អាជីវកម្មកើតថ្មីមួយដែលត្រូវបានគេស្គាល់ឈ្មោះថា Uglyfood កំពុងជាប់ឈ្មោះជាសហគ្រាសសង្គមដ៏គួរឲ្យចាប់អារម្មណ៍មួយនៅក្នុងប្រទេសសិង្ហបុរី និងដើរតួយ៉ាងសំខាន់នៅក្នុងកិច្ចខិតខំប្រយុទ្ធប្រឆាំងនឹងកាកសំណល់អាហារ ។ លើសពីការគ្រាន់តែលក់ផលិតផលបន្លែផ្លែឈើដែលមិនមានរូបរាងល្អ និងស្តង់ដា វាក៏ជាយុទ្ធសាស្ត្របញ្ចុះតម្លៃរបស់ Uglyfood គឺបានក្លាយទៅជាវិធីសាស្ត្រដោះស្រាយបញ្ហាស្នូលនៃកាកសំណល់អាហារ។ វិធីនេះអាចជួយសង្គ្រោះផ្លែឈើ និងបន្លែដែលចាត់ទុកថាមិនសមរម្យសម្រាប់ផ្សារទំនើបដោយសារតែភាពមិនល្អឥតខ្ចោះស្របទៅតាមស្តង់ដាទីផ្សារ ហើយវាបែរជាអាចរកទីផ្សារលក់ចេញបានក្នុងតម្លៃធូរថ្លៃបំផុតដែលអាចជួយដល់ក្រុមពលរដ្ឋដែលមានចំណូលទាបផងដែរ។

ជាធម្មតា នៅតាមបណ្តាផ្សារទំនើបតែងតែបោះចោលផលិតផលដែលមានស្នាមប្រេះ ឬខូចបន្តិចបន្តួច ប៉ុន្តែសម្រាប់ Uglyfood ពួកគេអាចមើលឃើញនូវតម្លៃនៃផលិតផលទាំងនោះតាមរយៈការប្រមូលវត្ថុទាំងនេះពីកសិដ្ឋាន និងផ្សារទំនើប ហើយបញ្ចៀសវាចេញពីកន្លែងចាក់សំរាម។

ផ្លែឈើ និងបន្លែមិនត្រូវតាមស្តង់ដា ប៉ុន្តែវាអាចបរិភោគបានដោយមិនមានបញ្ហាអ្វីដល់សុខភាព ហើយជាក់ស្តែងវាក៏មានរសជាតិ និងគុណភាពឆ្ងាញ់ដូចផលិតផលស្តង់ដាផ្សេងទៀតដែរ។ Uglyfood បានប្រើប្រាស់យុទ្ធសាស្ត្រនេះក្នុងការធ្វើឱ្យផលិតផលស្រស់ៗអាចហូរចូលក្នុងទីផ្សារប្រើប្រាស់បានកាន់តែច្រើន ជាពិសេសសម្រាប់អ្នកប្រើប្រាស់ដែលគិតគូរខ្ពស់ពីការចំណាយ ឬក្រុមពលរដ្ឋដែលមានចំណូលទាប។

Uglyfood មិនត្រឹមតែព្យាយាមរកទីផ្សារដើម្បីលក់ផលិតផលទាំងនោះទេ សហគ្រាសមួយនេះក៏បានប្រើប្រាស់បច្ចេកវិទ្យាដើម្បីធ្វើការច្នៃប្រឌិត ដើម្បីស្វែងរកទីផ្សារបានកាន់តែធំទៀតផង តាមរយៈការច្នៃទៅជាដំណាប់ ទៅជាទឹកផ្លែឈើ និងផលិតផលផ្សេងទៀតពីផ្លែឈើ និងបន្លែ ពោលគឺធ្វើយ៉ាងណាកាត់បន្ថយកាកសំណល់ និងបង្កើនតម្លៃអតិបរមានៃផលិតផលដែលត្រូវបានប្រមូលទិញមក។

រូបភាពនេះ Uglyfood ក៏អាចត្រូវចាត់ទុកថាជាអាជីវកម្មបរិយាបន្នបានដែរ ពីព្រោះថា ធុរកិច្ចបរិយាប័ន្ន គឺជាអាជីវកម្មឈរលើគោលការណ៍ធុរកិច្ច សំដៅទៅលើអង្គភាពទាំងឡាយណាដែលបង្កើតដំណោះស្រាយជាប្រព័ន្ធ មានភាពច្នៃប្រតិដ្ឋ និងមានទ្រង់ទ្រាយធំ ដែលឆ្លើយតបទៅនឹងបញ្ហាប្រឈមពាក់ព័ន្ធរបស់ប្រជាជនក្រីក្រ និងប្រជាជនមានចំណូលទាប (BoP និង B40)។ បន្ទាត់អាជីវកម្មបរិយាប័ន្ន ត្រូវបានបង្កើតឡើងក្នុងគោលបំណងផ្តល់ប្រាក់ចំណូលខ្ពស់គួរសម និងបង្កើននូវស្តង់ដារជីវភាពរស់នៅប្រសើរជាងមុនដល់ក្រុមមនុស្សដែលមានចំណូលទាបនៅបាតពីរ៉ាមីត ៤០% និងក្រុមមនុស្សដែលងាយរងគ្រោះ៕