សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រាជរដ្ឋាភិបាលបានសម្រេចផ្ដល់ឥណទានសម្បទានដល់រាជរដ្ឋាភិបាលកម្ពុជាក្នុងទំហំទឹកប្រាក់សរុបជិត៣០០លានដុល្លារអាម៉េរិក សម្រាប់អភិវឌ្ឍន៍លើវិស័យថាមពល និងទឹកស្អាតក្នុងពេលតម្រូវការមានកំណើនខ្ពស់ក្នុងរយៈពេលប៉ុន្មានឆ្នាំចុងក្រោយនេះ ។
យោងតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៅថ្ងៃទី០៨ ខែតុលា ២០២៥បានឱ្យដឹងថា គម្រោងអភិវឌ្ឍន៍ចំនួនពីរ ត្រូវបានចុះហត្ថលេខានៅថ្ងៃទី០៨ ខែតុលា ឆ្នាំ២០២៥នេះ ដោយឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ ជាមួយឯកឧត្តម UENO Atsushi ឯកអគ្គរដ្ឋទូតវិសាមញ្ញ និងពេញសមត្ថភាពជប៉ុនប្រចាំនៅកម្ពុជា ។
នៅក្នុងសេចក្ដីប្រកាសព័ត៌មានដដែលបានបញ្ជាក់ថា ឯកសារពាក់ព័ន្ធស្ដីពីការផ្ដល់ឥណទានសម្បទានប្រាក់យ៉េនរបស់រាជរដ្ឋាភិបាលជប៉ុននេះ ត្រូវបានបែងចែកជាពីរ ដោយ១. មានទំហំទឹកប្រាក់សរុប ២១,៥២ពាន់លានយ៉េន ឬស្មើនឹងនឹងប្រមាណ ១៤៣,៥លានដុល្លារអាម៉េរិក សម្រាប់អនុវត្តគម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ និងទី២ មានទំហំទឹកប្រាក់សរុបចំនួន២២,៩១ពាន់លានយ៉េន ឬស្មើនឹងប្រមាណ ១៥២,៧លានដុល្លារអាម៉េរិក សម្រាប់អនុវត្តគម្រោងពង្រីកប្រព័ន្ធខ្សែបញ្ជូន និងចែកចាយអគ្គិសនីក្នុងរាជធានីដំណាក់កាលទី៣ ។
ក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថា ការបន្តផ្ដល់ជំនួយហិរញ្ញវត្ថុនេះ បញ្ជាក់ពីការប្ដេជ្ញាចិត្តយ៉ាងមុតមាំរបស់ជប៉ុន ក្នុងការជំរុញការអភិវឌ្ឍសង្គម-សេដ្ឋកិច្ចរបស់កម្ពុជា និងពង្រឹងបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ។
យោងតាមព្រឹត្តិបត្រស្ថិតិបំណុលសាធារណៈកម្ពុជាសម្រាប់ត្រីមាសទី២ឆ្នាំ ២០២៥ របស់ក្រសួងសេដ្ឋកិច្ច និងហិរញ្ញវត្ថុបានឱ្យដឹងថា គិតត្រឹមដំណាច់ត្រីមាសទី២ ឆ្នាំ២០២៥ ទាំងបំណុលមរតក កម្ពុជាមានសន្និធិបំនុលសាធារណៈសរុបចំនួន ១២,៦៧ពាន់លានដុល្លារអាម៉េរិក ក្នុងនោះ៩៩ភាគរយ ឬ១២,៥៤ពាន់លានដុល្លារអាម៉េរិក ជាបំណុលសាធារណៈក្រៅប្រទេស និង១ភាគរយ ត្រូវនឹងប្រមាណ១២៨,៥លានដុល្លារអាម៉េរិកជាបំណុលក្នុងប្រទេស ។
របាយការណ៍ដដែលបានបញ្ជាក់ថា នៅក្នុងឆមាសទី១ ឆ្នាំ២០២៥ រាជរដ្ឋាភិបាលបានចុះកិច្ចព្រមព្រៀងឥណទានថ្មីជាមួយដៃគូអភិវឌ្ឍនានាសរុប ១៩៦,៤៨លានដុល្លារអាម៉េរិក បើធៀបនឹងរយៈពេលដូចគ្នាកាលពីឆ្នាំ២០២៤ ការចុះកិច្ចព្រមព្រៀងឥណទានថ្មីមានការថយចុះប្រមាណ៣៧ភាគរយ ។
សូមបញ្ជាក់ថា សម្រាប់ទំនាក់ទំនងរវាងកម្ពុជា និងជប៉ុន ក្រៅពីការផ្ដល់ឥណទានដល់កម្ពុជាហើយ រាជរដ្ឋាភិបាលនៃប្រទេសជប៉ុនក៏បានផ្ដល់ជំនួយឥតសំណងជាបន្តបន្ទាប់សម្រាប់កម្ពុជាក្នុងការអភិវឌ្ឍធនធានមនុស្ស ហេដ្ឋារចនាសម្ព័ន្ធ និងវិស័យផ្សេងៗទៀត ។ ជប៉ុនក៏បានបញ្ជូនវិនិយោគិនរបស់ខ្លួនមកបណ្ដាក់ទុនវិនិយោគនៅកម្ពុជាជាច្រើនផងដែរ ដែលបានរួមចំណែកដល់ការរីកចម្រើននៃសេដ្ឋកិច្ចរបស់កម្ពុជាគួរឱ្យកត់សម្គាល់៕
Account
Security
Favourite Content