់លើសេវាកម្មដែលមានផលិតភាពខ្ពស់នឹងអាចជំរុញដល់កំណើនបន្ថែមទៀត។ ឥឡូវនេះ បុគ្គលិកជាច្រើនបានចាកចេញពីវិស័យកសិកម្ម និងការផលិត ហើយងាកទៅស្វែងរកការងារក្នុងផ្នែកសេវាកម្ម។ ជាក់ស្តែង កំណើននៃសេវាកម្មបានទាក់ទាញកម្លាំងការងារប្រហែលពាក់កណ្តាលនៅក្នុងតំបន់នេះរួចទៅហើយ ដែលកើនឡើងពី ២២ ភាគរយក្នុងឆ្នាំ១៩៩០ ដោយសារមនុស្សរាប់រយលាននាក់បានផ្លាស់ប្តូរពីការងារកសិកម្មទៅធ្វើការនៅរោងចក្រ។ មិនត្រឹមតែប៉ុណ្ណោះ និន្នាការកំពុងកើតឡើងក្នុងល្បឿនលឿនជាមួយនឹងការពង្រីកបន្ថែមទៀតនៃពាណិជ្ជកម្មអន្តរជាតិនៅក្នុងសេវាកម្មទំនើបដូចជា អាជីវកម្ម ហិរញ្ញវត្ថុ ព័ត៌មាន និងបច្ចេកវិទ្យាទំនាក់ទំនង។ ផ្ទុយទៅវិញ សេវាកម្មបែបប្រពៃណីដូចជា ទេសចរណ៍ និងសេវាចែកចាយមានផលិតភាពទាបជាង និងរួមចំណែកតិចដល់កំណើនសេដ្ឋកិច្ច។ ប្រសិនបើសកម្មភាពឆ្លងកាត់ទៅសេវាកម្មទំនើបកាន់តែច្រើន នោះផលិតកម្មនៅក្នុងឧស្សាហកម្មអាចនឹងធ្លាក់ចុះ។
ផ្អែកលើរបាយការណ៍ពីទស្សនវិស័យសេដ្ឋកិច្ចក្នុងតំបន់អាស៊ីប៉ាស៊ីហ្វិកបានឲ្យដឹងថា អ្នកបង្កើតគោលនយោបាយគួរតែទទួលយកការផ្លាស់ប្តូរទៅកាន់សេវាកម្មទំនើប ពីព្រោះវាផ្តល់មានផលិតភាពខ្ពស់ជាង។ បន្ថែមពីនេះ ការផ្លាស់ប្តូរទៅកាន់សេដ្ឋកិច្ចដែលនាំមុខដោយសេវាកម្មទំនើបគួបផ្សំជាមួយនឹងគោលនយោបាយត្រឹមត្រូវត្រូវ នោះវានឹងមកនាំមកនូវឱកាសកំណើនសេដ្ឋកិច្ចកាន់តែច្រើន។ ផលិតភាពគឺជាកត្តាដ៏សំខាន់មួយនៅគ្រប់វិស័យ។ ស្របពេលដែលផលិតភាពនៅក្នុងវិស័យផលិតអាស៊ីស្ថិតនៅកម្រិតកំពូលមួយរបស់ពិភពលោករួចហើយ ពួកគេគួរកែលម្អបន្ថែមទៀតនៅក្នុងវិស័យសេវាកម្មទំនើប តាមរយៈការរៀនពីបទពិសោធន៍នៃប្រទេសដែលមានវិស័យសេវាកម្មមានប្រសិទ្ធភាពបំផុត។ នៅក្នុងវិស័យសេវាកម្មមួយចំនួនដូចជា ហិរញ្ញវត្ថុ និងសេវាកម្មអាជីវកម្ម ផលិតភាពរបស់ពួកគេគឺខ្ពស់ជាងផ្នែកផលិត ដែលមានន័យថាវារួមចំណែកកាន់តែច្រើនដល់កំណើន។ ការរីកចម្រើនយ៉ាងឆាប់រហ័សនៃសេវាកម្មទំនើបក្នុងពាណិជ្ជកម្មត្រូវបានជំរុញដោយការកើនឡើងនៃឌីជីថលនីយកម្ម ដែលអនុញ្ញាតឱ្យមានការផ្តល់សេវាដ៏ធំទូលាយពិចម្ងាយ និងឆ្លងកាត់ព្រំដែន។ ជាឧទាហរណ៍ វិស័យហិរញ្ញវត្ថុបានផ្តល់សេវាកម្មទំនើបៗដូចជា សេវាធនាគារឌីជីថល និងសេវាធានារ៉ាប់រង ដែលអនុញ្ញាតឱ្យចូលទៅក្នុងទីផ្សារបរទេសដោយមិនចាំបាច់ត្រូវការសមត្ថភាពក្នុងស្រុក។ លើសពីនេះ ផលិតភាពការងារក្នុងសេវាកម្មហិរញ្ញវត្ថុនៅអាស៊ីគឺខ្ពស់ជាងវិស័យផលិត ៤ ដង។
ទោះជាយ៉ាងនេះក្ដី ប្រទេសនានាត្រូវមានលក្ខខណ្ឌត្រឹមត្រូវដើម្បីទទួលបានអត្ថប្រយោជន៍បន្ថែមទៀតពីវិស័យសេវាកម្ម។ ស្របពេលការផលិតទទួលបានអត្ថប្រយោជន៍ពីតម្លៃពាណិជ្ជកម្មទាប និងការរួមបញ្ចូលជាសកលកាន់តែច្រើន ប៉ុន្តែវិស័យសេវាកម្មត្រូវបានការពារតិចតួចប៉ុណ្ណោះនៅក្នុងអាស៊ី ដែលអាចរារាំងដល់កំណើនសេដ្ឋកិច្ច។ លើសពីនេះ ក្រុមហ៊ុនបរទេសចង់វិនិយោគក្នុងវិស័យសេវាកម្មត្រូវប្រឈមនឹងការរឹតបន្តឹងផ្សេងៗ។ ជាមួយនឹងរលកនៃបច្ចេកវិទ្យាឌីជីថលថ្មីជំនួសការងារមួយចំនួន ប្រទេសទាំងនោះគួរមានគោលនយោបាយធានាឱ្យមានការចូលប្រើប្រាស់អ៊ីនធឺណិត និងបច្ចេកវិទ្យាយ៉ាងទូលំទូលាយ ជាមួយនឹងការណែនាំ និងការបណ្តុះបណ្តាល ដើម្បីអភិវឌ្ឍកម្លាំងពលកម្មលើជំនាញឌីជីថល និងបង្កើនសមត្ថភាពប្រើប្រាស់បញ្ញាសិប្បនិម្មិត។ ការជំរុញផលិតភាពនៅក្នុងវិស័យសេវាកម្ម គឺជាគន្លឹះនៃភាពជោគជ័យនាពេលអនាគតរបស់អាស៊ី ខណៈដែលប្រទេសមួយចំនួននកំពុងជួបប្រទះនឹងកំណើនប្រជាជនវ័យចំណាស់៕
Account
Security
Favourite Content