សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ តាមការសង្កេត និងតាមដានរបស់អ្នកជំនាញអចលនទ្រព្យកម្ពុជាបានបង្ហាញថា តាមការចំណាំក្នុងរង្វង់ប្រមាណ១០ឆ្នាំម្ដង វិស័យអចលនទ្រព្យកម្ពុជាតែងជួបវិបត្តិមួយលើក ហើយជាវិបត្តិដែលធ្ងន់ធ្ងរ ជាក់ស្ដែងកាលពីអំឡុងឆ្នាំ២០០៨ វិស័យអចលនទ្រព្យកម្ពុជាបានជួបវិបត្តិម្ដង ដោយកាលនោះគឺស្ថិតនៅក្នុងអំឡុងវិបត្តិហិរញ្ញវត្ថុសាកល ហើយវិបត្តិនេះក៏ធូរស្រាលវិញនៅអំឡុងឆ្នាំ២០០៩ ឬ ដើមឆ្នាំ២០១០ ខណៈដែលវិស័យអចលនទ្រព្យបានចាប់ផ្ដើមឡើងខ្លាំងនៅអំឡុងឆ្នាំ២០១២ ឬ២០១៣ ។ រហូតដល់ឆ្នំា២០២០ វិស័យអចលនទ្រព្យកម្ពុជាក៏បានជួបវិបត្តិម្ដងទៀត ដោយសារតែការរាតត្បាតជំងឺកូវីដ១៩ ហើយបានអូសបន្លាយមកដល់ពេលបច្ចុប្បន្ន។ តាមរយៈបទពិសោធន៍ទាំង២លើកនេះ តើនៅពេលអនាត វិស័យអចលនទ្រព្យកម្ពុជានឹងអាចជួបវិបត្តិទៀតដែរ ?
ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ក្នុងវិស័យអចលនទ្រព្យកម្ពុជា ឃើញថាក្នុងរយៈពេល១០ឆ្នាំ ជួបបញ្ហាម្ដង ប៉ុន្តែសម្រាប់ពេលនេះទៅអនាគត គឺទំនងជាអាចចប់ហើយ លែងមានបញ្ហាទៀតហើយ ។ កន្លងមកបញ្ហាអចលនទ្រព្យរបស់កម្ពុជា ដូចជាម្ដងទីផ្សារ និងអ្នកវិនិយោគកូរ៉េ ម្ដងទីផ្សារ និងអ្នកវិនិយោគចិន ។
បើតាមប្រសាសន៍ឯកឧត្តម បានសំដៅទៅនឹងអំឡុងឆ្នាំ២០០៨ ដែលកម្ពុជាជួបវិបត្តិអចលនទ្រព្យម្ដង ដោយកាលណោះ អ្នកវិនិយោគនៅកម្ពុជាភាគច្រើនជាជនជាតិកូរ៉េ ហើយនៅពេលនោះ ដោយសារតែពិភពលោកជួបវិបត្តិហិរញ្ញវត្ថុសកលផង ក៏ធ្វើឱ្យកូរ៉េត្រូវជួបវិបត្តិ និងជះឥទ្ធិពលដល់វិស័យអចលនទ្រព្យកម្ពុជា ។ ហើយលើកទី២ នៅឆ្នាំ២០២០ ដែលពេលនោះ គឺអ្នកវិនិយោគធំជាងគេនៅកម្ពុជា គឺជាវិនិយោគិនចិន ហើយនៅអំឡុងនោះ វិបត្តិកូវីដ១៩ ក៏បានជះឥទ្ធិពលខ្លាំងដល់វិស័យអចលនទ្រព្យកម្ពុជា ហើយបានអូសបន្លាយរហូតដល់បច្ចុប្បន្ននេះ ។
ឯកឧត្តម ឧបនាយករដ្ខមន្ត្រី សាយ សំអាល់ បានលើកឡើងថា ៖
«ចាប់ពីពេលតទៅ យើងនឹងរៀបចំខ្លួនដើម្បីស្ដារវិស័យអចលនទ្រព្យ ដោយនឹងលែងឱ្យវិបត្តិ ឬបញ្ហាក្នុងវិស័យនេះទៀតហើយ ព្រោះកន្លងមកនេះ យើងបានដោះស្រាយ និងបានត្រៀមខ្លួនរួចរាល់ជាស្រេចហើយដែរ ។ ការដែលអ្នកអភិវឌ្ឍន៍អចលនទ្រព្យ និងអ្នកជំនួញក្នុងវិស័យអចលនទ្រព្យបានដំឡើងថ្លៃអចលនទ្រព្យថ្លៃហួសហេតុពេកក៏នឹងធ្វើឱ្យវិស័យនេះជួបបញ្ហាដែរ គឺបញ្ហាត្រង់ថា អភិវឌ្ឍន៍រួចហើយ តែពុំមានអ្នកទិញ សង់ផ្ទះរួចហើយអត់មានអ្នកទិញស្នាក់នៅ ធ្វើឱ្យមានផ្ទះគ្មានមនុស្សនៅ»។
បើតាមអ្នកជំនាញវិស័យអចលនទ្រព្យជាច្រើនបានលើកឡើងស្រដៀងគ្នាថា វិបត្តិអចលនទ្រព្យនៅក្នុងអំឡុងឆ្នាំ២០២០ រហូតមកដល់បច្ចុប្បន្ននេះ គឺជាមេរៀនសម្រាប់ការប្រុងប្រយ័ត្ននៅពេលអនាគត ដើម្បីជៀសវាងពីវិបត្តិបន្តទៀតនៅពេលអនាគត ។
អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានថ្លែងប្រាប់សារព័ត៌មាន AMS Economy ឱ្យដឹងថា វិស័យនេះនៅតែមានការឡើងចុះ ដោយមិនអាចឡើងរហូតនោះទេ ប៉ុន្តែបើសិនជាមានបញ្ហានៅពេលក្រោយ គឺយ៉ាងហោចណាស់អ្នកពាក់ព័ន្ធក្នុងវិស័យបានដឹងពីវិធីទប់ស្កាត់បាន និងមិនឱ្យជួបបញ្ហាធ្ងន់ធ្ងរដូចពេលកន្លងមក ។
អ្នកស្រីបន្តថា ៖
«កាលពី ២០ឆ្នាំមុន វិស័យអចលនទ្រព្យកម្ពុជានៅក្មេងខ្ចីនៅឡើយ ដូច្នេះហើយនៅពេលជួបបញ្ហាគឺមិនអាចដោះស្រាយបាន ឬទប់ស្កាត់បានល្អទេ ប៉ុន្តែសម្រាប់រយៈពេល១០ឆ្នាំ ២០ឬ៣០ឆ្នាំទៅមុខទៀត វិស័យនេះ កាន់តែរឹងមាំ និងមានភាពចាស់ទុំ ដោយអ្នកជំនួញក្នុងវិស័យអចលនទ្រព្យកាន់តែមានចំណេះដឹង និងវិធីសាស្ត្រថ្មីៗ ល្អៗ សម្រាប់អនុវត្តន៍ និងអាចទប់ស្កាត់បញ្ហាបានល្អ »។
បើតាមនាយិកាក្រុមហ៊ុនអចលនទ្រព្យរូបនេះបានលើកឡើងមានន័យថា វិស័យអចលនទ្រព្យកម្ពុជានៅតែពឹងពាក់ជាមួយនឹងកត្តាខាងក្រៅ ដូច្នេះហើយវាជៀសមិនផុតទេពីបញ្ហា ប៉ុន្តែគ្រាន់តែនៅពេលជួបបញ្ហាយើងអាចដោះស្រាយបញ្ហានោះបានក្នុងកម្រិតណាមួយតែប៉ុណ្ណោះ៕
Account
Security
Favourite Content