បរទេស ៖ សហរដ្ឋអាម៉េរិក បានអនុញ្ញាតឱ្យក្រុមហ៊ុនបច្ចេកវិទ្យា Nvidia លក់បន្ទះឈីប H200 AI របស់ខ្លួនទៅឲ្យប្រទេសចិន និងបណ្តាប្រទេសមួយចំនួនទៀតដែលត្រូវបានអនុម័ត នេះបើយោងតាមសេចក្ដីរាយការណ៍ពី CNBC នៅព្រឹកថ្ងៃទី៩ ខែធ្នូ ឆ្នាំ២០២៥នេះ។

កាលពីថ្ងៃចន្ទ ដើមសប្ដាហ៍នេះ ប្រធានាធិបតីអាម៉េរិក លោក Donald Trump បានលើកឡើងថា Nvidia ត្រូវបានអនុញ្ញាតឱ្យដឹកជញ្ជូនបន្ទះឈីប H200 AI របស់ខ្លួនទៅឱ្យអតិថិជនរបស់ខ្លួននៅក្នុងប្រទេសចិន និងកន្លែងផ្សេងទៀតដែលបានអនុម័ត ប៉ុន្តែក្នុងលក្ខខណ្ឌត្រូវផ្តល់ចំណែកពីការលក់ ២៥ % មកឲ្យរដ្ឋាភិបាលអាម៉េរិក។

លោក Trump បានសរសេរនៅក្នុងទំព័រ Truth Social ថា ៖

«គោលនយោបាយនេះនឹងគាំទ្រទីផ្សារការងារ ពង្រឹងការផលិត និងផ្តល់អត្ថប្រយោជន៍ដល់ពលរដ្ឋដែលបង់ពន្ធនៅក្នុងអាម៉េរិក។ នាយកដ្ឋានពាណិជ្ជកម្មកំពុងធ្វើសេក្តីសម្រេចចុងក្រោយសម្រាប់ព័ត៌មានលម្អិត ហើយវិធីសាស្រ្តនេះនឹងអនុវត្តដូចគ្នាចំពោះក្រុមហ៊ុនអាម៉េរិកផ្សេងៗទៀត ដូចជា AMD និង Intel ផងដែរ»។

យ៉ាងណាក៏ដោយ តបទៅនឹងគោលការណ៍ដែលបានដាក់ចេញដោយរដ្ឋបាលលោក Trump ខាងលើនេះ ប្រធានាធិបតីចិន លោក Xi Jinping បានឆ្លើយតបជាវិជ្ជមាន។

បន្ទាប់ពីមានព័ត៌មានផ្សព្វផ្សាយថា នាយកដ្ឋានពាណិជ្ជកម្មអាម៉េរិកអនុម័តការលក់បន្ទះឈីបទៅឲ្យប្រទេសចិនភ្លាម ភាគហ៊ុនរបស់ Nvidia បានកើនឡើងប្រហែល ២% ជាមួយនឹងការទទួលបានការសាទរចំពោះការសម្រេចចិត្តរបស់ប្រធានាធិបតី Trump ដែលអនុញ្ញាតឱ្យឧស្សាហកម្មបន្ទះឈីបរបស់អាម៉េរិកកាន់តែមានទីផ្សារទូលាយ។

សូមរំលឹកថា កាលពីខែសីហា កន្លងទៅនេះ ក្រុមហ៊ុន Nvidia និង AMD បានយល់ព្រមផ្តល់ ១៥% នៃប្រាក់ចំណូលពីការលក់បន្ទះឈីបទៅឱ្យចិនដល់រដ្ឋាភិបាលអាម៉េរិក ខណៈដែលរដ្ឋាភិបាលចិនបានព្រមានក្រុមហ៊ុននានាមិនឲ្យប្រើប្រាស់បន្ទះឈីប H20 AI ដែល Nvidia រចនាឡើងនោះទេ ជាពិសេសសម្រាប់ក្រុមហ៊ុនចិនតែម្ដង ពីព្រោះវាមានគុណភាពអន់ និងសមត្ថភាពទាបសម្រាប់បច្ចេកវិទ្យា។

គួរឲ្យបញ្ជាក់ដែរថា ឈីប គឺជាធាតុផ្សំដ៏សំខាន់នៅក្នុងគ្រឿងអេឡិចត្រូនិក ហើយក៏ជាចំណុចកណ្តាលនៃការប្រកួតប្រណាំងបញ្ញាសិប្បនិម្មិត (AI) រវាងអាម៉េរិក និងចិន។ លើសពីនេះ វាក៏ជាចំណែកដ៏ធំមួយនៅក្នុងទំនាក់ទំនងពាណិជ្ជកម្មយ៉ាងច្របូកច្របល់រវាងមហាអំណាចសេដ្ឋកិច្ចទាំងពីរផងដែរ។ ជាក់ស្តែង នៅពេលដែលទីក្រុងប៉េកាំងរឹតបន្តឹងការនាំចេញលើរ៉ែកម្រដែលមានសារៈសំខាន់ក្នុងការផលិតបន្ទះឈីបកម្រិតខ្ពស់មួយចំនួននោះ រដ្ឋបាល Trump បានឆ្លើយតបដោយគំរាមដំឡើងពន្ធខ្ពស់លើការនាំចូលពីចិនវិញ។ ក្រោយមក នៅចុងខែតុលាកន្លងទៅនេះ មេដឹកនាំទាំង២ លោក Trump និង លោក Xi បានព្រមព្រៀងកាត់បន្ថយសម្ពាធពាណិជ្ជកម្មគ្នាទៅវិញទៅមកជាបណ្តោះអាសន្ន៕