ភ្នំពេញ ៖ ការតាំងពិព័រណ៍បច្ចេកវិទ្យា និងឧបករណ៍វិទ្យាសាស្ត្រ នៅក្នុងវេទិកាជាតិលើកទី២ បានបង្ហាញពីភាពរីកចម្រើន លូតលាស់របស់ឧស្សាហកម្ម និងសហគ្រាសធុនតូច និងមធ្យម (SME) ក្នុងស្រុក ដែលបានរួមចំណែកបង្កើតការងារជូនប្រជាពលរដ្ឋរាប់លាននាក់ ស្របទៅតាមចក្ខុវិស័យរបស់រាជរដ្ឋាភិបាលដូចដែលមានចែងក្នុងយុទ្ធសាស្ត្របញ្ចកោណដំណាក់កាលទី១ «ដើម្បីកំណើនការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០»។
ឯកឧត្តម ហែម វណ្ណឌី រដ្ឋមន្រ្តីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងដូច្នេះនៅក្នុងសន្និសីទសារព័ត៌មាននៃទិវាជាតិលើកទី២ វិទ្យាសាស្ត្រ បច្ចេកវិទ្យា និងនវានុវត្តន៍ នាថ្ងៃទី២៤ ខែមីនា ឆ្នាំ២០២៤ នៅមជ្ឈមណ្ឌលពិព័រណ៍កោះពេជ្រ។
ឯកឧត្តម ហែម វណ្ណឌី បានមានប្រសាសន៍ថា ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ បង្ហាញឱ្យឃើញពីកម្ពុជា ដែលកំពុងយកចិត្តទុកដាក់ប្រើប្រាស់បច្ចេកវិទ្យា ជាពិសេសក្នុងវិស័យសហគ្រាសធុនតូច និងមធ្យម ក្នុងខ្សែច្រវាក់ផលិតកម្ម ដើម្បីបង្កើនប្រសិទ្ធភាព និងគុណតម្លៃបន្ថែម។
ឯកឧត្តម បានបញ្ជាក់បន្តថា ៖
«វិទ្យាសាស្ត្រ បច្ចេកវិទ្យា និងនវានុវត្តន៍ ជាវិស័យដ៏ចាំបាច់មួយក្នុងការបម្រើ និងគាំទ្រឱ្យគ្រប់វិស័យក្នុងក្របខណ្ឌសេដ្ឋកិច្ច និងសង្គមឌីជីថល ព្រោះការងារទាំងឡាយមានចរិតជាអន្តរវិស័យ និងប្រទាក់ក្រឡាគ្នា»។
ទិវាវិទ្យាសាស្ត្រ បច្ចេកវិទ្យា និងនវានុវត្តន៍នេះមានគោលបំណង ទី១-បណ្តុះស្មារតីស្រឡាញ់និងការស្វែងយល់អំពីវិទ្យាសាស្ត្រ តាមរយៈការពិសោធន៍ដោយផ្ទាល់ ទី២-ជំរុញកិច្ចសហប្រតិបត្តិការរបស់តួអង្គពាក់ព័ន្ធក្នុងប្រព័ន្ធនវានុវត្តន៍ជាតិ ដើម្បីចាប់យកសក្ដានុពល នៃវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ទី៣-បំផុសឱ្យមានការយល់ដឹងស៊ីជម្រៅអំពីតួនាទីរបស់វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងចំណោមតួអង្គធ្វើគោលនយោបាយ សិក្សាស្រាវជ្រាវ និងវិស័យឯកជន និងទី៤-បញ្ជ្រាបវិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីជំរុញផលិតភាព និងវឌ្ឍនភាពដល់សហគ្រាសធុនតូចនិងមធ្យម។
ឯកឧត្តមរដ្ឋមន្ត្រីក្រសួងឧស្សាហកម្ម រំពឹងថា ទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍ រយៈពេល៣ថ្ងៃនេះ នឹងមានអ្នកចូលទស្សនាជាង៣ម៉ឺននាក់ មកមើលផលិតផលជាស្នាដៃកូនខ្មែរសរុប ២៣៧ស្តង់ មកពី១៣២ក្រុមហ៊ុន មានផ្នែកបច្ចេកវិទ្យា ស្តង់ម្ហូបអាហារនិងភេសជ្ជៈ និងវិស័យធនាគារ ជាដើម។ទិវាជាតិ មានព្រឹត្តិការណ៍អមចំនួន ០៥ រួមមាន៖ (១) ពិព័រណ៍បច្ចេកវិទ្យា និងគ្រឿងឧបករណ៍កម្មន្តសាល, (២) ពិព័រណ៍វិទ្យាសាស្ត្រ, (៣) វេទិកាពិភាក្សាស្តីពីបច្ចេកវិទ្យា, (៤) ពានរង្វាន់អ្នកវិទ្យាសាស្រ្តកម្ពុជាឆ្នើម, និង (៥) កម្មវិធីប្រកាសចាប់ផ្តើម «ពានរង្វាន់នវានុវត្តន៍សម្រាប់វិស័យសាធារណៈ»។
ឯកឧត្តមរដ្ឋមន្ត្រីបានលើកឡើងផងដែរថា ៖ ប្រធានបទនៃទិវាជាតិលើកទី២ នេះ បានផ្តល់នូវថាមភាពបន្ថែមទៀតចំពោះអាណត្តិកិច្ចថ្មីរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានភារកិច្ចដឹកនាំ និងគ្រប់គ្រងវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមទាំងវិស័យសិប្បកម្ម និងទឹកស្អាត។ កំណែទម្រង់ស្ថាប័នដ៏ធំមួយនេះ បានបើកទំព័រថ្មីឱ្យកម្ពុជា ចាប់ផ្តើមមានក្រសួងមួយទទួលបន្ទុកជាក់លាក់លើការដឹកនាំ គ្រប់គ្រង និងអភិវឌ្ឍន៍ វិស័យវិទ្យាសាស្ត្រ បច្ចេកវិទ្យា និងនវានុវត្តន៍ ស្របទៅនឹងចរន្តនៃនិន្នាការរីកចម្រើនរបស់បណ្តាប្រទេសលើសកលលោក និងក្នុងតំបន់។ ជាងនេះទៅទៀត ដោយឈរលើស្មារតីដែលថា ការអភិវឌ្ឍវិទ្យាសាស្ត្រនិងបច្ចេកវិទ្យា ត្រូវតែផ្តោតលើមូលដ្ឋាននវានុវត្តន៍ ដូច្នេះរាល់បច្ចេកវិទ្យា ឬឧបករណ៍ថ្មីៗ ត្រូវតម្រង់ទិសសម្រាប់ការអនុវត្តរបស់វិស័យឯកជន។
ព្រឹត្តិការណ៍ «ពិព័រណ៍វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា-អន្តរជាតិលើកទី២ – ២០២៤» នេះ ជាមួយនឹងកម្មវិធីផ្សេងទៀត ក្នុងរយៈពេល៣ថ្ងៃ ជាឱកាសដ៏ល្អប្រសើរមួយ សម្រាប់លោកគ្រូ អ្នកគ្រូ អ្នកស្រាវជ្រាវ សិស្ស-និស្សិត វិស័យឯកជន ដៃគូអភិវឌ្ឍន៍ ភ្ញៀវកិត្តិយសជាតិ និងអន្តរជាតិ ចូលរួមចែករំលែក និងអនុវត្តរួមគ្នា ដើម្បីការអភិវឌ្ឍសេដ្ឋកិច្ចសង្គមកម្ពុជា៕