បរទេស ៖ ក្នុងស្ថានភាពសេដ្ឋកិច្ចពិភពលោកមិនសូវច្បាស់លាស់នៅឡើយ ប៉ុន្តែសម្រាប់ប្រទេសម៉ាឡេស៊ីបានអះអាងថា ខ្លួនកំពុងទទួលបានការវិនិយោគទាំងក្នុង និងក្រៅស្រុកយ៉ាងខ្លាំងក្លា ហើយច្រើនជាងគេបំផុតក្នុងចំណោមបណ្តាប្រទេសទាំងអស់នៅក្នុងតំបន់អាស៊ីអាគ្នេយ៍។

ការអះអាងដែលត្រូវបានធ្វើឡើងដោយលោកនាយករដ្ឋមន្ត្រី ព្រមទាំងរដ្ឋមន្ត្រីក្រសួងសេដ្ឋកិច្ចរបស់ម៉ាឡេស៊ីកាលពីសប្តាហ៍កន្លងទៅនេះបានបញ្ជាក់ថា ម៉ាឡេស៊ី កំពុងតែប្រើប្រាស់អនុភាពរបស់ខ្លួនជាពិសេសតាមរយៈទីតាំងភូមិសាស្ត្រដើម្បីធ្វើយ៉ាងណាឲ្យសម្រេចបានផែនការធំក្លាយជាមជ្ឈមណ្ឌលប្រមូលផ្តុំនៃក្រុមហ៊ុនបច្ចេកវិទ្យា និងថាមពលធំៗរបស់ពិភពលោកឲ្យបាននៅក្នុងឆ្នាំនេះ។ ក្នុងនោះផងដែរលោកនាយករដ្ឋមន្ត្រី ម៉ាឡេស៊ី Anwar Ibrahim ក៏បានលើកឡើងដែរថា ដោយសារតែការងើបឡើងវិញយ៉ាងលឿននៃសេដ្ឋកិច្ចរបស់ម៉ាឡេស៊ីកាលពីឆ្នាំទៅ វាបានធ្វើឲ្យសកម្មភាពវិនិយោគជាយុទ្ធសាស្ត្រយ៉ាងច្រើនបានហូរចូលមកក្នុងប្រទេស ជាពិសេសទៅលើវិស័យថាមពល និងវិស័យបច្ចេកវិទ្យាឆ្លាតវ៉ៃ, វិស័យហេដ្ឋារចនាសម្ព័ន្ធ ខណៈដែលអតិផរណារបស់លុយ ringgit បន្តមានស្ថិរភាព ហើយតម្លៃទីផ្សារហ៊ុនវិញគឺជាអ្នកទទួលបានភាពរីកចម្រើនខ្លាំងជាងគេក្នុងចំណោមវិស័យដទៃទៀត។

ថ្លែងទៅកាន់វេទិកាសេដ្ឋកិច្ចប្រចាំឆ្នាំមួយរបស់ម៉ាឡេស៊ីកាលពីសប្តាហ៍កន្លងទៅនេះដែរ លោកនាយករដ្ឋមន្ត្រីបានបញ្ជាក់ថា៖

«នៅក្នុងឆ្នាំ២០២៥នេះ យើងនឹងធ្វើឲ្យបានទ្វេដងនៃលទ្ធផលធៀបទៅនឹងឆ្នាំកន្លងទៅ ហើយទាញយកផលចំណេញឲ្យបានកាន់តែច្រើនពីទីតាំងភូមិសាស្ត្រដ៏ល្អរបស់យើង ជាពិសេសការវិនិយោគទៅលើសង្វាក់ផលិតកម្មថាមពល និងវិស័យជាច្រើនទៀត»។

លោកបានបន្តឱ្យដឹងថា ៖ ម៉ាឡេស៊ី នៅពេលនេះនឹងដាក់គោលដៅធ្វើយ៉ាងណាឲ្យខ្លួនក្លាយទៅជាអ្នកជំនាញកាន់តែខ្ពស់លើវិស័យប្រេង និងហ្គាស បន្ទះឈីប និងហិរញ្ញវត្ថុ ដែលវានឹងអាចជួយឲ្យប្រទេសម៉ាឡេស៊ីនាំមុខគេចំពោះទីផ្សារសកលនៅលើគ្រប់វិស័យទាំងអស់។

ដោយឡែក រដ្ឋមន្ត្រីក្រសួងសេដ្ឋកិច្ច លោក Rafizi Ramli វិញ បានថ្លែងថា បច្ចុប្បន្នម៉ាឡេស៊ីបានដាក់ផែនការរួចទៅហើយក្នុងការចាប់យកចំណែកទីផ្សារផ្គត់ផ្គង់បន្ទះឈីបមួយចំណែកធំរបស់ពិភពលោកហើយរំពឹងទុកថានឹងអាចក្លាយទៅជារោងចក្រផលិតម៉ាស៊ីនកំព្យូទ័រ និងបន្ទះឈីបដ៏ធំមួយនៅក្នុងរយៈពេល ៥ ទៅ ១០ឆ្នាំទៀតប៉ុណ្ណោះ។

គួរឲ្យដឹងដែរថា ម៉ាឡេស៊ី បច្ចុប្បន្នគឺជាតួអង្គមួយដ៏សំខាន់នៃប្រទេសដែលជាអ្នកទទួលបន្ទុកកិច្ចការងារតេស្ត និងវេចខ្ចប់ផលិតផលបន្ទះឈីបរបស់ពិភពលោក ឬប្រមាណជា ១៣ ភាគរយនៃទីផ្សារសរុប ខណៈដែលផែនការថ្មីម៉ាឡេស៊ីនឹងចាប់យកឲ្យបានកាន់តែច្រើនជាងនេះទៅទៀតនៃទំហំទីផ្សារវិនិយោគដែលមានតម្លៃប្រមាណជា ១០០ពាន់លានដុល្លារចំពោះសង្វាក់ផលិតកម្មមួយនេះ។

មិនត្រឹមតែប៉ុណ្ណោះ ម៉ាឡេស៊ី ក៏ត្រូវបានគេមើលឃើញថានៅតែបន្តទាក់ទាញបានអ្នកវិនិយោគជនជាតិចិនចម្រុះវិស័យជាច្រើនបន្ថែមទៀតទាំងដែលខ្លួនបានប្រមូលបានទុនវិនិយោគតម្លៃរាប់សិបពាន់លានដុល្លាររួចមកហើយនារយៈពេលប៉ុន្មានឆ្នាំចុងក្រោយនេះ៕