សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សៀមរាប ៖ នៅព្រឹកថ្ងៃទី៤ ខែកក្កដា ឆ្នាំ២០២៤ មានភ្ញៀវទេសចរជាតិ និងអន្តរជាតិជាច្រើនបានទៅទស្សនាថ្ងៃរះនៅប្រាសាទអង្គរ និងតំបន់ជាច្រើនទៀតនៅតំបន់រមណីយដ្ឋានឧទ្យានអង្គរ នាទឹកដីខេត្តសៀមរាប។
យោងតាមក្រសួងទេសចរណ៍បានបង្ហាញថា ក្នុង១ថ្ងៃៗ មានភ្ញៀវបានទិញបណ្ណចូលទស្សនារមណីយដ្ឋានអង្គរប្រមាណ ១ ៣០០ នាក់ ទៅ ១ ៧០០ នាក់ ខណៈដែលជើងហោះហើរចូលមកកាន់ខេត្តសៀមរាបមានចន្លោះពី ១៤ – ១៩ជើងហោះហើរក្នុងមួយថ្ងៃ ហើយក្នុងនោះជាការកត់សម្គាល់ឃើញមានមកពីទីក្រុងបាងកក ប្រទេសថៃ ចំនួន ៥-៦ ជើងក្នុងមួយថ្ងៃ, ហូជីមិញ ៣ ជើងក្នុងមួយថ្ងៃ, ដាណាង១ ជើងក្នុង១ថ្ងៃ, ហាណូយ ២ ជើងក្នុងមួយថ្ងៃ, កូឡាឡាំពួរ ១ ជើងក្នុងមួយថ្ងៃ, សិង្ហបុរី ១ជើងក្នុងមួយថ្ងៃ, ភ្នំពេញ ២ជើងក្នុងមួយថ្ងៃ និងក្រុងព្រះសីហនុ ១ជើងក្នុងមួយថ្ងៃ ។
គួរបញ្ជាក់ផងដែរថា គោលដៅទេសចរណ៍សំខាន់ៗ ចំនួន ៤ របស់កម្ពុជា បានជាប់ជាគោលដៅទាក់ទាញទេសចរណ៍ល្អបំផុតនៅអាស៊ីដែលផ្ដល់ដោយ TripAdvisor។
ប្រាសាទអង្គរវត្ត នៅលំដាប់លេខ ២ ប្រាសាទតាព្រហ្ម លំដាប់ទី ១៩ ប្រាសាទបាយ័ន លំដាប់ទី ២០ និង សារមន្ទីរប្រល័យពូជសាសន៍ទួលស្លែង លំដាប់ទី ២២ ក្នុងចំណោមទាំង ២៥ គោលដៅទាក់ទាញទេសចរកំពូលនៅអាស៊ី។
យោងតាមគ្រឹះស្ថានអង្គរកាលពីពេលថ្មីៗនេះបានឱ្យដឹងថា ក្នុងរយៈពេល៦ខែ ដើមឆ្នាំ២០២៤នេះ កម្ពុជារកចំណូលពីការលក់បណ្ណឱ្យភ្ញៀវទេសចរអន្ដរជាតិចូលទស្សនាតំបន់រមណីយដ្ឋានអង្គរទទួលបានប្រមាណ ២៤លានដុល្លារអាមេរិក លើចំនួនភ្ញៀវទេសចរសរុបជាង៥ម៉ឺននាក់។
សម្រាប់ខែមិថុនាឆ្នាំ២០២៤ មានភ្ញៀវទេសចរអន្ដរជាតិទិញបណ្ណចូលទស្សនាអង្គរមានចំនួន ៤៩ ៦៩២ នាក់ បើធៀបនឹងឆ្នាំ២០២៣កន្លងទៅកើនឡើងជាង២០រយភាគរយ និងផ្ដល់ចំណូលថវិកាចំនួន ២ ១៥០ ៨០៤ដុល្លារ កើនឡើងជាង១៨ភាគរយ បើធៀបក្នុងរយៈពេលដូចគ្នានៃឆ្នាំ២០២៣។
ភ្ញៀវទេសចរជនជាតិអាមេរិក ឈរនៅកំពូលតារាងដែលមកទស្សនារមណីយដ្ឋានអង្គរច្រើនជាងគេ ជាង ៥៥ ០០០នាក់។ បន្ទាប់មកទេសចរជនជាតិអង់គ្លេស ជាង ៤៨ ០០០នាក់, បារាំង ជិត ៤៤ ០០០នាក់, កូរ៉េខាងត្បូង ជិត ៤៤ ០០០នាក់ និងទេសចរចិន ជាង ៣៨ ០០០នាក់។ ចំណែកលេខរៀងបន្ទាប់មាន ជប៉ុន អាល្លឺម៉ង់ និងអូស្រ្តាលី រីឯឥណ្ឌា ឈរនៅលេខរៀងទី៩ មានទេសចរជាង២ម៉ឺននាក់៕
Account
Security
Favourite Content