សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស ៖ យោងតាមប្រភព័ត៌មានពីនីគីអាស៊ី បានរាយការណ៍ថា អាជ្ញាធរក្នុងទីក្រុងញូដេលីបានបិទសាលារៀន បញ្ឈប់ការសាងសង់ និងហាមឃាត់រថយន្តដឹកទំនិញដែលមិនមានភាពចាំបាច់ចូលក្នុងទីក្រុងបន្ទាប់ពីខ្យល់បំពុលបានឈានដល់កម្រិតអាក្រក់បំផុតក្នុងរដូវកាលនេះ។
បច្ចុប្បន្ននេះ អ្នករស់នៅក្នុងទីក្រុងញូវដែលីកំពុងប្រឈមជាមួយនឹងផ្សែងអ័ព្ទដ៏ក្រាស់គ្របដណ្តប់ទីក្រុងដែលមានមនុស្សរស់នៅជាង ៣៣ លាននាក់ ខណៈដែលកម្រិតនៃគុណភាពខ្យល់កាន់តែមានគ្រោះថ្នាក់។
យោងតាម SAFAR ទីភ្នាក់ងារបរិស្ថានរបស់ឥណ្ឌាបានឲ្យដឹងថា កម្រិតនៃខ្យល់ពុលបានកើនឡើងចូលទៅក្នុងប្រភេទធ្ងន់ធ្ងរ ដែលធ្វើឲ្យភាគល្អិតតូចៗនៅក្នុងខ្យល់អាចចូលទៅក្នុងសួតបានយ៉ាងជ្រៅ។ លើសពីនេះ អ័ព្ទដ៏ខ្មៅបានគ្របដណ្តប់បូជនីយដ្ឋានសំខាន់ៗ និងអគារខ្ពស់ៗក្នុងទីក្រុងស្ទើរតែមើលមិនឃើញ ខណៈដែលក្រុមហ៊ុនអាកាសចរណ៍បានប្រកាសជូនដំណឺងពីការពន្យារពេលជើងហោះហើរ។ អ្នកត្រួតពិនិត្យបានកត់ត្រាថា ការបំពុលមានកម្រិត ១ ៥០០ នៅលើសន្ទស្សន៍គុណភាពខ្យល់ ដែលលើស ១៥ ដងនៃកម្រិតសម្រាប់ការដកដង្ហើមណែនាំដោយអង្គការសុខភាពពិភពលោក (WHO)។ នៅក្នុងតំបន់មួយចំនួននៃទីក្រុងញូដេលី កម្រិតនៃការបំពុលគឺខ្ពស់ជាង ៥០ ដងនៃកម្រិតសុវត្ថិភាពដែលបានណែនាំដោយអង្គការសុខភាពពិភពលោក។ គេព្យាករណ៍ថា គុណភាពខ្យល់មិនល្អនឹងបន្តក្នុងរយៈពេលច្រើនសប្តាហ៍ទៀត។
ការបំពុលបរិយាកាសនៅភាគខាងជើងនៃប្រទេសឥណ្ឌាកើនឡើងជារៀងរាល់ឆ្នាំ ជាពិសេសក្នុងរដូវរងា ដោយសារកសិករដុតបំផ្លាញសំណល់ដំណាំនៅក្នុងតំបន់កសិកម្ម។ ជាលទ្ធផល ការឆេះនេះស្របគ្នានឹងសីតុណ្ហភាពត្រជាក់ជាងមុន បានបង្កឲ្យមានផ្សែងហុយនៅក្នុងអាកាស។ បន្ទាប់មក ផ្សែងបានភាយចូលទៅក្នុងទីក្រុង ដែលបង្កជាការបំពុលបរិយាកាសបន្ថែម។ មិនត្រឹមតែប៉ុណ្ណោះ ការបំភាយឧស្ម័នពីឧស្សាហកម្ម និងការដុតធ្យូងថ្មដើម្បីផលិតអគ្គិសនីក៏ត្រូវបានផ្សារភ្ជាប់ទៅនឹងការបំពុលដែរ ដែលជំរុញឲ្យការបំពុលបរិយកាសកើនឡើងជាលំដាប់ក្នុងប៉ុន្មានសប្តាហ៍ចុងក្រោយនេះ។ កាលពីសប្តាហ៍មុន កសិករនៅក្នុងរដ្ឋ Uttar Pradesh ដែលនៅជិតខាងទីក្រុងញូដេលីបានដុតវាលស្រែរបស់ពួកគេ បង្ករជាផ្សែងពណ៌ប្រផេះបក់បោកចូលទៅក្នុងទីក្រុង និងតំបន់ផ្សេងទៀតដែលនៅក្បែរនោះ។
ដោយឡែក ជាវិធានការអាទិភាពចំពោះមុខ ចាប់តាំងពីថ្ងៃច័ន្ទសប្ដាហ៍នេះតទៅ អាជ្ញាធរបានចាប់ផ្តើមអនុវត្តដំណាក់កាលទី ៤ នៃផែនការសកម្មភាពឆ្លើយតប (GRAP 4) ដោយផ្អែកលើភាពធ្ងន់ធ្ងរនៃការបំពុលបរិយាកាស។ ដំណាក់កាលដំបូងនៃផែនការបានប្រព្រឹត្តទៅរួចហើយ ហើយដំណាក់កាលទី ៤ នឹងត្រូវបានអនុវត្តការទប់ស្កាត់ឲ្យកាន់តែតឹងរ៉ឹង។ ទន្ទឹមនឹងនេះ ថ្នាក់រៀនទាំងអស់លើកលែងតែថ្នាក់ទី ១០ និងទី ១២ នឹងត្រូវសិក្សាតាមអនឡាញ ខណៈដែលអាជ្ញាធរបានដាស់តឿនដល់កុមារ មនុស្សចាស់ និងអ្នកផ្សេងទៀតដែលមានជំងឺរ៉ាំរ៉ៃ ឬបញ្ហាផ្លូវដង្ហើម ជៀសវាងចេញទៅខាងក្រៅតាមដែលអាចធ្វើទៅបាន។ លើសពីនេះ ពួកគេមិនអនុញ្ញាតឲ្យឡានដឹកទំនិញណាមួយចូលទីក្រុងឡើយ លើកលែងតែអ្នកផ្ទុករបស់របរសំខាន់ៗប៉ុណ្ណោះ ហើយរថយន្តប្រើម៉ាស៊ូតចាស់ៗមួយចំនួនត្រូវបានហាមឃាត់នៅក្នុងទីក្រុងផងដែរ។ បន្ថែមពីនេះ សកម្មភាពសំណង់ទាំងអស់ត្រូវបានផ្អាកជាបណ្តោះអាសន្នផងដែរ។
អ្វីដែលសំខាន់ និងគួរឱ្យកត់សម្គាល់ គុណភាពខ្យល់កាន់តែអាក្រក់បានបង្កឲ្យមនុស្សភាគច្រើនមានអារម្មណ៍មួរម៉ៅ ខឹងសម្បារ មានអាការៈឈឺក្បាល ហៀរសំបោរ និងក្អក ខណៈដែលបរិយាកាសនៅក្នុងទីក្រុងញូដេលី ប្រៀបបានជាបន្ទប់ផ្ទុកហ្គាស។
គួរកត់សម្គាល់ថា ផ្អែកតាមការសិក្សាជាច្រើនបានប៉ាន់ប្រមាណថា ប្រជាជនឥណ្ឌាជាង ១ លាននាក់បានស្លាប់ជារៀងរាល់ឆ្នាំ ដោយសារជំងឺទាក់ទងនឹងការបំពុលបរិយាកាស។ ក្នុងពេលកន្លងមក អាជ្ញាធរបានដាក់ចេញវិធានការមួយចំនួន រួមមាន ការដាក់ពង្រាយម៉ាស៊ីនបាញ់ទឹក និងកាំភ្លើងប្រឆាំងអ័ព្ទក្នុងគោលបំណងគ្រប់គ្រងអ័ព្ទ។ ទោះជាយ៉ាងណាក្តី ក្រុមអ្នករិះគន់បានលើកឡើងថា អាជ្ញាធរចាំបាច់ត្រូវមានដំណោះស្រាយកាត់បន្ថយការបំពុលរយៈពេលវែង ជាជាងចាត់វិធានការកាត់បន្ថយផលប៉ះពាល់បន្ទាប់ពីកន្លែងនោះត្រូវបានបំពុល។ មិនត្រឹមតែប៉ុណ្ណោះ អ្នកខ្លះទៀតបានជំរុញឲ្យមន្ត្រីដោះស្រាយវិបត្តិសុខភាពសាធារណៈម្តងហើយម្តងទៀត៕
Account
Security
Favourite Content